Bantu Bonse Bakapuluka
1. Kwitabilwa kwetu kwi Lesa kwaimena pa ka?
1 Bupe bwa Lesa bwashinkula jishinda ja lupulukilo. Kyo kyaswa muchima wa Yehoba kuba’mba “bantu bonse bapuluke, bakayukishe bya bukine.” (1 Timo. 2:3, 4) Kwitabilwa kwetu kwi Lesa kechi kwaimena pa mutundu, bunonshi, maana nangwa pa mwekanyikilo ya pangye ne, kwaimena pa kwikala na lwitabilo mu kitapisho kya bukuzhi bwa kwa Yesu. (Yoa. 3:16, 36) Byo tuji bamwingilo umo ne Lesa, kechi twafwainwa kwikala na milanguluko ya misalululo mu michima yetu yakonsha kwitulengela kukana bantu Yehoba bo abena kukeba ne.
2, 3. Ki ka kyakonsha kwitukwasha kubula kuzhachisha bantu na mambo a mwekanyikilo yabo ya pangye ya mubiji?
2 Kuzhachishanga Bantu Ne: Yehoba umona biji mukachi ka michima ya bantu, kwakubula kuba nshiji nangwa kutala ku kilungi ne. (1 Sam. 16:7) Kabiji umona ne byo bakonsha kuba. Onkao mambo umona boba bakeba kumutokesha ku muchima’mba banema. (Hagai 2:7) Nanchi tumona bakwetu byonka Lesa byo ebamona nyi?
3 Bantu bamo bo tutana mu mwingilo bakonsha kwitulengela kukumya bingi na mambo a mwekanyikilo yabo. Bakonsha kuvwala nangwa kumwekanyika bingibingitu, na myevu yavwatakana, nangwa kuvwala masikiyo ku mivumbo nangwa ku myona. Bamo nabo bakonsha kwikala bakapitemo babula pa kwikala. Bakwabo nabo bakonsha kwitushintaukila. Mu kifulo kya kulanguluka’mba bantu ba uno mutundu kechi bakonsha kwikala bapopweshi ba Yehoba ne, twafwainwa kwikala na ndangulukilo yawama, “mambo ne atweba netuwa kala twajinga bakosama, ba milengulwila, [kabiji] bajimbaikwa.” (Titu. 3:3) Umvwe twayuka kino, tukakebeshanga kusapwila ku uji yense, kubikapotu ne boba bamweka nobe kechi banema na mambo a mwekanyikilo yabo ne.
4, 5. Tufunjilako ka ku kya kumwenako kya kwa Yesu ne Paulo?
4 Bya Kumwenako bya mu Myaka Kitota Kitanshi: Yesu Kilishitu waikalangako na kimye kya kukwasha bantu bamwekelenga nobe kuba baikala bapopweshi ba Yehoba ne. (Luka 8:26-39) Nangwa kya kuba kechi waitabizhanga byubilo byatama ne, wayukile’mba bantu bakonsha kwitumpa mu byubilo byabula kufwainwa. (Luka 7:37, 38, 44-48) Onkao mambo, wibomvwishishenga, ‘kwibobila lusa, mambo baji pamo no mikooko yabula kafunga.’ (Mako 6:34) Nanchi twakonsha kulonda pakatampe kya kumwenako kyanji nyi?
5 Mutumwa Paulo bamwashile mabwe, ku mupuma, kabiji ne kumutaya pa kaleya. (Byubilo 14:19; 16:22, 23) Nanchi kumanyikwa kwa uno mutundu kwamulengejile kuzhingila ne kulanguluka’mba watayilengatu kimye kyanji kusapwila ku byobya bisaka ne mishobo imo nyi? Ine. Wayukile’mba bantu ba michima ya kishinka bakonsha kutanwa mukachi ka mishobo yonse, kabiji wakebeshetu kwibatana. Nanchi bino byobyo tumona boba baji mu nyaunda yetu bafuma mu bwikalo ne bisho byapusana pusana nyi?
6. Byubilo byetu byakonsha kubapo byepi pa bantu bakatataka beya ku kupwila kwa kipwilo?
6 Kutambwila Bakwetu Lelo Jino: Bantu ba Lesa bavula baji bingi na lusekelo na mambo a kwibatambwila mu kipwilo ku balongo ne banyenga babujile kuta maana ku mwekanyikilo yabo ya pangye yo bamwekanyikilangamo. Mu Germany, pa Nzubo ya Bufumu imo paishile mwanamulume wajinga na myevu yavwatakana ne nsuki yalepa kabiji yazakalala saka avwala ne bivwalo bya ndochi. Kabiji kechi watelwanga bulongo ne. Nangwa byonkabyo, bamutambwijile bingi bulongo pa kupwila. Kino kyamusangajikile bingi kabiji wabweleleko ne mulungu walondejilepo. Pa kupitapo moba acheche, wiwamishishe bulongo, walekele kupepa fwanka, kabiji ne kunembesha masongola anji. Byo papichiletu moba acheche, aye, mukazhanji ne baana banji batendekele kwingijila Yehoba saka bakwatankana kisemi kyonse.
7. Twakonsha kulonda byepi Lesa wetu ubula kutala ku bilungi?
7 Mu kulonda Lesa wetu ubula kutala ku bilungi, twayai twite bantu bonse kwiya na kumwenamo mu bupe bwanji.
[Mabulañano pa peja 3]
“Lesa kechi utala ku bilungi bya bantu ne: pakuba ne mu mikoka yonse ya bantu, aye wamwakamwa, ne kuba byaoloka, ye waitabilwa kwi aye.”—Byubilo 10:34, 35.