Ñanyi Wakilamo Kunema Mu Bwikalo Bwenu?
“Yenu Mwine Wakila wa panopantanda ponse.”—SALA. 83:18.
1, 2. Pa kuba amba tukapuluke, mambo ka o twafwainwa kubujila kuyukatu jizhina ja Yehoba kwapwa?
KAMPE kimye kitanshi kyo mwamwene jizhina ja Yehoba kyajinga kimye kyo bemumwesheshe kinembelo kya Salamo 83:18. Mwafwainwa mwakuminye bingi pa kutanga byambo bya kuba’mba: “Namba, bayuke amba, Anweba yenka, wa jizhina ja Yehoba, Yenu Mwine Wakila wa panopantanda ponse.” Kufumatu kyo kyo kimye mwafwainwa mwatendekele kukwasha bakwenu kuyuka Lesa wetu, Yehoba, kwingijisha kino kinembelo.—Loma 10:12, 13.
2 Nangwa kya kuba kyanema bantu kuyuka jizhina ja Yehoba, bino kechi kyo kyonkatu kikebewa kuyuka ne. Akimonai nyimbi wa masalamo byo amwesha bukine bukwabo bwanema bo twafwainwa kuyuka pa kuba amba tukapuluke byo aambile’mba: “Yenu Mwine Wakila wa panopantanda ponse.” Kya kine, Yehoba ye Wakilamo kunema pa bintu byonse. Byo aji Mulenga wa bintu byonse, bilengwa byonse byafwainwa kumukokelanga. (Lum. 4:11) O ene mambo, o twafwainwa kwishikisha’mba: ‘Ñanyi wakilamo kunema mu bwikalo bwami?’ Kyanema bingi kulanguluka pa buno bwipuzho?
Mambo Akolomwenwe mu Bujimi bwa Edena
3, 4. Satana wajimbaikile byepi Evwa, kabiji ki ka kyafuminemo?
3 Buneme bwa buno bwipuzho twibuyuka kupichila mu kulanguluka pa byamwekele mu bujimi bwa Edena. Malaika wasatukile waishile kwikala Satana Diabola wajimbaikile mwanamukazhi mutanshi, Evwa, ne kumulengela kunemeka byo akeba aye mwine kupichila mu kuja kipangwa ku kichi kyakainye Yehoba. (Nte. 2:17; 2 Ko. 11:3) Evwa waongwelwe kabiji wamwesheshe kuba’mba kechi wanemeka bukalama bwa Yehoba ne. Evwa walubileko kuba’mba Yehoba ye afwainwa kunemekesha mu bwikalo bwanji. Pano Satana wakonsheshe byepi kujimbaika Evwa?
4 Satana waingijishe mashinda avula a bujimuku pa kwisamba ne Evwa. (Tangai Ntendekelo 3:1-5.) Jishinda jitanshi, Satana kechi waingijishe jizhina ja Yehoba ne. Waambiletu amba “Lesa.” Pa kuba nembi wa buku wa Ntendekelo, aye waingijishe jizhina ja Yehoba ku ntendekelotu ya kyokya kyepelo. Ja bubiji, mu kifulo kya kwamba amba “mukambizho” wa Lesa, Satana waambiletu amba Lesa “wimwambijile.” (Nte. 2:16) Mu jino jishinda ja bujimuku, Satana walengulwile buneme bwa mukambizho wa Lesa. Jishinda ja busatu, nangwa kya kuba waambilengatu ne Evwa, waambilenga nobe ubena kwamba ku bavula amba, “mukajako.” Pa kwamba bino, wakebelenga kumuletela milanguluko ya bwitote, kukeba kumulengela kwiumvwa kunema uba nobe ye wambilako mwatawanji. Ki ka kyafuminemo? Kyamwekeshatu patoka kuba’mba Evwa watendekele kwambilako ne mwatawanji byo akumbwile muloolo amba: “Ku bipangwa bya ku bichi bya mu bujimi twakonsha kujakotu.”
5. (a) Satana walengejile Evwa kuta muchima pa ka? (b) Evwa byo ajile ku kichi kyo bamukainye kyamwesheshe ka?
