Waubilenga Bya Kukumya, Pano Bino, Bamukaine Ne Mu Muzhi Wa Nazala

Pa jije juba Yesu wapayankene bingi. Panyuma ya kufuma mu kibunji kya Ndekapoli, wabukile mwanamukazhi wajinga na kikola kya kupita mashi ne kusangula mwana wamukazhi wa kwa Yelusa. Abino kechi byo byonkatu byo aubile ne. Yesu byo afumine ku nzubo ya kwa Yelusa, banabalume babiji bampofu bamulondejilenga saka babijika’mba: “Anweba Mwana Davida, tubilai lusa.”—Mateo 9:27.

Byo batelele Yesu amba “Mwana Davida,” bano banabalume balumbulwilenga byo baitabijile kuba’mba Yesu ye ukaswana pa jitanda ja kwa Davida, ko kuba’mba ye Mesiasa. Nangwa byonkabyo, Yesu waubile nobe kechi watako muchima ku byo babijikilenga’mba ebakwashe ne, kampe waubile kino kukeba kwibeseka kuyuka mukoyo wabo. Bamulondejile Yesu ko aikelenga kabiji byo atwelele mu nzubo ne abo batwelele. Yesu wibashikishe’mba: “Nanchi muji na lwitabilo kuba’mba nakonsha kuba kino nyi?” Abo bakumbwile na muchima yense amba: “Ee, Nkambo.” Byo baambile bino, Yesu wibakwachile pa meso ne kwibambila’mba: “Kyubiwe monka mwayila lwitabilo lwenu.”—Mateo 9:28, 29.

Ponkapotu batatwile kumona. Byonkatu byo akambizhe bakwabo, ne abo Yesu wibakambizhe’mba kechi bafwainwe kubuulako muntu nangwa umo kyo aubile ne. Bino na mambo a lusekelo, bakumbenye mu yoya mpunzha yonse akya kyo aubile.

Bano banabalume babiji byo bafuminekotu, bantu bamuletejile mwanamulume kamaama wajinga na ndemona. Yesu wamupangilemo uno ndemona, kabiji ponkapotu uno mwanamulume watatwile kwamba. Kabiji mabumba akuminye bingi ne kwamba’mba: “Mu Isalela mukyangye kumwekapo kintu kya uno mutundu.” Kabiji Bafaliseo nabo bajinga ponka. Kechi bakonsheshe kukana bino bya kukumya ne, bino babwezhezhepo na kwamba pe Yesu ko afumishenga bulume bwa kuba bya kukumya amba: “Uno muntu upanga bandemona na bulume bwa mukulumpe wa bandemona.”—Mateo 9:33, 34.

Kechi papichile ne kimye kyabaya ne, Yesu wabwelele kwabo ku Nazala na baana banji ba bwanga. Papichile mwaka umo kufuma po afwakashijile yoya nshinagoga ne kufunjisha monka. Nangwa kya kuba kimye kitanshi bantu bakuminye pa byambo byanji byawama, palutwe kacheche bazhingijile na mambo a byo afunjishishenga kabiji basakile ne kumwipaya. Yesu waesekele jibiji kuba’mba akwashe bantu mo baikelanga kala kipikipi.

Pa juba ja Sabado watwelele mu nshinagoga na kufunjisha. Bantu bavula bamutelekelenga bakuminye bingi. Beshikishenga mulwabo amba: “Nanchi uno muntu wafunjijile kwepi ano maana ne ino mingilo ya kukumya? Nanchi kechi ye mwana kalipentala nenyi? Nanchi inanji kechi bamutela’mba Maliya, ne bankasanji kechi bo ba Yakoba, Yosefwa, Shimona ne Yudasa nenyi? Ne banyenga yanji bonse nanchi kechi tuji nabo monka muno nenyi? Nanchi kwepi uno muntu ko afunjile bino bintu byonse?”—Mateo 13:54-56.

Bantu bamwenenga Yesu amba muntutu. Balangulukile’mba, ‘Wakomejile mu meso etu. Pano wakonsha kwikala byepi Mesiasa?’ Onkao mambo, nangwa kya kuba pajinga bishiino byamwesheshenga maana anji ne bya kukumya byo aubile, bino bamukaine. Na mambo a kuyuka nkomeno yanji, balongo banji nabo bamulengulwile. Kino kyo kyalengejile ne Yesu kwamba’mba: “Ngauzhi bamunemeka ku bantu bangi kechi ku bantu ba mu muzhi mo ekala ne ku ba mu nzubo yanji ne.”—Mateo 13:57.

Kine, Yesu wakuminye bingi pa kubula lwitabilo kwabo. Onkao mambo, kuno kechi waubileko mingilo ya kukumya ne, “kanatu kutenteka maboko anji pa bantu bacheche bakolelwe ne kwibabuka.”—Mako 6:5, 6.