Ingijishainga Matalakiti pa Kusampanya Mambo Awama
1 Bakamonyi ba kwa Yehoba baingijisha matalakiti pa kimye kyabaya bingi pa kuba’mba basampanye mambo awama. Mu 1880, C. T. Russell ne balunda nanji batendekele kulupula Matalakiti a Bafunda Baibolo, (Bible Students’ Tracts) kabiji bapanga basapwishi batanganga kyamba kya usopa pa kuba’mba beasampanye ku bantu. Bantu beakebelenga bingi matalakiti kya kuba mu 1884, C. T. Russell wanembeshele jino jibumba kuba’mba kechi juba busulu ne, pa kuba’mba batwale mwingilo wa bufumu palutwe. Kyambo kya “talakiti” bekivwangile pa jizhina ja Zion’s Watch Tower Tract Society, aluno jobatongola amba Watch Tower Bible and Tract Society of Pennsylvania. Byo kyafikile mu 1918, bafunda Baibolo basampenye matalakiti kukila pa 300 milyonyi. Matalakiti ne lunotu ke kingijisho kyawama bingi mu mwingilo wa kusapwila.
2 Ene Mambo Matalakiti kyo Awamina: Matalakiti azakula bingi bantu muchima. Byambo bitanyiwamo bisangajika bingi ne kukwashañana. Kabiji engila bingi bulongo ku bena nzubo bamo bakana kutambula magazini nangwa buku. Bena nzubo bakana kutambula magazini nangwa mabuku baswa kutambula matalakiti. Matalakiti apela kushila bantu, nangwatu basapwishi bakatataka ne baana nabo bakonsha kusha. Kunungapo, matalakiti apela kusenda nangwatu mu maboko.
3 Bavula bafunda bukine kupichila mu matalakiti. Kyakumwenako, mwanamukazhi umo mu kyalo kya Haiti wamwene talakiti mu mukwakwa. Wiitolele ne kutendeka kutanga, kabiji wabijikile amba “Natana bukine!” Panyuma ya bino, waile ku Nzubo ya Bufumu, watendekele kufunda Baibolo ne kubatizhiwa. Kyalengejile ke na mambo a bulume bwa Mambo a Lesa ajinga mu talakiti.
4 Ku Nzubo ku Nzubo: Byokiji kuba’mba matalakiti engila bingi bulongo mu mwingilo wa kusapwila, tukeengijishanga bingi kutendeka mu November. Kikonkwanyi kyetu kechi kya kushilatu bantu matalakiti ne, ke kutatwilamo mwisambo. Umvwe bamwesha lusekelo pa kimye kitanshi kyo twisamba nabo nangwa kimye kyo twabwelako, twafwainwa kwibabula byotufunda Baibolo kwingijisha buku wa Baibolo Ufunjisha nangwa buku mukwabo. Twakonsha kushila byepi bantu matalakiti kimye kyo tubena kwingila busapwishi bwa ku nzubo ku nzubo? Matalakiti aenda kupusana pusana, onkao mambo twafwainwa kupitulukamo bulongo mu o tubena kushila bantu.
5 Jishinda ja kwisambilamo na bantu jafwainwa kwesakana na biji nyaunda ne talakiti ye tubena kusha. Twakonsha kutendeka mwisambo kupichila mu kupa mwina nzubo talakiti. Mwekanyikilo ya talakiti yakonsha kuzakula muchima wa muntu. Nangwa twakonsha kumwesha mwina nzubo matalakiti apusana pusana ne kumwambila kusalapo yo atemwa. Umvwe tubena kwingijila mu nyaunda muji bantu babula kukeba kulupuka mu nzubo, twafwainwa kukwata talakiti mu maboko pa kuba’mba mwina nzubo amone byoaji, nangwa kumulomba kumukujila talakiti kunshi ya kinzhilo ne kumvwa milanguluko yanji. Umvwe mutwe wa talakiti uji mu bwipuzho, mwafwainwa kwingijisha bonkabo bwipuzho ne kumuleka wakumbula. Nangwa twakonsha kwilengela bwipuzho bwakonsha kulengela muntu kwikala na kizaku kya kukeba kufunda. Mwakonsha kutanga na mwina nzubo byambo byakwatankana na mutwe wa talakiti apa bino mwa mwipuzhai bwipuzho ne kuleka wakumbula. Binembelo byakwatankana na kishinka kyo mubena kwisambapo mwakonsha kwibitanga. Panyuma ya kwisamba na mwina nzubo, twakonsha kulayañana kukabwelako. Umvwe kipwilo kisha matalakiti pa mazubo pabula bantu, twakonsha kwiabika pa mpunzha pakonsha kubula kwiamona ku bantu bangi.
