Bakamonyi ba kwa Yehoba Mwaya Ntanda Yonse Baji Banga?

Mubala byepi bantu?

Bantu bo babala amba Bakamonyi ba kwa Yehoba ke boba basapwila mambo awama a Bufumu bwa Lesa pa ñondo pa ñondo. (Mateo 24:14) Bano ke bantu babatizhiwa ne kwikala Bakamonyi kabiji ne boba bakyangye kubatizhiwa bino bafikilamo kusapwila.

Nanchi muntu upana mali pa kuba’mba ekale Kamonyi nyi?

Ine. Mali kechi o akonsha kulengela muntu kwikala Kamonyi nangwa kumupa mwingilo nangwa kifulo mu jibumba ja Lesa ne. (Byubilo 8:​18-​20) Bino, bantu bapana bupe kechi bayukanyikwa ne kuyukanyikwa ne. Kamonyi yense upana kimye, ngovu ne bintu bikwabo ku mwingilo wa ntanda yonse kwesakana na byo akeba ne mo amwena kabiji ne biji bwikalo bwanji.​—2 Kolinda 9:7.

Muyuka byepi kibelengelo kya babena kusapwila kimye kyonse?

Pa ñondo pa ñondo, Bakamonyi bapana sawakya ku kipwilo ko bapwila wa byo baingijile mu mwingilo. Uno sawakya kechi kwikala kukanjikizha pa kupana ne.

Sawakya wa kipwilo ubalwa bulongo ne kumutuma ku ofweshi wa musampi konka ko baji. Ofweshi wa musampi utuma sawakya yense wa kyalo kyonse ku maofweshi akatampe a ntanda yonse.

Inge mwaka wa mwingilo wapwa,a bayuka kibelengelo kya Bakamonyi mu byalo byonse mu yewo mwaka. Bino bibelengelo bebivwanga pamo pa kuba’mba bayuke kibelengelo kya Bakamonyi mwaya ntanda yonse. Masawakya aamba pa kyalo kimo kimo beanemba pa keyala wetu wa jw.org/kqn pa kipungu kya kuba’mba “Mwaya Ntanda.” Ano masawakya etutundaika bingi byonkatu byo atundaikanga bena Kilishitu batanshi.—Byubilo 2:41; 4:4; 15:3.

Nanchi mubala ne boba beyakotu na kupwila bino kechi baya na kusapwila nenyi?

Nangwa kya kuba kechi tubala bano bantu pamo na Bakamonyi ne, bino twibatambwila inge baiya na kupwila. Bavula beya na kushinkwa ku Kivuluko kya lufu lwa Kilishitu, kabiji kibelengelo kyabo kiyukanyikwa pa kwesakanya kibelengelo kya bantu baiya ku Kivuluko na kibelengelo kya Bakamonyi bonse. Mu 2024, bantu batainwe ku Kivuluko bajinga 21,119,442.

Bavula babula kutanwa ku kupwila bamwenamo bingi mu mutanchi wa kufunda Baibolo. Mu mwaka wa 2024, twafunjishe Baibolo bantu 7,480,146 pa ñondo pa ñondo, bamo bebafunjishe ku bantu bapusana pusana pa kimye kimo.

Mambo ka bibelengelo bya Bakamonyi biji na kafulumende kyo bibayila kukila bibelengelo byenu?

Bipamo bya kafulumende bibala bantu bepuzhatu bantu ku bupopweshi ko baya nangwa ko bakonsha kutemwa kuya. Kipamo kya U.S. Census Bureau kyaipwizhenga bantu kukeba kuyuka inge bantu bayapo ku bupopweshi nangwa ne. Kyatainwe kuba’mba bantu bakumbwilengatu kwesakana na byo balangulukilenga kechi mwayila bishinka ne. Bino byapusanako na bibala Bakamonyi ba kwa Yehoba mambo abo babalatu bantu baya na kusapwila kabiji bapana masawakya, kechi boba betelatu amba twi Bakamonyi ne.