Kuwamishako Busendwe Bwetu bwa Kusapwila—Bya Kukumbula Bantu Bakeba Kuchibikizha Misambo

Ene Mambo o Kyanemena: Fwanyikizhai amba mwayuka kuba’mba bya malwa bibena kwiya. Kabiji mwayuka’mba bantu inge babule kunyemamo mu muzhi basa kufwa. Byo mwaya ku nzubo ya mukwenu mo mwaikela kinkalankulo amba mumujimuneko, aye wimuchibikizha ne kwimwambila’mba wapayankana. Kine, kechi mwakonsha kufikenatu ponkapo mwamuleka ne. Bantu bavula mu nyaunda yetu bakana kwisamba ne atweba, mambo kechi bayuka’mba byambo byo twibasapwila ke byambo bya lupulukilo ne. Kampe kimye kitanshi kyo twi bataine batabankene. (Mat. 24:37-39) Nangwa kampe bebabulapo kala mashimikila a bubela pa Bakamonyi ba kwa Yehoba. (Mat. 11:18, 19) Kabiji bakonsha kulanguluka’mba kechi twapusana na bupopweshi bukwabo muya bantu bamwesha byubilo byatama ne. (2 Pe. 2:1, 2) Inge kya kuba pa kimye kitanshi mwina nzubo kechi ubena kukeba kwisamba ne atweba ne, kechi twafwainwa kufikenatu kwikileka ne.

Byo Mwafwainwa Kuba:

Saka mukyangye kuya na kusapwila ku nzubo ku nzubo, langulukilai jimo pa bintu byamba bantu bakeba kuchibikizha misambo bo mwakonsha kutana ne byo mwakonsha kukumbula.
Inge mwina nzubo wachibikizha mwisambo, tekanyai ne kumonapo jishinda jawama ja kutwajijilamo mwisambo. Kampe mwakonsha kumutakaika pa milanguluko yanji. Kya kumwenako, umvwe waamba’mba uji na bupopweshi bwanji, mwakonsha kukumbula’mba: “Naji kuketekelanga kuba’mba nsakutanapo muntu watemwa bya bupopweshi byonka byo muji anweba.” Bimye bimo kuswisha milanguluko ya mwina nzubo ne byo abena kupitamo kukemukwasha kutwajijila kushimuna bukamonyi. Kya kumwenako, inge mwina nzubo waamba’mba wapayankana, mwakonsha kwamba’mba: “Kijitu bulongo mwane. Bino saka nkyangye kuya ne, lekai nemushileko kino.” Kikwabo kyo mwakonsha kuba inge kya kuba mwina nzubo waamba’mba uji na bupopweshi bwanji ke kumwipuzha bwipuzho. Mwakonsha kwamba’mba, “Naji kuketekelanga kuba’mba nsakutanapo muntu watemwa bya bupopweshi byonka byo muji anweba. Mulangulukapo’mba ka pa mulaye wa mu Baibolo wa kuba’mba Lesa ukafumyapo bubi bonse pano pa ntanda ne kwalula ino ntanda ke mwa kwikalatu bantu batemwa bololoke? Abya uno mulaye wimusangajika nyi?”
Mwafwainwa kuyuka pa kupelela. Vulukainga kuba’mba Yehoba kechi ukanjikizha bantu kuteleka ku byambo byanji ne. (Mpitu. 30:19) Muntu yense uji na luusa lwa kusalapo kwingijila Yehoba nangwa ne. (Nga. 6:5) Inge mwina nzubo wakanatu nsalansala kwisamba nanji, mwafwainwa kumuleka. Kunemeka milanguluko yanji kwakonsha kumulengela kuswa kuteleka ku musapwishi mukwabo ukeyapo kulutwe na lwendo.—1 Pe. 3:15.

Esekai Kuba Bino mu uno Ñondo:

Umvwe muntu ye mwakeba kusapwila wachibikizha mwisambo, panyuma ya kufuma pa nzubo yanji, isambai na mukwenu mo mubena kwingijila byo mwaji kufwainwa kukumbula mu jishinda jawama.