Kintu Kyakila mu Kunema mu Bwikalo Bwetu
1. Yesu wanemekele byepi mwingilo wa kusapwila?
1 Mwingilo wa kusapwila kyo kyajinga kintu kitanshi mu bwikalo bwa kwa Yesu. Waingilanga bingi na ngovu, kwenda miseke yalepa mu Pelisitina monse na kusapwila. Waikele bwikalo bwapela pa kuba’mba engilenga kimye kyabaya mu mwingilo. (Mat. 8:20) Jibumba byo jaesekele kumushinkila amba ebabukileko bakolwa, waambile’mba: “Nafwainwa nsapwile mambo awama a bufumu bwa Lesa ku mizhi ikwabo: mambo kyo kyo natuminwe.”—Luka 4:43.
2. Mambo ka Yesu o anemekejile mwingilo wa kusapwila?
2 Mambo ka Yesu o anemekejile mwingilo wa kusapwila? Kuzhijika jizhina ja Yehoba kyo kintu kine kyo atelepo muchima. (Mat. 6:9) Watemenwe bingi Shanji wa mwiulu, onkao mambo, wakebele kuba kyaswa muchima wanji ne kukokela mikambizho yanji yonse. (Yoa. 14:31) Kikwabo, watele bantu muchima kabiji wakebeshe kwibakwasha.—Mat. 9:36, 37.
3. Twakonsha kumwesha byepi kuba’mba twata muchima ku mwingilo wa kusapwila?
3 Ikalai Byonka Byajinga Yesu: Kuta muchima ku mwingilo wetu byonka byajinga Yesu kwakonsha kukatazha mambo mu ino ntanda muji bintu bilabikañana ne kwitujila kimye. (Mat. 24:37-39; Luka 21:34) Onkao mambo, twafwainwa kuta muchima ku bintu byawamisha, kwikala na kimye kya kunengezha ne kuya mu busapwishi. (Fili. 1:10) Twibikako kwikala bwikalo bwakubula kuvuzha bya kutabataba kabiji kechi tukizhamo kwingijisha bya panopantanda ne.—1 Ko. 7:31.
4. Mambo ka o kyanemena kutangizhako mwingilo wa kusapwila mu ano moba?
4 Umvwe kimye kyakepa, muntu wa maana utendekelapo kuba kintu kyanema. Kyakumwenako, inge wayuka’mba kubena kwiya kinkunkwila, uta muchima pa kunengezha bya kuzhikijila kisemi kyanji ne kujimunako bakinkalankulo. Mingilo yabula kunema wiisankilapo. Kinkunkwila kya Amagedonyi kyafwenya kala pepi mambo kimye kyashalako bekikepesha kala. (Zefwa. 1:14-16; 1 Ko. 7:29) Pa kuba’mba tukepulushe atweba bene ne betumvwa pamo, twafwainwa kwiketanga atweba bene ne lufunjisho lwetu pamo, kikale mu kipwilo nangwa ne. (1 Timo. 4:16) Ee kya kine, lupulukilo lwetu lwaimena pa kutangizhako mwingilo wa kusapwila mu bwikalo bwetu.