Ñanyi Mwingilo Wanema Kwianweba?
1 Mabumba avula abupopweshi anemekako mwingilo wakukwasha bantu nabiji kushimika bishimikwa byakufunjilamo sukulu ne bipatela. Bakamonyi bakwa Yehoba abo banemekako mwingilo wakukwasha bantu kumupashi, bino kwakubula kuvulama “kuba byawama ne kupana bya kupana ne.”—Hebe. 13:16.
2 Byo kyaubiwanga Mumyaka Kitota-Kitanshi: Yesu waingijile mingilo yawama bingi mumwingilo wanji panopantanda, bino mwingilo wanji mukatampe wajinga wakushimuna bukine. (Luka 4:43; Yoa. 18:37; Byu. 10:38) Wibakambizhe baana banji babwanga’mba: “Yainga na kwibasambisha ba mu mikoka yonse ya bantu ... ne kwibafunjisha.” (Mat. 28:19, 20) Kabiji walumbulwile kuba’mba aba baitabila mwi aye bakengila pabaya muuno mwingilo yeatatwile. (Yoa. 14:12) Yesu wanemekele mwingilo wabusapwishi mambo wayukile’mba ukwasha bantu kufunda jishinda jalupulukilo.—Yoa. 17:3.
3 Mutumwa Paulo wamonanga mwingilo wanji wabusapwishi amba ‘waswikwa’ kumwingila kokuba’mba kemwingilo yeakonsheshe kubula kulekelela. (1 Ko. 9:16, 17) Wipaine kuba kintu kiji kyonse, kuchinchika meseko, nangwatu kumanama pakuba’mba engile mwingilo wanji. (Byu. 20:22-24) Mutumwa Petelo nebakwabo mobaingijilanga nabo baubile kintutu kimo. Nangwa kyakuba bebatailenga mutuleya nekwibatutaula, “kechi balekele kufunjisha ne kusapwila mambo awama a Yesu Kilishitu ne.”—Byu. 5:40-42.
4 Nanchi nga atweba kiji byepi? Abya tunemeka mwingilo wakushimuna mambo awama a Bufumu nekulenga baana babwanga nyi? Byonka byajinga Yesu, nanchi twibata muchima bantu ‘basubakana ne kupelelwa, pamo no mikooko yabula kafunga’ nyi? (Mat. 9:36) Bintu bibena kubiwa panopantanda nekufikizhiwa kwabungauzhi bwa mu Baibolo bibena kumweshatu patoka kuba’mba mpelo yabuno bwikalo bubi yafwenya kala kepepi! Umvwe satuvuluka buneme bwamwingilo wabusapwishi byoanema, kiketutundaikanga kusapwila nakubambakana.
5 Langulukishaipo Pabwikalo Bwenu: Bwikalo bwetu byobwalauka-alauka, kyawama bingi pakimye nekimye kulanguluka umvwe twakonsha kupimpulako bintu bimo byotuba pakuba’mba twingilenga javula mumwingilo wabusapwishi. Nyenga umo waingijilenga bupainiya bwakimye kyonse mumyaka yamuma 1950, 1960, nemuma 1970, wafuukwilepo kwikileka kwingila namambo akukolwa-kolwa. Bino pakupitapo kwakimye wakoseleko. Walangulukilepo nejikwabo pabwikalo bwanji nekufuukula kutatula mwingilo wabupainiya jibiji. Byoajingapo nalusekelo pakutanwa ku Sukulu ya Mwingilo wa Bupainiya saaji namyaka yakusemwa 90! Nga anweba? Nanchi mubena kunangijila kumyaka yakulekelamo mingilonyi, inyi yakupwishishamo sukulu wenu? Nanchi bwikalo bwenu bwakonsha kwimuswisha kwingilako bupainiya nyi?
6 Kimye Yesu kyoamwene Mata ‘watabankana na mingilo,’ wamwambijile’mba wakonshenshe kutambwila mapesho avula umvwe wabula kulabikwa nakukeba bintu byavula. (Luka 10:40-42) Mwakonsha kupeezhako bwikalo bwenu nyi? Nanchi kikebewatu’mba kana bamulume nemukazhi bonse bengila mingilo nyi? Umvwe umo peanweba waleka mingilo, nanchi kisemi kyenu kyakonsha kekimonetu bulongo bikebewa nyi? Bavula bamwenamo bingi kumupashi mukupeezhako bwikalo bwabo amba bekalengako nakimye kyakwingilako javula mumwingilo wamubujimi.
7 Twayai atweba bonse tulonde mwaingijile Yesu ne batumwa! Yehoba uketupesha pakwibikako kwakine kwakukeba kwingila javula mumwingilo wanema wakusapwila mambo awama a Bufumu.—Luka 9:57-62.