Ñanyi Bintu Byavwangwamo Mu Kwikala Mwana Wa Bwanga?

Yesu byo ajiilenga kajo mu nzubo ya ntangi wa Bafaliseo, wafunjishe bintu byanema bingi. Yesu byo afumine kuno, watwajijile kuya ku Yelusalema kabiji jibumba jikatampe jamulondejilenga. Mambo ka o jamulondejilenga? Nanchi bakebelenga kwikala baana banji ba bwanga ba kumulondela kimye kyonse nangwa kya kuba mwavwangilwe bintu byavula mu kuba bino nyi?

Byo bayilenga, Yesu waambile kintu kyalengejile bantu bamo kukumya. Waambile’mba: “Umvwe muntu waiya ko nji ne kubula kushikwa bashanji, bainanji, mukazhanji, baana banji, bakolojanji nangwa bankasanji ba balume, banyenga yanji nangwa bumi bwanji, kechi wakonsha kwikala mwanami wa bwanga ne.” (Luka 14:26) Yesu watazhizhe mu ka pa kwamba bino?

Yesu kechi waambilenga’mba baana banji ba bwanga bafwainwe kushikwa balongo babo ne. Bino waambilenga’mba bafwainwe kwibashikwa mu jishinda ja kuba’mba kechi bafwainwe kukizhamo kutemwa balongo babo kukila byo bamutemenwe Yesu ne. Kechi bafwainwe kwikala nobe yewa muntu waambilepo Yesu mu kishimpi kya kijiilo kya mabanga wakaine lwito lwanema na mambo kuba’mba popo asongweletu ne. (Luka 14:20) Mushakulu wa Bayudea aye Yakoba bamwambapo’mba ‘washikilwe’ Liya bino watemenweko Lechela, ko kuba’mba kechi watemenwe Liya byonka byo atemenwe nkasanji aye Lechela ne.—Ntendekelo 29:31; tubyambo twa munshi.

Yukai amba Yesu waambile’mba mwana wa bwanga wafwainwa kushikwa ne “mweo wanji” nangwa’mba bumi bwanji. Pa kwamba bino, Yesu walumbulwilenga’mba mwana wa bwanga wa kine wafwainwa kumutemwa kukila byo atemwa bumi bwanji nangwa kufwilapo inge kyakonsheka. Kya kine, kwikala mwana wa bwanga wa kwa Kilishitu mwavwangwa bintu byavula bingi. Kino kintu kechi kya kusenda na nzenzekela kwa kubula patanshi kukilangulukapo ne.

Makatazho ne kumanyikwa byo byavwangwamo mu kwikala mwana wa bwanga wa kwa Yesu. Yesu waambile’mba: “Yense ubula kusenda kichi kyanji kya lumanamo ne kundondela ne, kechi wakonsha kwikala mwanami wa bwanga ne.” (Luka 14:27) Kya kine, mwana wa bwanga wa kine wa kwa Yesu wafwainwa kwipana kunenwa mwenga byonka byo kyajinga kwi aye. Yesu waambile ne kuba’mba bakamwipaya ku balwanyi banji.

Onkao mambo, jibumba jayilenga ne Yesu jafwainwe kuyuka bintu byavwangilwemo mu kwikala baana ba bwanga ba kwa Kilishitu. Yesu wakoseshe kino kishinka kwingijisha kishimpi. Waambile’mba: “Ñanyi mwi anweba uba inge ukeba kushimika kyamba ubula kukikala panshi ne kubala mali o akengijisha kuba’mba amone kana uji na avula a kwikipwishisha? Mambo inge wabula kuba kino, wakonsha kwalatu kitendekesho ne kukankalwa kwikipwisha.” (Luka 14:28, 29) Onkao mambo, aba bayilenga ne Yesu saka bakyangye kwikala baana banji ba bwanga bafwainwe kufuukulapo na muchima yense amba bakonsha kufikizha byonse byavwangwamo. Kabiji Yesu waingijishe kishimpi kikwabo pa kukosesha kino kishinka amba:

“Ñanyi mfumu uji na bashilikale 10,000 wakonsha kuya na kulwa nkondo na mfumu mukwabo, ubula kukikala panshi ne kumona kana wakonsha kushinda mukwabo uji na bashilikale 20,000? Umvwe wakankalwa kuba bino, mukwabo byo akiji kwalepa, utumako jibumba ja bantomesha na kukeba mwa kupwaina.” Kabiji wanungilepo’mba: “Byonkabyo, yukai’mba yense ubula kusha bintu byanji byonse kechi wakonsha kwikala mwanami wa bwanga ne.”—Luka 14:31-33.

Yesu kechi waambijilengatu jibumba jamulondejilenga ne. Bonse bafunda pe Kilishitu bafwainwa kwipana kuba bintu byo aambilenga. Abino byo byafwainwe kuba jibumba jamulondejilenga ne yense ukeba kufunda pe Kilishitu. Kino kilumbulula kwinengezhezha jimo kupana kintu kyonse kyo bajinga nakyo ko kuba’mba, bintu byabo byonse kuvwangakotu ne bumi bwabo pa kuba’mba bekale baana banji ba bwanga. Kino kyo kintu kyo twafwainwa kulangulukapo ne kulombapo.

Yesu waambile kintu kimo kyafikile bingi bantu pa muchima mu Jashi janji ja pa Mutumba kimye kyo aambile’mba baana banji ba bwanga amba: “Anweba mwi mukele wa pano pa ntanda.” (Mateo 5:13) Kyamweka walumbulwilenga’mba byonkatu mukele byo alengela kintu kubula kubola, ne baana banji ba bwanga bakwasha bantu kwikala na byubilo byawama. Yesu byo ajinga pepi kupwisha mwingilo wanji, waambile’mba: “Mukele wawama. Bino umvwe mukele wasamuka, bakamutobesha na ka?” (Luka 14:34) Bantu batelekelenga bayukile kuba’mba inge mukele wavwangakana na maloba kechi bakonsha kumwingijisha ne.

Onkao mambo, Yesu wamwesheshe’mba nangwatu aba bajinga baana banji ba bwanga pa kimye kyabaya kechi bafwainwe kukooka ne. Umvwe babwelele panyuma, inge baikele ke batutu nobe mukele wasamuka. Kabiji bakonsheshe kutendeka kwibaseka ku ba pano pa ntanda. Kyakilamo kutama, inge baikele babula kufwainwa kwi Lesa ne kuleta mwenga pa jizhina janji. Yesu wakoseshe buneme bwa kuchinuzhuka bino bintu kupichila mu kwamba’mba: “Uji na matwi omvwe.”—Luka 14:35.