Mpopwelo yo Akeba Lesa

1. Tukamwenamo byepi umvwe ke tupopwele Lesa mu jishinda jawama?

YEHOBA LESA witutemwa bingi kabiji ukeba’mba tumwenemo mu lutangijilo lwanji lwa butemwe. Umvwe ke tumwingijile mu jishinda jawama, tukekala balusekelo kabiji tukachinuzhuka makatazho avula mu bwikalo bwetu. Kabiji uketupesha ne kwitukwasha. (Isaya 48:17) Nangwa byonkabyo, kuji bupopweshi bwavula bingi bwamba’mba bufunjisha bukine pe Lesa. Pano bino, bwapusana bingi mu mfunjishisho yabo pe Lesa byo aji ne byo akeba’mba tube.

2. Twakonsha kufunda byepi jishinda jawama kupopwelamo Yehoba, kabiji kya kumwenako ka kitukwasha kumvwisha kino?

² Mwakonsha kuyuka byepi jishinda jawama kupopwelamo Yehoba? Kechi kikebewa’mba mufunde ne kwesakanya mafunjisho a bupopweshi bonse ne. Kikebewatu kufunda Baibolo kine byo afunjisha pa mambo a mpopwelo ya kine. Kya kumwenako: Mu byalo byavula muji lukatazho lwa mali a bubela. Umvwe bemupele mwingilo wa kuyuka ano mali a bubela, mwakonsha kwiayuka byepi? Kupichila mu kulabijila jali jiji jonse ja ano mali a bubela nyi? Ine. Kyakonsha kwimukwasha umvwe mwayuka mali a kine byo aji. Panyuma ya kuyuka bimweka mali a kine, mwakonsha kuyuka ne mali a bubela byo aji. Mu jishinda jimotu, umvwe twafunda bya kuyuka bupopweshi bwa kine, twakonsha kuyuka ne bupopweshi bwa bubela.

3. Kwesakana na byaambile Yesu, twafwainwa kuba ka umvwe tukeba kwitabilwa kwi Lesa?

³ Kyanema bingi kuba’mba tupopwelenga Yehoba mu jishinda jo akeba. Bantu bavula baitabila’mba bupopweshi bonse butokesha Lesa pa muchima, bino Baibolo kechi byobyo afunjisha ne. Muntu kechi wafwainwa kwambatu’mba ne mwina Kilishitu ne. Yesu waambile’mba: “Kechi bonse bañambila’mba, Nkambo! Nkambo! bakatwela mu bufumu bwa mwiulu ne; poso awa uba kyaswa muchima wa Tata wa mwiulu.” Onkao mambo, pa kuba’mba twitabilwe kwi Lesa, twafwainwa kuyuka Lesa byo akeba’mba tube, apa bino ne kwibyuba. Yesu watelele boba babula kuba kyaswa muchima wa Lesa amba “ba kuba bibi.” (Mateo 7:21-23) Byonka biji mali a bubela, bupopweshi bwa bubela ke bwatutu. Kabiji kyakilamo ne kutama, buno bupopweshi bonaunañana.

4. Byambo bya kwa Yesu bya pa mashinda abiji byatala mwepi, kabiji jishinda jimo jimo jitangijila kwepi?

⁴ Yehoba upana jishuko ku uji yense panopantanda ja kutambula bumi bwa myaka. Nangwa byonkabyo, pa kuba’mba tukekale na bumi bwa myaka mu Paladisa, twafwainwa kupopwela Lesa bulongo ne kwikela mu jishinda jo akeba. Kya bulandatu ke kya kuba’mba, bavula bakana kuba kino. O ene mambo Yesu o aambijile’mba: “Twelai pa kibelo kyakepa: mambo kibelo kyabaya ne jishinda japela kwendamo biya ku lonaiko, ne batwelamo bo bavula. Mambo kibelo kyakepa ne jishinda jakatazha biya ku bumi, kabiji bebimona bo bacheche.” (Mateo 7:13, 14) Bupopweshi bwa kine butangijila ku bumi bwa myaka. Bupopweshi bwa bubela butangijila ku lonaiko. Yehoba kechi ukebapotu nangwa muntu umo konaika ne, kabiji o ene mambo o abena kupela bantu konse konse jishuko ja kufunda pe aye. (2 Petelo 3:9) Onkao mambo, jishinda jo tumupopwelamo Lesa jilumbulula bumi nangwa lufu kwi atweba.

