Twapewa Mambo Awama
1 Byo twashukwapo kupewa mambo awama a Lesa! (1 Tesa. 2:4) Nangwa kyakuba bamo bakana kutambwila ano mambo, bantu bakishinka beatambwila byonka byo bakeba bwema bwawama. (2 Ko. 2:14-16) Aba batambwila ne kumvwina mambo awama kilumbulula lupulukilo kwi abo. (Rom. 1:16) Pano twafwainwa kuba byepi na ano mambo awama o twapewa?
2 Yesu ne Batumwa Banji: Yesu watangizhangako kusapwila mambo awama. (Luka 4:18, 43) Nangwatu kimye kyoaumvwanga kukoka ne kumvwa nzala, butemwe boatemenwe bantu ne kunemeka mambo awama bwamulengelanga kubulako bakwabo ano mambo. (Mako 6:30-34) Kupichila mu byambo ne mu byubilo byanji, walengejile baana banji ba bwanga kuyuka buneme bwa mwingilo wa kusapwila mambo a Bufumu.—Mateo 28:18-20; Mako 13:10.
3 Byonka byaubanga Yesu, batumwa nabo basapwilanga na mukoyo mambo awama a Bufumu. Nangwatu kimye kyo bebapumine ne kwibakambizha’mba bekileke kusapwila, “kechi balekele kufunjisha ne kusapwila mambo awama” ne. (Byu. 5:40-42) Mutumwa Paulo waingijile bingi na ngovu mu uno mwingilo. (1 Ko. 15:9, 10; Kolo. 1:29) Wapashañenye mwingilo wa kusapwila mambo awama ku kikoloto kyoajinga nakyo ku bantu, kabiji wipainenga ne kusha mingilo yanji kuba’mba engile uno mwingilo.—Byu. 20:24; Loma 1:14-16.
4 Jishuko Jetu Lelo Jino: Kusanchila mwingilo wazhila wa kusapwila ye twapewa kwitulengela kumonapo mashinda a kumunungulwilamo. (Loma 15:16) Edward waikalangatu mu kakinga ka bilema waikalanga pa kibelo kya hotela na kwamba na bantu baiyangamo pa mambo a lwitabilo lwanji. Na mambo akuba wakebeshe kwingila uno mwingilo pakatampe, walengeshe kazubo kacheche koaikalangamo kobalamikile ku motoka wa kimbayambaya. Na yenka uno motoka, waendanga miseke yalepa kabiji kyamukwashishe bingi kwingila bupainiya pa myaka yavula. Byonka byajinga Edward, ne lelo jino bavula bapimpula bwikalo bwabo kuba’mba bengileko pakatampe uno mwingilo wa kusampanya mambo awama.
5 Byonka byaubanga Yesu ne batumwa banji, twayai ne atweba lelo jino tutangizhengako mwingilo wa kusapwila mu bwikalo bwetu. Umvwe ke tube bino, tumwesha butemwe bo twatemwa bantu ne lusanchilo lwetu lotusanchila mambo awama o twapewa.