Londainga Kilishitu mu Mwingilo Wenu

¹ Yesu witupele kya kumwenako kya kulondela mu mwingilo wetu. Butemwe bwanji bukatampe bo atemwa Lesa ne bantu bwamweshiwe pa bimye byavula kabiji ne mu mashinda avula bingi. Wafunjishenga bakimote bukine kabiji ne kubila bantu bamanaminenga ne kuyanjishiwa bintu bya butemwe bubula kwaluka.—Mat. 9:35.

² Kya Kumwenako kya kwa Yesu ne Mafunjisho Anji: Yesu kechi walabikilwe na bya bumulwila ntanda nangwa na mingilo ijitu bulongo ya kukwasha bantu ne. Kabiji kechi waswishishe mingilo ikwabo yawamatu bulongo kumulabika nangwa kunyanchijila mwine mwingilo wanji wanema ne. (Luka 8:1) Watesheshetu muchima kusapwila mambo awama a Bufumu bwa Lesa mambo kyo kine kintu kikapwisha makatazho a bantu. Yesu wajinga na mwingilo mukatampe wa kuba kabiji ne kimye kya kumwingijilamo kyakepele. Bantu ba mu Kapenama byo bakebelenga’mba Yesu ekale monkamwa, waambijile baana banji ba bwanga amba: “Nanchi tuye mu mizhi yalondankana na uno, namba, nkasapwile monka; mambo o mambo o naishila.”—Mako 1:38.

³ Panyuma ya kwibafunjisha baana banji ba bwanga, Yesu wibatumine kabiji ne kwibakambizha’mba: “Kasa musapwila’mba, Bufumu bwa mwiulu bwafwenya ke pepi.” (Mat. 10:7) Wafunjishe baana banji ba bwanga kuba’mba bintu bya Bufumu byo byafwainwa kwikala kintu kikatampe mu bwikalo bwabo. (Mat. 6:33) Byambo bya kwa Yesu bya kwishajikapo na baana banji ba bwanga saka akyangye kuya mwiulu byamwesheshe bintu byo bafwainwe kuba. Waambile’mba: ‘Yainga na kwibasambisha ba mu mikoka yonse ya bantu baluke ke baana ba bwanga.’—Mat. 28:19.

⁴ Buneme bwa Bufumu: Kintu kine kikatampe Yesu kyo aambilengapo kyajinga Bufumu bwa Lesa, kabiji wakambizhe baana banji ba bwanga kulondela byo aubilenga. Mingilo ya bantu ya kukeba kupwisha makatazho kechi yakonsha kwiapwisha ne. (Yele. 10:23) Bufumu bwa Lesa bo bonkatu bukazhijika jizhina ja Lesa ne kwibamunako bantu kikupu ku makatazho o babena kupitamo. (Mat. 6:9, 10) Kufunjisha bukine bwa Bufumu ku bantu babena ‘kwikizha byefu ne kubinza na mambo a bya bunya bibena kubiwa,’ kwibakwasha kwikala bwikalo bwawama bwa lusekelo pa kino kimye kabiji ne kwikala na luketekelo lwa kine lwa bwikalo bwa mu kimye kya kulutwe.—Ezi. 9:4.

⁵ Yesu ne luno ukitangijila mwingilo wa kusapwila mambo awama a Bufumu bwa Lesa kabiji witulaya’mba ukatwajijila na kwitukwasha. (Mat. 28:20) Nanchi mwingilo wetu ubena kufikilamo kwesakana na kya kumwenako kya kwa Yesu kyo etushijile nyi? (1 Pe. 2:21) Mu ano moba akatazha apelako, twayai twingilenga papelela bulume bwetu kulondela kya kumwenako kya kwa Yesu kyo amwesheshe mu mwingilo!