BYO TWAFWAINWA KUYUKA BUPOPWESHI BWA KINE

5. Twakonsha kuyuka byepi boba baji mu bupopweshi bwa kine?

⁵ Nga ‘jishinda jaya ku bumi’ jakonsha kutanyiwa byepi? Yesu waambile’mba bupopweshi bwa kine bukayukanyikilwa mu bwikalo bwa bantu bayamo. Waambile’mba: ‘Mukebayukila ku bipangwa byabo, bichi byonse byawama bipanga bipangwa byawama.’ (Mateo 7:16, 17) Mu ñambilo ikwabo, aba baji mu bupopweshi bwa kine bayukanyikilwa ku lwitabilo lwabo ne ku byubilo byabo. Nangwa kya kuba bambulwakoloka kabiji boba bilubo, bapopweshi ba kine bonse pamo bakeba kuba kyaswa muchima wa Lesa. Twayai twisambe pa mbaji itanu na imo ya kuyukilako boba baji mu bupopweshi bwa kine.

6, 7. Bakalume ba Lesa bamona byepi Baibolo, kabiji Yesu wapaine byepi kya kumwenako mu luno lubaji?

⁶ Bakalume ba Lesa bafunjisha mafunjisho aimena pa Baibolo. Baibolo aye mwine waamba’mba: “Binembelo byonse byanembeshiwa kwi Lesa, kabiji byo byawamina mu kwibafunjisha bantu, ne mu kwibalengulula ne mu kwibolola, ne mu kwibafunda mu bololoke: amba muntu wa Lesa ekale walumbuluka, wawaina byonse bya kwingilako mingilo yonse yawama.” (2 Timoti 3:16, 17) Ku bena Kilishitu bakwabo, mutumwa Paulo wanembele’mba: “Byo mwatambwile mambo o mwaumvwine kuji atweba, o mambo a Lesa, mwiatambwile kechi nobe mambo a bantu ne, poso byonka byo aji kine, mambo a Lesa, o engila kabiji mwi anweba baitabila.” (1 Tesalonika 2:13) Onkao mambo, lwitabilo ne byubilo bya bupopweshi bwa kine kechi byaimena pa milanguluko ne pa bisho bya bantu ne. Bifuma mu Baibolo, Mambo a Lesa anembeshiwa na mupashi.

⁷ Yesu Kilishitu wapaine kya kumwenako kyawama kya kufunjisha mafunjisho a mu Mambo a Lesa. Mu lulombelo kwi Shanji wa mwiulu, waambile’mba: “Mambo enu bo bukine.” (Yoano 17:17) Yesu waitabijile mu Mambo a Lesa, kabiji byonse byo afunjishanga byakwatankananga pamo na Binembelo. Yesu waambanga javula amba: “Kyanembwa’mba.” (Mateo 4:4, 7, 10) Apa bino wabwela waamba byambo biji pa kinembelo. Ne bantu ba Lesa lelo jino nabo kechi bafunjisha milanguluko yabo bene ne. Baketekela’mba Baibolo o Mambo a Lesa, kabiji mo mufuma ne mafunjisho abo.

8. Kupopwela Yehoba kwavwangamo ka?

⁸ Aba baji mu bupopweshi bwa kine bapopwelatu Yehoba yenka ne kuyukanyikisha jizhina janji. Yesu waambile’mba: “Kyanembwa’mba, Ukamupopwela Nkambo Lesa wobe ne kumwingijila aye yenka.” (Mateo 4:10) Mu jino jishinda, bakalume ba Lesa bapopwelatu Yehoba yenka kwapwa. Ino mpopwelo yavwangamo ne kubulako bantu kuba’mba bayuke jizhina ja Lesa wa kine ne byo aji. Masalamo 83:18 aamba’mba: “Anweba yenka, wa jizhina ja Yehoba, Yenu Mwine Wakila wa panopantanda ponse.” Yesu wapaine kya kumwenako mu kukwasha bantu kuyuka Lesa, byonka byo aambile mu lulombelo amba: “Namwesheshe jizhina jenu kwi aba bantu bo mwampele mu ba panopantanda.” (Yoano 17:6) Mu jishinda jintutu jimo, bapopweshi ba kine lelo jino bafunjisha bantu pa mambo a jizhina ja Lesa, nkebelo yanji, ne byubilo byanji.

