Kuyuka Mwingilo wa Kilishitu mu Lunengezho lwa Lesa

“MU NTENDEKELO Lesa walengele jiulu ne ntanda,” kabiji byonsetu byo alengele byajinga “byawamishatu.” (Nte. 1:1, 31) Yehoba walengele bantu na luketekelo lwa kwikala bwikalo bwawama kulutwe. Pano bino, bunsatuki bwa mu Edena bwalengejile bwikalo bwawama bwa bantu kulubankana pa kakimye kacheche. Nangwa byonkabyo, byakebelenga Yehoba amba bantu bekalenga pano pa ntanda kechi byaalukile ne. Lesa waambile’mba baana ba lukookelo ba kwa Adama bakebakuula. Bupopweshi bwa kine bakebubwezha, kabiji Lesa ukonauna mubi pamo ne mingilo yanji yonse yatama. (Nte. 3:15) Bintu bikekala jibiji ke “byawamishatu.” Yehoba ukooba bino byonse kupichila mu Mwananji, Yesu Kilishitu. (1 Yoa. 3:8) Onkao mambo, kyanema bingi kuyuka mwingilo wa Kilishitu mu lunengezho lwa Lesa.—Byu. 4:12; Fili. 2:9, 11.

MWINGILO WA KILISHITU

² Umvwe ketulanguluke pa mwingilo wa Kilishitu mu lunengezho lwa Lesa, tuyuka’mba uji na mingilo yavula. Yesu ye Mukuzhi wa bantu, ye Ñanga Mwine Mukatampe, ye Mutwe wa kipwilo kya bena Kilishitu, kabiji luno ke Mfumu wa Bufumu bwa Lesa. Kulanguluka languluka pa ino mingilo kwitulengela kusanchila Lesa pa lunengezho lwanji ne kumwesha byo twatemwa Kilishitu Yesu. Baibolo waamba pa mingilo yanji yapusana pusana.

³ Kimye kya mwingilo wa Kilishitu pano pa ntanda, kyamwekeshetu patoka kuba’mba kupwana jibiji kwa Lesa na bantu ba lukookelo kukobiwa kupichila mwi Yesu. (Yoa. 14:6) Byo aji Mukuzhi wa bantu, Yesu wipaine aye mwine kwikala bukuzhi bwa kukuula bavula. (Mat. 20:28) Onkao mambo, Yesu kechi wamwesheshetu byubilo bya mwayila mizhilo ya Lesa ne. Ye wingila mwingilo wabaya bingi pa kufikizha kyaswa muchima wa Yehoba ku bantu. Ye yenkatu wakonsha kwitukwasha kubwela jibiji kwi Lesa. (Byu. 5:31; 2 Ko. 5:18, 19) Lufu lwa kitapisho kya kwa Yesu ne lusanguko lwanji byashinkwila bantu ba lukookelo jishinda ja kwikala na mapesho a myaka ne myaka mu bukalama bwa mwiulu bwa Bufumu bwa Lesa.

⁴ Byo aji Ñanga Mwine Mukatampe, Yesu ‘witumvwina lusa pa kubula kukosa kwetu’ ne kufuchilako mambo baana banji ba bwanga bepana baji pano pa ntanda. Mutumwa Paulo walumbulwile’mba: “Kechi tuji na ñanga mwine mukatampe ubula kwitumvwina lusa pa kubula kukosa kwetu ne, bino tuji na yewa waesekelwe mu meseko onse o tupitamo, bino aye kechi walengelepo mambo ne.” Kepo Paulo atundaikile bonse baji na lwitabilo mwi Yesu Kilishitu kumwenamo mu luno lunengezho lwa kupwana jibiji ne Lesa, byo aambile’mba: “Onkao mambo, twayai tufwenye kwipi ku jitanda ja lusa lukatampe saka twakasuluka pa kwamba, pa kuba’mba betubile kifyele ne lusa lukatampe lwa kwitukwasha pa kimye kyafwainwa.”—Hebe. 4:14-16; 1 Yoa. 2:2.

⁵ Kabiji Yesu ye Mutwe wa kipwilo kya bena Kilishitu. Byonkatu byo kyajinga ku baana banji ba bwanga ba mu myaka kitota kitanshi, ne atweba lelo jino kechi tukebewa kwikala na ntangi muntu ne. Yesu utangijila kwingijisha mupashi wazhila ne banabalume bafikilamo kwikala bakafunga, baketotolwela kwi aye ne kwi Shanji wa mwiulu na mambo a byo balama jitanga ja Lesa. (Hebe. 13:17; 1 Pe. 5:2, 3) Yehoba waambile mu bungauzhi pe Yesu amba: “Talai! Amiwa namutongwele kwikala kamonyi ku bisaka bya bantu, ne kwikala ntangi wa kutangijila bisaka bya bantu.” (Isa. 55:4) Yesu wafikizhe buno bungauzhi byo aambijile baana banji ba bwanga amba: “Kutelwa’mba bantangi ne, mambo mujitu na Ntangi umo, aye Kilishitu.”—Mat. 23:10.