6 Busapwishi bwa mu Mukwakwa: Abya mwakingijishapo kala matalakiti kimye kyo mwingila busapwishi bwa mu mukwakwa nyi? Bantu bamo botusambakana mu mukwakwa bekala bapayankana bingi kya kuba kechi baswa kwisamba nabo ne. Kyakonsha kukatazha bingi kuyuka inge babena kukeba kufunda bukine. Kyawama kwibapa talakiti kukila kwibapa magazini akatataka, mambo kechi twayuka kana basakwiatanga nangwa ne. Na mambo abyo abena kumweka talakiti ne byambo bijimo byakepa, wakonsha kulengela bantu kukeba kutanga nangwa kya kuba bapayankana. Umvwe kya kuba kechi bapayankana ne, twakonsha kwisambako nabo byambo biji mu talakiti.
7 Busapwishi bwa Kushukilwa: Kyapela bingi kwingila busapwishi bwa kushukilwa na matalakiti. Mulongo umo usenda matalakiti mu fwangalito kimye kyo abena kuya kuji konse. Umvwe wasambakana muntu uji yense nabiji kalaliki wa mushitolo, umwipuzha ne kumupa talakiti umvwe waswa. Kimye bamulume ne mukazhi kyo baile na kufwakasha ku muzhi mukatampe, bayukile amba bakasambakana na bantu bafuma mu byalo byapusana pusana. Basendele kabuku ka Nations ne matalakiti avula a mu milaka yapusana pusana. Umvwe baumvwa muntu ubena kupotesha bintu mu mukwakwa saka amba mulaka ungi nangwa waikala kubwipi ne abo ko bemikila myotoka nangwa mu nzubo ya kujilamo, bamupa talakiti wa mu mulaka wanji.
8 “Kusai Nkunwa Yenu”: Matalakiti twakonsha kwiesakanya ku nkunwa. Njimi ukusa nkunwa yavula mambo akuba kechi wayuka ikamena ne. Musapwishi 11:6 waamba’mba “Kusai nkunwa yenu lukelo, kabiji mabanga nao kechi muvunge kuboko kwenu ne. Mambo kechi mwayuka ikamena bulongo ne, kana iyinyi, kana yoya, nangwa kana yonse ibiji ikawama pamo.” Onkao mambo twajijilai “kukumbanya mana” kupichila mu kwingijisha kino kingijisho kyawama.—Mana 15:7.
[Mepuzho a Lufunjisho]
1. Matalakiti beingijisha byepi ku bantu ba Lesa?
2. Mambo ka matalakiti kyoawamina?
3. Shimikizhaipo kya kumwenako kyenu nangwa kyanembwa mu mabuku etu kibena kumwesha buneme bwa matalakiti.
4. Kikonkwanyi ka kyo tukekalanga nakyo umvwe ao ñondo wa kusha matalakiti?
5. Twakonsha kushila byepi bantu matalakiti kimye kyotubena kwingila busapwishi bwa ku nzubo ku nzubo?
6. Twakonsha kwingijisha byepi matalakiti kimye kyotubena kwingila busapwishi bwa mu mukwakwa?
7. Tongolaipo byamwekele bibena kumwesha byo twakonsha kusapwila busapwishi bwa kushukilwa.
8. Mu ñanyi jishinda matalakiti moaikela nobe nkunwa?
[Mabulañano pa peja 3]
Byokiji kuba’mba matalakiti engila bingi bulongo mu mwingilo wa kusapwila, tukeengijishanga bingi mu mwingilo kutendeka mu November