9, 10. Mu ñanyi mashinda bena Kilishitu bakine mo beubila butemwe bene na bene?

⁹ Bantu ba Lesa bamwesha butemwe bwa kine bwa kwitemwa abo bene na bene. Yesu waambile’mba: ‘Pa kyo kino po po bakayukila bonse amba anweba mwi baana bami ba bwanga, inge mwitemwe anwe bene na bene.’ (Yoano 13:35) Bena Kilishitu batanshi betemenwe bene na bene. Butemwe bwaimena pa mafunde a Lesa kechi busalulula bantu na mambo a mitundu, bwikalo, nangwa byalo mo bafuma ne. Bupwanya bantu pamo mu mfungwa imo ya bwanabwankazhi bwa kine. (Kolose 3:14) Bantu ba mu bupopweshi bwa bubela kechi baji na buno bwanabwankazhi bwa butemwe ne. Twayuka byepi kino? Beipaya bene na bene na mambo a kupusana kwa byalo mobekala nangwa mitundu yabo. Bena Kilishitu bakine kechi batola bilwilo ne kwipaya balongo babo bena Kilishitu nangwa bantutu bakwabo ne. Baibolo waamba’mba: ‘Monka muno mo bamwekela baana ba Lesa, ne baana ba Diabola: bonse babula kuba bololoke kechi bo ba kwa Lesa ne, nangwa aye wabula kutemwa mulongo wanji ne. . . . Tutemwañane atwe bene na bene: Kechi pamo ne aye Kaina ne, waji wa kwa yewa mubi, waipayile mulongo wanji.’—1 Yoano 3:10-12; 4:20, 21.

¹⁰ Butemwe bwa kine kechi kuchinuzhukatu kwipaya bantu konka ne. Bena Kilishitu bakine bengijisha kimye kyabo, bulume bwabo, ne bintu byabo kukwasha bakwabo ne kwitundaika bene na bene. (Bahebelu 10:24, 25) Bekwasha bene na bene mu bimye bya malwa, kabiji beingijila bene na bene mu bukishinka. Mu bwikalo bwabo bengijisha jifunde ja mu Baibolo ja ‘kubila bantu bonse byawama.’—Ngalatiya 6:10.

11. Mambo ka o kyanemena kumwitaba Yesu Kilishitu amba ye jishinda ja lupulukilo Lesa jo engijisha kwitupulwishamo?

¹¹ Bena Kilishitu bakine bayuka’mba Yesu Kilishitu ye jishinda ja lupulukilo Lesa jo engijisha kwitupulwishamo. Baibolo waamba’mba: “Lupulukilo kechi luji mu mukwabo nangwa umo ne: pakuba kechi paji jizhina jikwabo muno munshi, japewa mu bantu, jo twafwainwa kupulukilamo ne.” (Byubilo 4:12) Byonka byo twamwene mu Kitango 5, Yesu wapaine bumi bwanji kwikala kya kukuula bantu balukokelo. (Mateo 20:28) Kabiji Yesu ye Mfumu watongolwa na Lesa wa mu Bufumu bwa mwiulu bukalama ntanda yonse. Lesa ukeba ne kuba’mba tukokelenga Yesu ne kwingijisha mafunjisho anji umvwe tukeba bumi bwa myaka. O ene mambo Baibolo o aambila’mba: “Aye wamwitabila Mwana ye uji na bumi bwa myaka; pakuba aye ubula kukokela Mwana kechi akamone bumi ne.”—Yoano 3:36.

