Kuwamishako Busendwe Bwetu bwa Kusapwila—Kuyuka bya Kwipuzha Bulongo Mepuzho

ENE MAMBO O KWANEMENA: Inge “milanguluko ya mu muchima wa muntu iji nobe mema aji mwazhika,” ko kuba’mba mepuzho aji nobe mbekete ya kwiatapwilako. (Man 20:5) Kwipuzha mepuzho kulengela bantu bo tubena kwisamba nabo kwambapo. Kabiji mikumbu ikumbula bantu na mambo a kwibepuzha mepuzho awama kwitukwasha kuyuka byo babena kulanguluka. Yesu wayukile bingi bya kwipuzha mepuzho. Twakonsha kuba byepi pa kuba’mba tuyuke bya kwipuzha mepuzho byonka byo aubanga?

BYA KUBA:

• Ipuzhainga mepuzho a kulengela muntu kwamba biji ku muchima. Yesu waipwizhe baana banji ba bwanga mepuzho avula bingi pa kuba’mba ayuke byo balangulukilenga. (Mat 16:13-16; be 238 mafu. 3-5) Ñanyi mepuzho o mwakonsha kwipuzha muntu a kumulengela kwamba biji ku muchima?

• Ipuzhainga mepuzho a kulengela muntu kulanguluka. Pa kuba’mba Yesu akwashe Petelo, waingijishe mepuzho ne kumupa mikumbu yalengejile Petelo kusalapo bya kuba. (Mat 17:24-26) Ñanyi mepuzho o mwakonsha kwipuzha muntu pa kuba’mba amukwashe mwine kwifuukwilapo bya kuba?

• Sanchilainga ye mubena kwisamba nanji. Munembeshi byo ‘akumbwile bulongo’ Yesu wamusanchijile. (Mak 12:34) Mwakonsha kusanchila byepi muntu wakumbula bwipuzho bo mwamwipuzha?

TAMBAI LUBAJI LUTANSHI LWA VIDYO WA KUBA’MBA INGILAIKO MWINGILO WAINGIJILEPO YESU—KUFUNJISHA, APA BINO MUKUMBULE ANO MEPUZHO:

• Mambo ka kufunjisha bibye o kwatamina nangwa kya kuba byambo byo aji kwambanga bya kine?

• Mambo ka o twafwainwa kubujila kupelelatu pa kulumbulwila muntu byambo mo byatala?

TAMBAI LUBAJI LWA BUBIJI LWA VIDYO, APA BINO MUKUMBULE ANO MEPUZHO:

• Mulongo wa kwingijisha byepi bulongo mepuzho?

• Ñanyi bintu bikwabo byo twakonsha kufunjilako ku byo aji kufunjishanga?