Patanshi Kapwane na Mulongo Wobe—Mu Ñanyi Jishinda?

Fwanyikizhai’mba mubena kwikala mu muzhi wa Ngalilea kimye kyajingako Yesu. Mwaya ku Yelusalema ku Kijiilo kya Mimba. Mu muzhi muji ne bakwenu bena Kilishitu baiya bafuma kwalepa. Kabiji mwakebesha kupana mulambo kwi Yehoba. Mwakasa mbuzhi wenu ne kutendeka kuya ku nzubo ya Lesa kupita mu kaloolo kakilañanya mu muzhi. Byo mwafika, mu nzubo ya Lesa mwayula bantu babena kukeba kupana milambo, ne kimye kyenu kya kupana mbuzhi wenu ku bañanga ba Lesa kyafika. Saka mukyangye kumupana, mwavuluka’mba mulongo wenu wabula kwiya nangwa kampe uji mu muzhi ye muji nanji na mambo. Yesu walumbulwile byo mwafwainwa kuba. (Tangai Mateo 5:24.) Anweba ne mukwenu ye mwalenga mambo mwakonsha kupwana byepi byonka byakambizhe Yesu? Pa bishinka biji panshipo, salaipo mukumbu wa kine.

MWAFWAINWA . . .

• Bulai balongo bakwabo mu kipwilo byo mwamutamishe

• kumukwasha mulongo wenu kuba’mba akepesheko kuzhingila bukiji pa bintu bya kukaishakaishatu, nangwa kuswa’mba bonse mwalubankenye

• kutelekesha bibena kwimubuula mulongo wenu nangwa kya kuba kechi mwaswa byo aamba ne, lombai lulekelo lwa mambo pa kumukozha ku muchima nangwa pa bintu byo mwaji kwamba na kanswatu

MULONGO WENU WAFWAINWA . . .

• Kubuulako bakwabo mu kipwilo mambo o mwamulengele

• kwimwambila saka azhingila, kwimubuula mambo onsetu o mwalengele ne kukeba anweba kuswa’mba mwalubankenye

• kumona’mba mwipelu ne kubula moyo pa kuba’mba mumusolomoke, kabiji mwafwainwa kumulekelako mambo kufuma panshi ya muchima wenu

Nangwa kya kuba kechi tupana milambo ya banyama kwi Lesa ne, pano ñanyi kishinka kyafunjishenga Yesu pa kupwana na bakwetu ne pa kutokesha Lesa ku muchima pa ku mupopwela?