Mwingilo wa Bwina Kilishitu, ye Mwine Mwingilo Wetu Mukatampe
1 Atweba bonse tuji na mingilo yapusana pusana yo twafwainwa kuba. Kumwena ba mu nzubo yetu bibafwainwa ke mukambizho wafuma kwi Lesa. (1 Timo. 5:8) Pano bino nangwa byonkabyo, mwingilo wa mu uno mukambizho wa Lesa kechi wafwainwa kunyanchijila mwingilo wa kusapwila Bufumu ne kulenga baana ba bwanga ne.—Mat. 24:14; 28:19, 20.
2 Yesu witushijile mwa kulondela, mwa ‘kusambila kukebesha bufumu.’ (Mat. 6:33; 1 Pe. 2:21) Nangwa kyakuba kechi wajinga na bintu bya ku mubiji byavula ne, watesheshe muchima wanji kuba kyaswa muchima wa Shanji. (Luka 4:43; 9:58; Yoa. 4:34) Waingijilenga na ngovu kusapwila pa kimye kiji kyonse. (Luka 23:43; 1 Timo. 6:13) Wakambizhe baana banji ba bwanga nabo kwikala na kyonkakye kizaku mu mwingilo wa kunowa.—Mat. 9:37, 38.
3 Kulonda Yesu Lelo Jino: Twakonsha kulonda byaubile Yesu kupichila mu kwibikako kwikala bwikalo bwapela bwa kuta muchima pa mwingilo wa bwina Kilishitu. Inge tuji na bikebewa mu bwikalo, twayai tumvwine lujimuno lwa mu Baibolo lwakubula kuba monka twakebela bintu bya ino ntanda. (Mat. 6:19, 20; 1 Timo. 6:8) Byo kyawamapo kwingila na ngovu mwingilo wa kusapwila! Nangwatu twatanwa mu lukatazho, twayai twibikeko byonka byaubile Yesu, kechi twafwainwa kuleka bijikila bya mu bwikalo kunyanchijila mwingilo wetu mukatampe wa kusapwila mambo awama a Bufumu ne.—Luka 8:14; 9:59-62.
4 Nangwatu boba baji na mingilo yavula nabo bamona’mba mwingilo wa kusapwila ye mwingilo mukatampe. Mulongo umo uji na kisemi kikatampe, wingila mwingilo wa kufola mali avula kabiji mukulumpe mu kipwilo kya bwina Kilishitu waambile’mba: “Mwingilo wa bwina Kilishitu ye mwine mwingilo mukatampe konji.” Nyenga wingila mwingilo wa bupainiya waambile’mba: “Mwingilo wa bupainiya ke mwingilo wanema bingi kukilatu ne mwingilo uji yense wa ku kyalo wa kufola mali avula.”
5 Nangwatu tuji mu bwikalo bwa mutundu ka, twayayi tulonde byaubile Yesu. Mu ñanyi jishinda? Mu kutangizhako mwingilo wa bwina Kilishitu kwikala mwingilo wetu mwine mukatampe.