Nanchi Lesa Waingijishe Kwaluka kwa Bintu Kuba’mba Mufume Bintu Bipeema Byapusana pusana Nyi?
Mukumbu wa mu Baibolo
Ine mwane. Baibolo waamba’mba Lesa walengele bantu ne “mitundu” ya banyama ne bichi byapusana pusana. (Ntendekelo 1:12, 21, 25, 27; Lumwekesho 4:11) Baibolo waamba’mba bantu bonse bafumine ku bansemi betu batanshi ba Adama ne Evwa. (Ntendekelo 3:20; 4:1) Baibolo kechi waambapo’mba Lesa waingijishe kwaluka kwa bintu kuba’mba kwikale bintu bipeema ne bibula kupeema byapusana pusana ne. Kabiji Baibolo kechi ukana byamba ba shayuka ba sayansi kuba’mba kuji mitundu ya bintu bipeema yapusana pusana ne.
Nanchi Lesa waingijishe kwaluka kwa bintu nyi?
Bantu baitabila’mba Lesa waingijishe kwaluka kwa bintu pa kuba’mba mufume bintu bipeema byapusana pusana, bakumya ne kwamba byapusana pusana ene mambo ka Lesa o aubijile bino. Bantu bamo balanguluka’mba Lesa ye ulengela banyama nangwa bichi kutanwa ku mpunzha imo kuba’mba bikaleko ne kusemununa.
Kuswa kuba’mba bintu byaluka bine kwavwangamo ne ino milanguluko:
Bintu byonse byafumine ku bashakulu betu myaka yavula bingi yapitapo.
Bantu bamo baitabila’mba kintu kimo kyumi kyakonsha kwaluka kwikala ke kintu kikwabo kyapusanako. Bamo bamba ne kuba’mba bampombo bakonsha kwaluka kwikala bantu.
Kyamweka Lesa ye ulengela bino bintu kuba’mba byalukenga kwikala kintu kingi.
Nanchi kwaluka kwa bintu kwakwatankana na byaamba Baibolo nyi?
Kufunjisha kuba’mba bintu byalukatu bine kumwesha’mba jishimikila ja mu Baibolo jaamba pa kulengwa kwa bintu jiji mu buku wa Ntendekelo ja bubela bingi. Pano bino, Yesu waambilepo ja jishimikila jiji mu buku wa Ntendekelo kuba’mba ja kine. (Ntendekelo 1:26, 27; 2:18-24; Mateo 19:4-6) Baibolo waamba’mba Yesu saka akyangye kwiya pano pa ntanda, waikalanga mwiulu ne Lesa. Kabiji naye waingijile pamo ne Lesa kulenga “bintu byonse” bijiko. (Yoano 1:3) Onkao mambo, kwamba’mba Lesa waingijishe kwaluka kwa bintu kuba’mba mufume bintu byapusana pusana bipeema kwapusana bingi na byaamba Baibolo.
Nanchi bulume buji na bichi ne banyama bwa kupimpula kwesakana na mpunzha ko biji kubena kutundaika mulanguluko wa kuba’mba bintu byalukatu bine nyi?
Baibolo kechi waambapo byo kikala inge kilengwa kimotu kyafuma mu kikwabo ne. Kabiji Baibolo waamba kine kuba’mba banyama ne bichi byapusana pusana Lesa ye wibilengele. Kabiji byakonsha kupusanako byo bisemwa nangwa kwikala kwesakana na mpunzha ko biji. Nangwa kya kuba bamo bamona’mba kuno kupimpula pimpula kwa bilengwa kubena kulumbulula’mba bintu byaluka bine ne. Mambo mu kuno kupimpula kechi mufuma kilengwa kikwabo kyapusanako ne.