5 Satana wavundankenye bishinka. Walangulukilenga amba Lesa watama muchima kyokyo aambijile ba Adama ne Evwa amba Lesa wimwambijile amba: “Kechi mukaje ku kichi nangwa kimotu kya mu bujimi ne.” Kikwabo, Satana walengejile Evwa kulanguluka’mba bwikalo bwanji bukawama bingi, ukekala “nobe Lesa.” Kyapeleleko, wamulengejile kutendeka kulanguluka pa kichi ne kipangwa kyakyo mu kifulo kya kuta muchima pa bulunda bwanji na Mwine wamupele byonse. (Tangai Ntendekelo 3:6.) Kyataminekotu, Evwa byo ajile kipangwa, kyamwesheshe patoka kuba’mba winemeka aye mwine kukila Yehoba.
Mambo Akolomwenwe mu Kimye kya kwa Yoba
6. Satana wazhinaukile byepi bukishinka bwa kwa Yoba, kabiji Yoba bamupele kimye kya kuba ka?
6 Byo papichile myaka yavula, muntu wakishinka Yoba wapichile mu bintu bya mulengejile kusalapo ye anemekele mu bwikalo bwanji. Yehoba byo abujilenga Satana bukishinka bwa kwa Yoba, Satana wakumbwile na bukaji amba: “Nanchi Yoba wimwakamwa anweba Lesa kyatu nyi?” (Tangai Yoba 1:7-10.) Satana kechi wakaine kuba’mba Yoba wakokelanga Lesa ne. Wazhinaukileko muchima wa kwa Yoba. Wazhinaukile kyalengelanga Yoba kwingijila Yehoba amba kechi kumutemwa ne, amba wakebangakotu kajiilo. Yoba ye wakonsheshetu kumushiina kabiji bamupele kimye kya kuba bino.
7, 8. Yoba wapichile mu ñanyi meseko, kabiji wamwesheshe ka byo achinchikile mu bukishinka?
7 Yehoba waswishishe Satana kuletela Yoba bya malwa byavula, bilondakenyengatu. (Yoba 1:12-19) Yoba waubilepo byepi bwikalo bwanji byo bwatamine? Tutanga amba, “kechi walengele mambo ne, nangwa kumunena Yehoba amba: Mwauba byatama ne.” (Yoba 1:22) Bino Satana kechi walekele kwamba ne. Watwajijile kwijizhañanya amba: “Kikoba pa kikoba kikwabo! Byonse byo aji nabyo muntu ukebipana mu kupulusha mweo wanji.”a (Yoba 2:4) Satana waambilenga amba inge Yoba wamanama, ukamulengulula Yehoba.
8 Yoba washajiletu bikupatu na mambo a kikola kyatama kyo akolelwe, kabiji bamukanjikizhenga ne ku mukazhi amba atuke Lesa ne kufwa. Palutwe kacheche, balunda nanji basatu babubela bamutekeneshenga bamuzhachishe amba walenga mambo. (Yoba 2:11-13; 8:2-6; 22:2, 3) Nangwa wapichilenga mu bino bya malwa, Yoba kechi wasankijilepo bukishinka bwanji ne. (Tangai Yoba 2:9, 10.) Wachinchikile mu bukishinka kyamwesheshenga amba Yehoba ye ye anemekele bingi mu bwikalo bwanji. Kabiji Yoba wamwesheshe patoka kuba’mba bantu bambulwa kulumbuluka bakonsha kumushiina Diabola amba wa bubela papelela bulume bwabo.—Esakanyaiko Byambo bya Mana 27:11.
Mukumbu Walumbuluka wa kwa Yesu
9. (a) Satana waesekele byepi Yesu pa mambo a bikeba mubiji? (b) Nga Yesu waubilepo byepi pa luno lweseko?
9 Aku Yesu ubatizwatu, Satana wakebelenga Yesu kukebeshanga kwitokesha pa muchima aye mwine mu kifulo kya kunemeka Yehoba mu bwikalo bwanji. Diabola wamwesekele Yesu bimye bisatu. Lweseko lutanshi, Satana wakebelenga kongola Yesu byo afwile nzala, wamwambijile Yesu kwalula mabwe ke shinkwa. (Mat. 4:2, 3) Yesu waikajile na nzala moba 40 kabiji watembukile bingi. Onkao mambo, Diabola watundaikilenga Yesu kwingijisha bibi bulume bwanji bwa kuba byakukumya pa kuba’mba epulushe ku nzala. Nga Yesu waubilepo byepi? Kupusanako na byaubile Evwa, Yesu aye wateletu muchima pa Mambo a Yehoba kabiji wakainetu ponkapo nsalansala byo amubujilenga kuba.—Tangai Mateo 4:4.
