Nanchi Mesiasa Ukebewa kwi Atweba Nyi?
KIMYE kimo mwakonsha kushikisha’mba: “Nanchi Mesiasa ukebewa kwi atweba nyi?” Ee, Mesiasa ukebewa bingi.
Bantu bamo bo mwakinkamo manungo bakonsha kwimwambila’mba kyamwekeshatu patoka kuba’mba Mesiasa ukebewa bingi ku muntu yense. Shayuka umo wa mu myaka kitota kitanshi wafunjile mizhilo ya Bayudea wanembele pe Mesiasa amba: “Milaye ya Lesa, nangwa yavujisha byepi, yaikajikwa mwi aye.” Onkao mambo, waambile pa mwingilo mukatampe wingila Mesiasa kwesakana na nkebelo ya Mulenga wetu ya kupesha mikoka yonse ya ba panopantanda. (2 Kolinda 1:20) Mwingilo wa kwa Mesiasa wanema bingi kabiji kwiya kwanji ne bwikalo bwanji panopantanda byamwesheshetu patoka kuba’mba aye kyo kishina kya bungauzhi bwa mu Baibolo. Muntu umo wa jizhina ja Henry H. Halley waambilepo byambo bimo biji mu buku umo waingijisha bantu bavula kukila pa myaka makumi atanu na abiji amba: “Lulayañano lwa Kala lwanembelwe kuba’mba lukoseshe lwitabilo ne kupembelela Kwiya kwa [kwa Mesiasa].” Nanchi kwiya kwanji kwanema nyi? Mambo ka o mwafwainwa kutelako muchima?
Byambo bya kuba’mba “Mesiasa” ne “Kilishitu” byonse bibiji bilumbulula’mba “Mushingwa.” Uno muntu watelwa mu buku wa Encyclopædia Britannica, wanembelwe mu 1970 amba, “mukuzhi mukatampe,” wafwainwe kwiya na mambo a jishinda jatama jasajilepo ba Adama ne Evwa. Bajinga baoloka kabiji bajinga na luketekelo lwa kwikala myaka ne myaka mu Paladisa, pano batayile jino jishuko. Malaika nsatuki, wayukanyikwa’mba Satana Diabola, wibabujile’mba Mulenga wabo wibajimukijile, kabiji amba bintu byafwainwe kwikalatu bulongo umvwe saka befuukwila bene byawama ne byatama.—Ntendekelo 3:1-5.
Evwa wajimbaikilwe ne kwitabizha buno bubela. Adama wanemekeleko mukazhanji mu kifulo kya kwikala wa kishinka kwi Lesa. Kyafuminemo wakokejile bunsatuki bwa kwa Diabola. (Ntendekelo 3:6; 1 Timoti 2:14) Byubilo byabo kechi bibalengejiletu kubula kwikala na bumi bwa myaka ne myaka mu paladisa ne, bino byalengejile ne baana babo kuswana bundengamambo ne lufu.—Loma 5:12.
Ponkapotu, Mulenga wetu Yehoba wanengezhezhe jishinda ja kupwishishamo buno bubi bwaishile na mambo a lusatuko. Wafwainwe kufikizha kino kupichila mu kwingijisha jifunde jaambiwapo mu Mizhilo ya Mosesa. (Mpitulukilo ya mu mizhilo 19:21; 1 Yoano 3:8) Jino jifunde jikatampe jafwainwe kwingila pa kuba’mba baana ba kwa Adama ne Evwa bekale na bumi bwa myaka ne myaka mu paladisa panopantanda, kwesakana na byakebele Mulenga. Kino kyo kyalengela’mba kwikale Mesiasa.
Yehoba Lesa byo amuchibijilenga Diabola mambo, waambile mu bungauzhi butanshi bwa mu Baibolo amba: “Nkalenga obewa ne mwanamukazhi ke muji ba mulwanyi na mulwanyi, kabiji ne wa mu kisemi kyobe ne wa mu kisemi kyanji pamo ke ba mulwanyi na mulwanyi. Kabiji aye ukafumpa mutwe wobe, ne obewa ukafumpa kashiko kanji.” (Ntendekelo 3:15) Shayuka wa Baibolo umo waambilepo’mba “abino byo byambo bitanshi bya mu Binembelo byaamba pe mesiasa.” Shayuka mukwabo naye waambile kuba’mba Lesa ukengijisha Mesiasa “kufumyapo bundengamambo bwaletele bantu batanshi,” ne kuletela mapesho bantu bonse.—Bahebelu 2:14, 15.
Mwayukishatu bulongo kuba’mba bantu ne luno kechi babena kwikala bulongo ne, babena kupita bingi mu matakazho. Byo byaamba ne buku wa The World Book Encyclopedia amba “Bayudea bavula bakitengela kwiya kwa kwa Mesiasa” ne kuba’mba “ukeya kuwamisha bintu ne kushinda balwanyi ba bantu.” Pano bino Baibolo waamba’mba Mesiasa waiya kala.