Sawakya wa Basapwishi ba Bufumu
Waikele na Lusekelo mu Bwikalo Bwanji
YESU waambile’mba wayuka mikooko yanji. (Yoano 10:14) Inge muntu wakishinka kabiji watemwa mutende ne kuba bintu byawama, ukafwenya kwipi na baana ba bwanga ba kwa Yesu. Muntu ufuukulapo kuba bintu byawama wikala bwikalo bwawama bingi byonkatu byaubile mwanamukazhi umo wikala mu kyalo kya Belgium. Tangai jino jishimikila janji:
Bakamonyi ba kwa Yehoba byo baishile pa nzubo pami, bantaaine saka nji na bijikila kabiji nalangulukilenga pa kwikujika. Natemenwe bingi bintu byambuujile Bakamonyi pa makatazho aji pano pa ntanda. Pano bino, kechi natemenwe byo bambuujile’mba Lesa ye ukafumyapo ano makatazho onse ne. Nalekele kuya ku chechi pa myaka itanu na isatu kabiji kechi natemenwe bantu bo napwilanga nabo ne. Kyandengejile kubula kwibatemwa mambo bajinga bakamfutumfutu. Pakuba mu Bakamonyi namwenemo bukine mu byonse byo baambilenga. Akino kyandengejile kuswa kuba’mba kechi kyapeela muntu kwikala bwikalo bwawama kwa kubula bukwasho bwa Lesa ne.
“Byo papichiletu moba acheche kufuma pamfwakashijile Bakamonyi, nalekele kwisamba nabo. Bintu byayile bingi mu nsunya. Natendekele kupeepa fwanka wavula bingi pa juba pa juba ne kwingijisha bizhima. Nakebeshe bingi kuba’mba nesambenga na bankambo bafwile kala. Akino kyandengejile kutendeka kupopwela mipashi. Juba jimo bufuku, naikele bingi na moyo mambo bandemona bandukukile. Bandemona bankatezhe pa bañondo bavula. Moba onse inge kyafika mabanga naakamwanga bingi kwikalatu bunke.
“Juba jimo byo nayilenga na kupitañana, naingijishe jishinda jikwabo jo nabulanga kupitamo kabiji nafikile pa mpunzha po bashimikijilenga kishimikwa kimo. Nakuminye bingi kumona bantu bavula saka babena kwingila. Byo nafikile pepi, nayukile’mba Bakamonyi ba kwa Yehoba bashimikilenga Nzubo ya Bufumu. Kino kyamvulwilemo bimye byamfwakashijile Bakamonyi pa nzubo. Kabiji bintu byo namwene byandengejile kulanguluka’mba bantu bonse inge bajinga byonka biji bano bantu, ino ntanda yonse inge yawama bingi.
“Nakebeshe bingi kuba’mba Bakamonyi bakamfwakashile jikwabo. Onkao mambo, nasolomokelepo umo pa bashimikilenga Nzubo ya Bufumu. Nalombelepo kwi Lesa kabiji byo papichile moba jikumi, muntu wisambile ne amiwa kimye kitanshi ye waishile jibiji pa nzubo. Wañambijile’mba tutwajijile kufunda Baibolo, ne amiwa naswile. Ponkapotu wangichile kuya na kupwila pa Nzubo ya Bufumu. Napotu naswile. Kashika natemenwe bingi bintu byo namwene! Nkyangye kumonapo bantu betemwa mulwabo kabiji baji na lusekelo baesakana na Bakamonyi ba kwa Yehoba ne. Abano bo bantu bo nakebeshenga bingi kupwanañana nabo!
“Natendekele kutaanwa ku kupwila konsetu. Byo papichile milungu isatu, nalekele kupeepa fwanka. Natayile mabuku onse aamba pa bya bulozhi ne nyimbo yonse yatundaikanga Satana. Kabiji bandemona batendekele kungamuka. Napimpwile byubilo byami ne kutendeka kulondela mikambizho ya Yehoba iji mu Baibolo. Byo papichiletu bañondo basatu natendekele kusapwila mambo awama. Kabiji byo papichile bañondo batanu na umo nabatizhiwe. Byo papichiletu moba abiji kufuma po nabatizhiwe, nanembeshe kwingilako bupainiya bwa kukwasha.
“Kine namusanchila bingi Yehoba pa bintu byonsetu byawama byo angubila mu bwikalo bwami. Bwikalo bwami luno bwawama bingi! Kwambatu kine, jizhina ja Yehoba kyo kyamba kyakosa mo nafyama ne kuzhikijilwa. (Byambo bya Maana 18:10) Naumvwinengatu ku muchima byonkatu byanembele nyimbi wa Masalamo pa Salamo 84:10 amba: ‘Kwikala juba jimo mu bipango byenu kwawama kukila kwikala myaka kiumbi ku mpunzha ingi! Nasalapo kwimana ku kibelo kya nzubo ya Lesa wami kukila kwikala mu matente muji bubi.’”
Uno mwanamukazhi wajinga na muchima wa kukeba kuyuka Lesa pano ubena kwikala bwikalo bwawama bingi. Onkao mambo, muntu yense wafwainwa kukeba kufunda pe Yehoba na muchima umo.