10. Mambo ka Satana o aambijile Yesu kwiela panshi kufuma pa jikonka ja nsakwa ya nzubo ya Lesa?
10 Satana wakebelenga ne kongola Yesu kupichila mu kukeba kumulengela kumwesha bwitote. Waambijile Yesu kwiela panshi kufuma pa jikonka ja nzubo ya Lesa. (Mat. 4:5, 6) Satana wakebelenga ka? Satana wakebelenga kumona’mba inge Yesu abule kwikozha popo asa kushiinwa’mba kine wajinga “mwana Lesa.” Kyamweka Diabola wakebelenga Yesu kwikala na muchima wa kwitumbijika, kya kuba ke obe ne bya kwitota. Satana wayukile amba muntu wakonsha kwibika mu kino kizumba na mambo a kwitota ne kuchina kulengululwa ku bantu. Satana watwajilenga mungi kinembelo, bino Yesu wamwesheshe amba wayukile bulongo Mambo a Yehoba. (Tangai Mateo 4:7.) Byo akaine kwibika mu kino kizumba, Yesu wamwesheshe amba wanemekele bingi Yehoba mu bwikalo bwanji.
11. Mambo ka Yesu o akanyijile bufumu bonse bwa pano pa ntanda bwamupelenga Diabola?
11 Lweseko lwapeleleko lwabaile bingi, Satana wakebelenga kupa Yesu bufumu bonse bwa pano pa ntanda. (Mat. 4:8, 9) Yesu wakainetu nsalansala. Wayukile kuba amba kuba bino kwakonsheshe kulumbulula amba wakana bumfumu bwa Yehoba, ko kuba amba lūsa lwa Lesa lwa kuba amba ye Mwine Wakila. (Tangai Mateo 4:10.) Mu meseko onse, Yesu wamukumbwilenga Satana na binembelo muji jizhina ja Yehoba.
12. Ñanyi kintu kyamukatezhe Yesu kufuukula lufu lwanji byo lwafwenyenye pepi, kabiji tufunjilako ka ku byo aubile?
12 Lufu lwanji byo lwafwenyenye pepi, Yesu watalañene na kintu kyakatezhe bingi kufuukula. Mu mwingilo wanji yense, Yesu wamwesheshe byo efuukwijile kupana mweo wanji ke kitapisho. (Mat. 20:17-19, 28; Luka 12:50; Yoa. 16:28) Nangwa byonkabyo, Yesu wayukile kuba amba bakamupamo mambo a bubela ne kumutwala mubije bya Bayudea kabiji ne kufwa lufu lwa bukapondo. Kyamukolanga bingi ku muchima byo ayukile kuba amba bino bintu bikamumwekela saka akyangye kufwa. Walombele amba: “Tata, kana kyakonsheka kubiwa, kano katomeno kampitaile” Pano bino, watwajijile kwamba amba: “Byonkabyo, kechi kya pa muchima wami ne, poso kya pa muchina wenu.” (Mat. 26:39) Bukishinka bwa kwa Yesu kufikatu ne ku lufu lwamwesheshe patoka kuba amba wanemekele bingi Yehoba mu bwikalo bwanji bonse.
Mukumbu Wetu
13. Twafunjilako ka kwi Evwa, Yoba ne Yesu Kilishitu?
13 Ñanyi bintu byo twafunda? Ku byaubile Evwa twafunjilako kuba’mba kukeba kwitokesha pa muchima nangwa kwitota kumwesha’mba kechi twanemeka Yehoba mu bwikalo bwetu ne. Pakuba ku bukishinka bwa kwa Yoba tufunjilako kuba’mba nangwa kya kuba twibambulwa kulumbuluka, twakonsha kumwesha amba twanemeka Yehoba kupichila mu kuchinchika bya malwa mu bukishinka nangwa kya kuba kechi twayuka bulongo ene mambo o tubena kumanamina ne. (Yako. 5:11) Ne kyapelako, bwikalo bwa kwa Yesu bwitufunjisha kuba amba twafwainwa kwipana kulengeshiwa bumvu ne kubula kutesha muchima pa kukeba kwitumbijika. (Hebe. 12:2) Pano twakonsha kulondela byepi bino byo twafunda?
