Kupwila kwa Nkambi Kwitutundaikile Kwenda na Lesa

Kupwila kwa Nkambi kwa “Endainga na Lesa” byo kwabwezhezhepo jibiji byambo bya lutangijilo bya kwa Yehoba bya kuba’mba: “Jishinda jino jo mwafwainwa kuyamo”! (Isa. 30:21) Kwingijisha mafunde o twafunjile kuketukwasha ‘kutajisha bulongo byo twenda.’ (Efi. 5:15) Kabiji kulanguluka langulukapo pa byo twafunjile kuketukwasha bingi byo tubena ‘kwendela mu bukine.’—3 Yoa. 3.

Ingijishai ano mepuzho ne bishinka byo mwanembele pa kupwila kwa nkambi mu kunengezhezha jimo kwenu kwa kupwila kuba’mba mukakumbulengapo kimye kya kupituluka mu pologalamu wa kupwila kwa nkambi kwa uno mwaka. Kupitulukamo kukekalako mu Kupwila kwa Mwingilo mulungu wa October 18.

1. Enoka waendelenga byepi na Lesa nangwa kya kuba’mba waikelenga mu bimye bya malwa? (Hebe. 11:1, 5, 6; Yuda 14, 15; “Endainga na Lesa mu Bimye bya Malwa”)

2. Mu ñanyi mbaji ya bwikalo jifunde jiji mu Luka 16:10 mo jafwainwa kwingijishiwa? (“Nanchi mwi ‘Bakishinka mu Tucheche’ Nyi”?)

3. (a) Tongolai lufunjisho luna lwingila bulongo lutanwa mu byapitala 6 kufika ku 9 bya buku wa kwa Hoseya byakonsha kwitukwasha kwenda na Lesa. (Ho. 6:6, 7; 7:14; 8:7) (b) Ñanyi bishinka bikwabo biji mu Hoseya kyapitala 10 kufika ku 14 byakonsha kwitukwasha kwenda na Lesa? (“Bungauzhi bwa kwa Hoseya Bwitukwasha Kwenda na Lesa”—Jashi ja Kushilañana)

4. Ñanyi bintu banabalume ne banabakazhi bena Kilishitu byo bafwainwa kuba pa kuba’mba bakoseshe masongola abo? (Mana. 12:4; Efi. 5:29; “Kange Mwabanye ‘Akya Kyasambakanya Lesa’ Ne”)

5. Tumwesha byepi amba twanemeka kupwila kwetu kwazhila? (Sapwi. 5:1; Isa. 66:23; “Kunemeka Kupwila Kwetu Kwazhila”)

6. (a) Ñanyi mbaji isatu ya mwingilo wetu wa kusapwila yo twafwainwa kupesapesa bulongo ne kumona kuba’mba tubena kwingila bulongo? (Isa. 52:7; Zeka. 8:23; Mako 6:34) (b) Mbaji ka ya kabuku katataka ka Good News for People of All Nations (Mambo Awama a ku Bantu ba Mikoka Yonse) yo mwatana kuba’mba yawama bingi? (“Mambo Awama a ku Bantu ba Mikoka Yonse”; “Kukwasha Boba Bamba Mulaka Ungi”)

7. Twakonsha kukwasha byepi basapwishi bakatataka kwikala bakosa mu kwamba mambo a Bufumu? (Mito. 7:17; “Kukwasha Bavula Kwivwanga ne Atweba mu Mwingilo”)

8. Tumwesha byepi kushiinwa kwetu kuba’mba “juba jikatampe ja Yehoba jijitu pepi”? (Zefwa. 1:14; “Twenda mu Lwitabilo Kechi mu Kumona na Meso Ne”)

9. (a) Mambo ka o kyatamina kwituntwisha? (Mako 9:42-48) (b) Twafwainwa kuchinuzhuka byepi kwituntula? (Sala. 119:165) (c) Twafwainwa kuchinuzhuka byepi kutuntwisha bakwetu? (1 Ko. 10:24; “Chinai ‘Kuba bya Kwituntwisha’”)

10. Twafwainwa kwikala byepi ba kwesakanya bintu kimye kyo tubena kukeba mukwetu wa kutwela nanji mu masongola, mashinda a kubukilwamo ku kipatela, ne mu bya busulu? (Sala. 26:4; Mat. 6:25; 1 Timo. 6:9; “Ikalai Batekanya”)

11. (a) Ki ka kyayukanyikwa kimye Yesu kyo bamutambwijilenga ku bakwabo? (Luka 10:42; 24:32) (b) Twakonsha kumona byepi kuba’mba bisela byasangajika muchima wetu ne ya bakwetu nabo? (1 Ko. 10:31-33; “Bisela Byawama Bisangajika Muchima”)

12. Kwesakana na Masalamo kyapitala 23, ñanyi mapesho o tutambwila byo tuji mikooko ya Yehoba, kabiji ñanyi mitembo yo tuji nayo? (1 Ko. 10:21; “Yehoba Ye Kafunga Wetu”)

13. Bena Kilishitu bomvwina byepi lujimuno lwa kuba’mba “kasa mupulusha bimye”? (Efi. 5:16; “Kasa Mupulusha Bimye”)

14. (a) Bika byavwangwa mu “kimye kya kije” kyatongolwa mu Lumwekesho 14:7? (b) Tumwesha byepi amba kine twafumamo mu Babilona Mukatampe? (“‘Labainga ne Kukenketa’—Mambo Kimye Kya Kije Kyafika”) (c) Mu buloshuwa wa Labainga mukenkentenga! ñanyi bishinka byo mwatana kuba’mba byawama bingi?

15. Tongolai byubilo bisatu bikebewa pa kuba’mba tubule ‘kuleka jishinda jaoloka.’ (2 Pe. 2:15; “Jimukai Kuchina ‘Mwakaleka Jishinda Jaoloka’”)

16. Bakyanyike bakonsha kuchinuzhuka byepi “jishinda ja babi”? (Mana. 4:14; “Anweba Bakyanyike—Endainga mu Jishinda ja Bololoke”)

17. (a) Mu ñanyi mashinda Paulo mo ajinga wa kumwenako wawama wa kuchinchika? (Byu. 14:19, 20; 16:25-33) (b) Mambo ka o twafwainwa kubula kuchiina balwanyi ba bupopweshi bwa kine? (Kifwanyikizho ne jashi ja kuba’mba “Buujishainga Bantu Mambo Awama Lelo Jino Nangwa kya Kuba Bemushikwa”)

18. Ñanyi mfweto yo bamona aba benda na Lesa? (“Kwenda na Lesa Kuleta Mfweto Luno ne Myaka ne Myaka”)

Mwane kine twayai tumvwinenga ‘jiwi jiji kunyuma yetu’ kuba’mba twendenga na Shetu wa mwiulu myaka ne myaka.—Isa. 30:21; Yoa. 3:36.