Mu Kwikala Balaba Mufuma Byawama

NANCHI mwikala balaba ne kumonapo bimye bya kushukilwa mu nyaunda ya kipwilo kyenu kuba’mba musapwilenga nyi? Balongo betu bena Kilishitu bekala mu muzhi wa Turku waikela ku kitulu mu Finland, bamwenepo bimye bya kusapwila, kabiji mu kwikala balaba mwafumine byawama.

Myaka ya kunyuma kwe, balongo ba mu Turku bamwene kuba’mba kuji jibumba ja banabalume ba ku Asia baishile mu yewa muzhi na kwingila mwingilo wa kufiika bwato bukatampe bwa kufwakeshamo bwajinga ku mpunzha ko balamina mato. Palutwe kacheche, mulongo wayukile ku mazubo kwafikijile boba ba mingilo. Kabiji wayukile ne kuba’mba kimye kya lukelo, ba mingilo bebasendanga na masakya kufuma ku mazubo kufikila benyi kwibatwala ku kitulu. Ponkapotu wabujile balongo ba mu kipwilo kyamba mulaka wa Kizungu monka mu Turku.

Bakulumpe mu kyokya kipwilo bayukile kuba’mba bano bantu baishile kufuma mu byalo bingi bafwainwe kwibasapwila mambo a Bufumu, kabiji banengezhezhe bukiji bukiji mashinda a kwibasapwilamo. Pa Mulungu mu yenkawa mulungu, basapwishi jikumi bapwijile kwipi na kiteshenyi kya masakya na kimye kya 7 koloko wa lukelo. Patanshi, kechi kwakishilepo wa mwingilo nangwa umo ne. Balongo bazhinaukilenga amba: ‘Kana twakelwa nyi? Inyi kana bafuma kala mu uno muzhi wa Turku?’ Mobakyambijilenga bino, wa mwingilo umo wavwajile ovoloshi waishile pa yonkaya mpunzha. Wa mwingilo mukwabo naye waishile, kabiji ne bakwabotu bavula bafikile. Kwakubula nangwa kupitapo kimye kyabaya ne, ba mingilo bavula bakonkene kwipi na kiteshenyi kya masakya. Basapwishi batendekele kwibasapwila bano ba mingilo na mabuku a mu mulaka wa Kizungu. Kya lusekelo ke kya kuba amba, papichile jiola jimo pa kuba’mba aba ba mingilo bonse bamone pa kwikala mu masakya, kabiji kino kyalengejile balongo kwikala na kimye kya kwisamba na bavula. Masakya byo atendekeleko kwenda, ba mingilo saka bebapa kala mabuloshuwa 126 ne magazini 329!

Buno busapwishi bwawamine bwalengejile balongo kunengezha jibiji kusapwila mulungu walondejilepo, kimye kibafwakashijile kalama wa mwanzo. Juba jimo byo kwanokelenga mvula, na kimye kya 06:30 wa lukelo, kalama wa mwanzo watangijile kupwila kwa kuya mu mwingilo wa mu bujimi, kabiji basapwishi 24 bayile ku kiteshenyi kya masakya. Pa kikye kimye basendele ne mabuku a mu mulaka wa Tagalog, mambo bamwene kuba’mba aba benyi bavula bafumine ku Philippines. Alwa lukelo, masakya byo ayile ku kitulu, ba mingilo bebapele mabuku 7, mabuloshuwa 69, ne magazini 479. Akilangulukai lusekelo lo bajinga nalo balongo ne banyenga baingijileko uno mwingilo!

Bano ba mingilo saka bakyangye kubwelamo ku byalo byabo, bavula bebafwakashijile ku balongo ku mazubo kufikila benyi ne kulondolola bulongo mambo a Bufumu. Ba mingilo bamo baambile amba bebasolomokapo kala ku Bakamonyi mu mapunzha akwabo mwaya ntanda. Bano ba mingilo basanchile bingi ku balongo pa byo bebikileko kwisamba nabo kimye kyo baikelenga mu Finland.

Nanchi ne anweba mwikala balaba ne kumonapo bimye bya kushukilwa mu nyaunda ya kipwilo kyenu nyi? Nanchi mwitendekelako kuya na kwisamba na bantu bafuma mu bisho byapusana pusana nyi? Umvwe byo byo muba, ko kuba’mba ne anweba kampe mwakikalapo kala na lusekelo lwajingapo na boba balongo betu ba ku Turku.

[Maapu/Kipikichala pa peja 32]

(Umvwe mukeba bine byambo, monai mu buku)

FINLAND

HELSINKI

Turku

STX Europe