14, 15. Byaubile Yesu na meseko byapusene byepi na byaubile Evwa, kabiji twakonsha kuba byepi byonka byaubile Yesu? (Ambaipo ne pa kipikichala kiji pa jipa 18.)
14 Kange mulekenga meseko kwimulengela kuvulama Yehoba ne. Evwa wakankelwe kushinda lweseko byo bamwesekele. Wamwene amba kipangwa ‘kyawama kujako, kabiji kyamweka bingi bulongo ku meso, kabiji kyo kichi kyafwainwa kusaka mu kumwalula muntu ke wa maana.’ (Nte. 3:6) Kino byo kyapuseneko na byaubile Yesu byo bamwesekele bimye bisatu! Aye kimye kyonse walangulukilanga jimo pa meseko o akonsheshe kupitamo kulutwe kabiji ne bintu byakonsheshe kufumamo. Waketekejile mu Mambo a Lesa kabiji waingijishanga jizhina ja Yehoba.
15 Nga atweba inge kya kuba twaesekwa kuba bintu bifichisha Yehoba ku muchima, tulanguluka pa ka? Kukizhamo kuta muchima pa lweseko, kwakonsha kwitulengela kwikala na milanguluko yatama. (Yako. 1:14, 15) Twafwainwa kupelawizha kuleka yewo mulanguluko watama, nangwa kya kuba kino kyakonsha kukatazha byonka byo kyakonsha kukatazha kuchibako kinungwa kya mubiji wetu. (Mat. 5:29, 30) Byonka byaubanga Yesu ne atweba twafwainwa kulangulukanga pa bifuma mu byubilo byetu byo byakunza bulunda bwetu ne Yehoba. Twafwainwa kuvulukanga byaamba Mambo anji, Baibolo. Umvwe ketube bino popo tukamwesha amba twanemeka bingi Yehoba mu bwikalo bwetu.
16-18. (a) Ñanyi bintu byakonsha kwitulefula? (b) Ki ka kiketukwasha kuchinchika mu bimye bya bulanda?
16 Kange mulekenga makatazho kwimulengela kuzhingijila Yehoba ne. (Mana 19:3) Mpelo ya bwikalo bwa mu ino ntanda byo ibena kunangijila, bantu ba Yehoba babena kupita mu bya malwa ne makatazho avula bingi. Mu ano moba kechi tuketekela Yehoba kwituzhikijila mu jishinda ja kukumya ne. Pano bino byonka byajinga Yoba, twakonsha kulefulwa inge twafwisha balongo betu nangwa kupita mu makatazho.
17 Yoba kechi wayukile kyalengejile Yehoba kuswisha bintu bimo kumweka ne, ne atweba kimo kimye kechi twakonsha kuyuka kyalengela kuba amba bintu byatama bimweke ne. Kampe mwakyumvwapo kala balongo bakishinka bafwile ku kitentanshi, nabiji balongo bafwile ku kyalo kya Haiti nangwatu bafwile mu bya malwa bikwabo. Nangwa kampe mwayukapo umo mulongo wakishinka ye batapile nangwa wafwile mu mapuso. Kimo kimye milanguluko yakonsha kwitukatazha na mambo a bya bulanda nangwa inge betujiila makusu pa mutwe. Na mambo a kumvwa ku muchima kukola twakonsha kumujijila amba: ‘Mambo ka anweba Yehoba o mwaswila’mba mmone byatama? Nanchi natamisha ka?’ (Ha. 1:2, 3) Ki ka kyakonsha kwitukwasha kuchinchika mu bimye bya uno mutundu?