⁶ Yesu umwesha muchima ye aji nanji ne byo akebesha kwitukwasha. Witwita’mba: “Iyai ko nji, anweba bonse bakooka ne kunemenwa, ne amiwa nkemukokolosha. Sendai kikonkoji kyami ne kufunda kwi amiwa, mambo nekimote kabiji nakooka muchima, ne anweba mukakokoloka. Mambo kikonkoji kyami kyapeela, ne kipe kyami kyapeela.” (Mat. 11:28-30) Byo atangijila bintu bya kipwilo kya bena Kilishitu mu bukimote ne mu jishinda jikokolosha michima yetu, Yesu Kilishitu wamwesha aye mwine amba ye “kafunga wawama” ulondela Shanji wa mwiulu, aye Yehoba Lesa.—Yoa. 10:11; Isa. 40:11.

⁷ Mu nkalata yanji itanshi ku bena Kolinda, Paulo walumbulwile lubaji lukwabo lwa mwingilo wa kwa Yesu Kilishitu byo aambile’mba: “Aye wafwainwa kwikala mfumu kufikatu ne kimye Lesa kyo akabika balwanyi bonse munshi ya maulu anji. Pakuba bintu byonse byo bakebikookesha munshi ya maulu anji, Mwana naye ukekookesha aye mwine kwi Lesa yenka wamukookesheshe bintu byonse pa kuba’mba, Lesa ekale bintu byonse ku bantu bonse.” (1 Ko. 15:25, 28) Byo aji mutanshi pa bilengwa byonse bya Lesa, Yesu wajinga “sendwe” wa Lesa saka akyangye kwiya pano pa ntanda. (Maana 8:22-31) Lesa byo amutumine pano pa ntanda, Yesu waubilenga kyaswa muchima wa Lesa kimye kyonse. Wachinchikile lweseko lukatampe ne kufwa saka aji wa kishinka kwi Shanji. (Yoa. 4:34; 15:10) Na mambo a kuba Mwananji wajinga wa kishinka kufikatu ne ku lufu, Lesa wamusangwile kuya mwiulu kabiji wamupele luusa lwa kwikala Mfumu wa Bufumu bwa mwiulu. (Byu. 2:32-36) Byo aji Mfumu wa Bufumu bwa Lesa, Kilishitu Yesu uji na mwingilo mukatampe ye bamupa kwi Lesa wa kutangijila mabumba a bulume a bilengwa bya mupashi kufumyapo bukalama bwa bantu ne bubi bonse pano pa ntanda. (Maana 2:21, 22; 2 Tesa. 1:6-9; Lum. 19:11-21; 20:1-3) Bufumu bwa Lesa bwa mwiulu, kimye kikalamanga Kilishitu bo bukekalatu na luusa lwa kulama pano pa ntanda ponse.—Lum. 11:15.

BYO KILUMBULULA KUYUKA MWINGILO WANJI

⁸ Yesu Kilishitu wa kumwenako wetu, walumbuluka. Bamupa mwingilo wa kwitulama. Pa kuba’mba tumwenemo mu byo etulama mu butemwe bwanji, twafwainwa kutwajijila kwikala ba kishinka kwi Yehoba ne kwendela pamo na jibumba ja Yehoba jibena kuyilakotu palutwe.

⁹ Mu myaka kitota kitanshi, baana ba bwanga ba kwa Yesu bayukile bingi mwingilo wa Kilishitu mu lunengezho lwa Lesa. Bamwesheshe kino byo baingijilenga pamo saka bakwatankana kulondela buntangi bwa Kilishitu, kukookela lutangijilo lwanji lo apana kupichila mu mupashi wazhila. (Byu. 15:12-21) Mutumwa Paulo waambilepo pa kukwatankana kwa kipwilo kya bena Kilishitu bashingwa byo anembele’mba: “Pa kwamba bukine monka mu butemwe, twayai tukomenga mu bintu byonse mwi aye mutwe, Kilishitu. Mwi aye, mo mwanungakena binungwa byonse bya mubiji ne kwibilengela kukwatankana mu manungi onse apana bibena kukebewa. Umvwe kinungwa kyonse kibena kwingila bulongo, kilengela mubiji kukoma ne kubaya mu butemwe.”—Efi. 4:15, 16.

¹⁰ Umvwe yense mu kipwilo wakwatankana na bakwabo kabiji bonse balondela buntangi bwa Kilishitu, pekala kukomenako kabiji tutwajijila kwikala na butemwe “bukwatankanya bantu bulongo.”—Yoa. 10:16; Kolo. 3:14; 1 Ko. 12:14-26.

¹¹ Bintu bibena kumweka pano pa ntanda bibena kufikizha bungauzhi bwa mu Baibolo, kabiji bibena kumwesha patokatu too kuba’mba kutendeka mu 1914, Yesu Kilishitu bamupa bulume bwa Bufumu. Luno ubena kulama mukachi ka balwanyi banji. (Sala. 2:1-12; 110:1, 2) Nanchi kino kibena kulumbulula ka ku boba babena kwikala pano pa ntanda? Katatakatu Yesu akengile mwingilo wanji, byo aji Mfumu wa bamfumu ne Nkambo ya bankambo byo akaleta lukabisho lwa Lesa pa balwanyi banji. (Lum. 11:15; 12:10; 19:16) Kepo Yehoba akafikizha mulaye wanji wa kupokolola bantu, ye alayile kimye kyasatukile Adama ne Evwa. Ukapokolola boba bakekala ku kuboko kwa kilujo kwa kwa Kilishitu. (Mat. 25:34) Twatemwa bingi byo twayuka mwingilo wa Kilishitu mu lunengezho lwa Lesa. Twayai tutwajijile kukwatankena pamo, byo tubena kwingila mwingilo wa ntanda yonse kulondela buntangi bwa Kilishitu mu ano moba a kupelako.