Ene Mambo Lonaiko O Lukeshila

Yesu waingijishe mashinda avula bingi pa kukwasha bantu kulanguluka pa bulunda bwabo ne Lesa. Kimye kikwabo, wisambile na bantu pangye ya nzubo ya Mufaliseo.

Bamo bamubuujile kintu kyatama kyamwekele. Baambile pa “mambo a bena Ngalilea [Pilato, kitumbafumu mwina Loma] bo avwangakenye mashi abo na bitapisho byabo.” (Luka 13:1) Batazhizhe muka pa kwamba bino?

Bano bena Ngalilea kampe bebepayile kimye Bayudea bavula kyo bazhingijile pa mambo a mali a ku nzubo ya Lesa Pilato o aingijishe kushimika mwakupichila mema a kuleta mu Yelusalema. Kyamweka Pilato watambwile ano mali kupichila mu kumvwañana na bantangi baingijilanga ku nzubo ya Lesa. Aba babuujilenga Yesu kino kintu kampe balangulukilenga’mba aba bena Ngalilea bebepayile na mambo a byubilo byabo byatama. Pano bino, Yesu wakaine.

Yesu wibepwizhe’mba: “Nanchi mubena kulanguluka’mba aba bena Ngalilea batamine kukila bakwabo bonse bena Ngalilea na mambo a kuba bamanamine na bino bintu nyi?” Yesu waambile’mba ine. Bino waingijishe kino kyamwekele kujimunako Bayudea amba: “Umvwe mwabula kulapila, ne anweba bakemonauna.” (Luka 13:2, 3) Yesu byo atwajijile kwamba, wavulukile kya malwa kikwabo kyamwekele, kampe nakyo kyaubiwe kimye kyo bashimikilenga mwakupichila mema. Wibashikishe’mba:

“Aba bantu 18 kyamba kya mu Shiloma bo kyaponejile ne kwibepaya, nanchi mwalanguluka’mba batamine kukila bantu bakwabo bonse bekala mu Yelusalema nyi?” (Luka 13:4) Jibumba jalangulukilenga’mba kampe bano bantu bafwile na mambo a bubi bwabo bene. Ne kino kimye Yesu kechi waswile ne. Mambo wayukile kuba’mba “bimye ne bintu bya kubula kuketekela” bimweka byakonsha kulengela bino bya malwa. (Musapwishi 9:11) Bano bantu bafwainwe kufunjilako ku kino kyamwekele. Yesu waambile’mba: “Umvwe mwabula kulapila, ne anweba bakemonauna byonkatu byo bebonawine.” (Luka 13:5) Pano mambo ka o aambijilenga luno lufunjisho pa kyokya kimye?

Wibambijile bino na mambo a mwingilo ye aingijilenga. Kepo ebelele kishimpi kya kuba’mba: “Muntu umo wabyajile kichi kya mukuyu mu bujimi bwanji bwa miñanzañanza, kabiji wayileko’mba amone kana usakutaanako bipangwa, bino kechi wibitaaineko ne. Kepo aambijile uwamisha miñanzañanza amba, ‘Ke myaka isatu yo naiyako na kukeba bipangwa ku kino kichi kya mukuyu, bino kechi nebitaanako ne. Kitemepo! Mambo ka o kibena konawinatu mushiji?’ Aye wamukumbwile’mba, ‘Nkambo, akikilekai ne uno mwaka, nkikapoye kunsa kunsa nkabikeko ne mbolezha. Umvwe kikapange bipangwa kulutwe, kikawama, bino umvwe ne kupanga ne, mukekiteme.’”—Luka 13:6-9.

Yesu waesekele bingi pa myaka isatu kukwasha kisaka kya Bayudea kuba’mba bekale na lwitabilo. Bino baana ba bwanga bachechetu bo bajinga bipangwa bya mwingilo wanji. Pano pa kikye kimye kya mwingilo wanji mu mwaka wa buna, waingijile bingi na ngovu. Kyajingatu nobe wapoyile kunsa kunsa ne kubikako mbolezha ku kichi kya mukuyu kya Bayudea kupichila mu kusapwila ne kufunjisha mu Yudea ne mu Pelia. Ñanyi bintu byawama byafuminemo? Nangwa waingijile bino, Bayudea bachechetu balapijile. Kisaka kyakaine kulapila kabiji bekyonawine.

Kubula kutako maana kwa bantu bavula kwamwekele jikwabo panyuma ya juba ja Sabado. Juba jimo, Yesu wafunjishenga mu nshinagoga pa juba ja Sabado. Amuno wamwenemo mwanamukazhi wajinga na ndemona wamulengejile kukolwa pa myaka 18 kabiji kechi waimananga ne. Na mambo a lusa, Yesu wamwambijile’mba: “Obewa mwanamukazhi, kikola kyobe kyapwa.” (Luka 13:12) Kabiji wamutentekele maboko anji, ne aye ponkapotu waolokele kabiji watatwile kutumbijika Lesa.

Kino kyazhingijishe bingi mukulumpe wa nshinagoga. Kabiji waambile’mba: “Moba atanu na jimo o a kwingijilamo mingilo; onkao mambo, mwafwainwa kwiya na kubukwa mu onka ano moba kechi pa juba ja Sabado ne.” (Luka 13:14) Uno mukulumpe wa nshinagoga wayukile bulume bwa kwa Yesu bwa kubuka, bino wazhachishe bantu na mambo a kwiya na kubukwa pa juba ja Sabado. Yesu wamukumbwile’mba: “Anweba bakamfutumfutu, ñanyi mwi anweba ubula kukasulula pa juba ja Sabado ñombe nangwa mbongolo wanji uji mu kipaka ne kumutwala na kutoma mema? Nanchi uno mwanamukazhi, mwana wa kwa Abalahama ye bakashile kwi Satana pa myaka 18, kechi kyamufwainwa kumukasulula pa juba ja Sabado nenyi?”—Luka 13:15, 16.

Byo baumvwine bino, balwanyi ba kwa Yesu baumvwine bumvu. Pano bino, jibumba jonse jasekejile bingi pa bintu byonse byo bamwene Yesu na kuba. Kepo Yesu wabwezhezhepo jibiji bishimpi bya bungauzhi bibiji byaamba pa Bufumu bwa Lesa byo aelele kimye kyo ajinga mu bwato pa Kalunga ka Ngalilea.—Mateo 13:31-33; Luka 13:18-21.