12. Kubula kwikala ba panopantanda kulumbulula ka?

¹² Bapopweshi ba kine kechi ba panopantanda ne. Byo bamutotolweshenga kwi Pilato ndamakyalo wa bena Loma, Yesu waambile’mba: “Bufumu bwami kechi bwa panopantanda ne.” (Yoano 18:36) Kikale baji mu kyalo kyepi nangwa kyepi, baana ba bwanga bakine ba kwa Yesu ke bangikazhi ba mu Bufumu bwanji bwa mwiulu ne mu jojo jishinda kechi betumpa mu bya bumulwila ntanda ne. Kechi bevwangamo mu mitotololo ya ino ntanda ne. Pano bino, bapopweshi ba Yehoba kechi bakanya bakwabo umvwe ke bakebe kutwela mu bipanyi bya bumulwila ntanda, kwimana mu bya bunsaji, nangwa kuvota ne. Nangwa kya kuba bapopweshi ba Lesa kechi bevwanga mu bya bumulwila ntanda ne, balondela bingi mizhilo. Mambo ka? Mambo Mambo a Lesa ebakambizha ‘kunekenena bakulumpe’ ba mu makafulumende “balama kyalo.” (Loma 13:1) Umvwe paikala kulwañana pakachi ka bikeba Lesa ne bikeba bamulwila ntanda, bapopweshi ba kine balondela kya kumwenako kya batumwa baambile’mba: “Twafwainwa kukokela Lesa kukila bantu.”—Byubilo 5:29; Mako 12:17.

13. Baana ba bwanga bakine ba kwa Yesu bamona byepi Bufumu bwa Lesa, kabiji bobapo ka?

¹³ Baana ba bwanga bakine ba kwa Yesu basapwila’mba bantu bafwainwa kuketekelatu mu Bufumu bwa Lesa. Yesu waambijile jimo amba: “Ano mambo awama a bufumu akasapwilwa panopantanda ponse mwa kwibashimwina ba mu mikoka yonse ya bantu; bino ke ku mpelo.” (Mateo 24:14) Mu kifulo kya kutundaika bantu amba baketekele mu bakalama ba bumuntu kwibapwishisha makatazho abo, baana ba bwanga bakine ba kwa Yesu Kilishitu bataya mbila ya Bufumu bwa Lesa bwa mwiulu amba bo bonkatu bwafwainwa kupwisha makatazho a bantu. (Masalamo 146:3) Yesu witufunjishe kulombela uno kafulumende walumbuluka byo aambile’mba: “Bufumu bwenu bufike. Kyaswa muchima wenu kyubiwe pano panshi, byonka byo kyubiwa mwiulu.” (Mateo 6:10) Mambo a Lesa aambijile jimo amba buno Bufumu bwa mwiulu “bukalalaula buno bufumu bonse [bujipo luno] ne kwibupwishatu shata! pakuba abo bukekala myaka ne myaka.”—Danyela 2:44.

14. Ñanyi jibumba ja bupopweshi jo mwaketekela’mba jifikizha bintu bikebewa bya bupopweshi bwa kine?

¹⁴ Kwesakana na byo twisambapo kala, iipuzhai anweba bene amba: ‘Ñanyi jibumba ja bupopweshi jifunjisha byonse bya mu Baibolo ne kuyukanyikisha jizhina ja Yehoba? Ñanyi jibumba jimwesha butemwe monka mwakambizhila Yehoba, jiji na lwitabilo mwi Yesu, jabula ja panopantanda, kabiji jitaya mbila ya kuba’mba Bufumu bwa Lesa bo bonkatu bantu bo bafwainwa kuketekela? Pa bupopweshi bonse panopantanda, bwepi bufikizha bino bintu byonse bikebewa?’ Bishinka bimwesha patokatu to amba Bakamonyi ba kwa Yehoba.—Isaya 43:10-12.

MUSAKUBAPO KA?

15. Kununga pa kwitabila’mba ko aji, bintu ka bikwabo Lesa byo akeba?

¹⁵ Kwitabilatu mwi Lesa kechi ko konkatu kumutokesha pa muchima ne. Baibolo wamba’mba ne bademona baitabila mwi Lesa amba ko aji. (Yakoba 2:19) Bino kechi boba kyaswa muchima wa Lesa ne, kabiji kechi baitabilwa kwi aye ne. Pa kuba’mba twitabilwe kwi Lesa, kechi twafwainwa kwitabilatu amba ko aji ne, bino twafwainwa ne kuba kyaswa muchima wanji. Kabiji twafwainwa kufumamo mu bupopweshi bwa bubela ne kwiya mu bupopweshi bwa kine.

16. Ki ka muntu kyo afwainwa kuba pa mambo a kwikalamo na lubaji mu bupopweshi bwa bubela?

¹⁶ Mutumwa Paulo waambile’mba kechi twafwainwa kwikalamo na lubaji mu bupopweshi bwa bubela ne. Wanembele’mba: “Fumai mwi abo ne kwabana nabo, byo byamba Nkambo, Ne kukwatako ku kyabipa nangwa kimo ne; Ne amiwa nkemutambula.” (2 Kolinda 6:17; Isaya 52:11) Onkao mambo, bena Kilishitu bakine bachinuzhuka kiji kyonse kyakwatankana na bupopweshi bwa bubela.