18 Kechi twafwainwa kumonanga’mba bya malwa bitumwekela bifuma kwi Yehoba mambo twamufichisha ku muchima ne. Yesu waambilepo pa bino bishinka byo aambilenga pa bya malwa byamwekelenga mu oa moba. (Tangai Luka 13:1-5.) Bya malwa byavula bitumwekela na mambo a “bimye byabyo ne bintu bibasolomokelatu.” (Sapwi. 9:11) Kechi na mambo a kyalengela kya malwa kwitumwekela ne, twakonsha kuchinchika umvwe twaketekelatu mwi “Lesa wa bukwasho bonse.” Uketupa bulume bwa kutwajijila kuchinchika mu bukishinka.—2 Ko. 1:3-6.
19, 20. Ki ka kyakwashishe Yesu kuchinchika bya bumvu, kabiji ki ka kyakonsha kwitukwasha kuba byonka byoaubile?
19 Kange mulekenga bwitote nangwa moyo wa kuchina bumvu kwikala kintu kyanema mu bwikalo bwenu ne. Kwikepesha kwalengejile Yesu ‘kwialula mwine nobe ke watu pa kutambula musango wa buzha.’ (Fili. 2:5-8) Wachinchikile bya bumvu byavula mambo waketekejile mwi Yehoba. (1 Pe. 2:23, 24) Kuba bino, kwamulengejile Yesu kunemeka kyaswa muchima wa Yehoba, kabiji bamubikile ne pa kifulo kikatampe. (Fili. 2:9) Yesu watundaikile baana banji ba bwanga kwikala bwikalo bwa yenka uno mutundu.—Mat. 23:11, 12; Luka 9:26.
20 Meseko amo etulengesha bingi bumvu. Nangwa byonkabyo, twafwainwa kuchinchika byonka byaubile mutumwa Paulo waambile’mba: “Na onka ano mambo o namanamina bino bintu: byonkabyo kechi nji na bumvu ne; mambo namuyuka aye ye naitabila, kabiji nayukisha namba, aye wakonsha kulama ku joja juba akya kyo namufikizhizhe.”—2 Timo. 1:12.
21. Nangwa kya kuba bantu bavula mu ino ntanda benemekatu abo bene, anweba mwakebesha kutwajijila kuba ka?
21 Baibolo waambijile jimo kuba’mba mu ano moba bantu “bakekala ba kwitemwa abo bene.” (2 Timo. 3:2) O ene mambo bantu bavula o betemenwatu abo bene kwapwa. Kange twikale na uno muteeto watama ne. Nangwa tupite mu meseko, mu bya malwa ne mu bya bumvu, twayai twikalenga bwikalo bumwesha amba twanemeka bingi Yehoba mu bwikalo bwetu!
[Tubyambo twa mushi]
a Bashayuka ba Baibolo bamo bamba amba kyambo kya kuba amba “kikoba pa kikoba kikwabo” kyakonsha kulumbulula kuba amba Yoba wakonsheshe kuswisha baana banji ne banyama kwibasuba kuchina kumusuba kikoba nangwa kumwipaya aye mwine. Bakwabo nabo balanguluka amba bino byambo bilumbulula amba muntu wakonsha kuswako kumusuba bikoba bimo pa kuba amba epulushe. Kyakumwenako, muntu wakonsha kutako mukoko ku kintu kuchina kumukozha ku mutwe, bakonsha kumupompaula bino saka azhikijilako kikoba kya kumutwe. Ino ñambilo monse mo yakonsha kutala, yafwainwa yalumbulwilenga amba Yoba wakonsheshe kuba kiji kyonse pa kupulusha mweo wanji.
Twakonsha Kufunjilako Ka . . .
• kwi Evwa byo bamujimbaikile kwi Satana?
• ku byaubile Yoba na bya malwa?
• ku kyatelepo Yesu muchima?
[Kipikichala pa peja 17]
Evwa wakankelwe kuta muchima pa bulunda bwanji ne Yehoba
[Kipikichala pa peja 18]
Yesu wakaine meseko a kwa Satana, kabiji wateletu muchima pa kuba kyaswa muchima wa Yehoba
[Kipikichala pa peja 20]
Kusapwila mu matente panyuma ya kitentanshi kyajinga mu Haiti
Mu bimye bya bulanda twakonsha kuchinchika umvwe twaketekelatu mwi “Lesa wa bukwasho bonse”