17, 18. “Babilona Mukatampe” ye mu ka, kabiji mambo ka o kibena kukebewa ‘kulupukamo bukiji bukiji mwi aye’?

¹⁷ Baibolo waamba’mba bupopweshi bonse bwa bubela buji ku lubaji lwa “Babilona Mukatampe.”a (Lumwekesho 17:5) Jino jizhina jituvululako muzhi wa kala wa Babilona, mwatendekejile bupopweshi bwa bubela panyuma ya Muyulo wa mu moba a Nowa. Mafunjisho avula ne byubilo byakumbana mu bupopweshi bwa bubela byatendekele kala kene mu Babilona. Kya kumwenako, bena Babilona bapopwelanga balesa basatu. Lelo jino Balesa basatu lo lufunjisho lwine lukatampe mu bupopweshi bwavula. Bino Baibolo ufunjisha patokatu to amba kujitu Lesa umo wa kine aye Yehoba, ne kuba’mba Yesu Kilishitu ke Mwananji. (Yoano 17:3) Kabiji bena Babilona baitabijile’mba bantu baji na mweo ubula kufwa ulupuka mu muntu umvwe mubiji wafwa kabiji wakonsha kuyanjishiwa ku mpunzha ya lumanamo. Lelo jino, bupopweshi bwavula bufunjisha lwitabilo lwa kuba’mba mweo nangwa’mba mupashi wa muntu kechi ufwa ne, kabiji wakonsha kumanyikwa mu mujilo wa helo.

¹⁸ Mpopwelo ya bena Babilona ba kala byo yakumbene konse konse panopantanda, Babilona Mukatampe wa ano moba wakonsha kutelwa’mba bufumu bwa ntanda yonse bwa bupopweshi bwa bubela. Kabiji Lesa waambijile jimo amba buno bufumu bwa bupopweshi bwa bubela bukonaunwa kya kubazhimukilatu. (Lumwekesho 18:8) Nanchi mwamona ene mambo o kyanemena kuba’mba mwipatuleko ku lubaji luji lonse lwa Babilona Mukatampe nyi? Yehoba Lesa ukeba anweba’mba ‘mulupukemo mwi aye’ bukiji bukiji kimye byo kikiji konka.—Lumwekesho 18:4.

19. Ki ka kyo mukamwenamo mu kwingijila Yehoba?

¹⁹ Umvwe mwafumamo mu bupopweshi bwa bubela, bamo bakonsha kuleka kupwanañana nenu. Nangwa byonkabyo, umvwe ke mwingijile Yehoba pamo na bantu banji, mukekala na byavula kukila ne byo mwakonsha kuleka. Byonka byajinga baana ba bwanga batanshi ba kwa Yesu bashile bintu bimo kuba’mba bamulondele, ne anweba mukekala na balongo ne banyenga bavula bingi ba ku mupashi. Mukekala lubaji lwa kisemi kikatampe kya ntanda yonse kya bena Kilishitu bakine bavula bemutemwa kya kine. Kabiji mukekala na luketekelo lwakilamo kuwama lwa bumi bwa myaka “mu myaka ikeya.” (Mako 10:28-30) Kampe mu kuya kwa moba, aba bemukaine na mambo a lwitabilo lwenu bakamona bifunjisha Baibolo ne kwikala bapopweshi ba Yehoba.

20. Kimye kya kulutwe kikekala byepi ku boba baji mu bupopweshi bwa kine?

²⁰ Baibolo ufunjisha’mba Lesa katatakatu akalete mpelo ya buno bwikalo ne kupingizhapo ntanda ipya ya bololoke ikalamwanga na Bufumu bwanji. (2 Petelo 3:9, 13) Ino ntanda byo ikawamapo! Kabiji mu yoya ntanda ipya ya bololoke, mukekalatu bupopweshi bumo, mpopwelo imo ya kine. Nanchi kechi kyawama anweba kwiya na kupwanañena pamo na bapopweshi ba kine lonka luno ne nyi?