LUFUNJISHO 2

Kwamba mu Bumwisambo

2 Kolinda 2:17

BYO MWAFWAINWA KUBA: Ambainga byonka byo mwamba inge mubena kwisamba na bantu saka mwakasuluka.

Nengezhai bulongo ne kulombapo. Lombai kwi Lesa kuba’mba emukwashe kuta muchima pa jashi jo mubena kunengezha, kechi mwafwainwa kwiketekela anweba bene ne. Yukai bishinka byo mukambapo. Mwafwainwa kwamba bishinka mu byambo byenu, kechi kwibitangatu byonka byo bebinemba ne.

Inge mukatanga mu Baibolo nangwa mu mabukutu akwabo, mwafwainwa kupitulukilamo jimo pa kuba’mba mukabule kwituntula pa kutanga. Inge mubena kutanga byambo byaambile muntu, mwafwainwa kwibitanga na kizaku, bino kechi mwafwainwa kubikamo bisela ne.
Ambainga saka mwashiinwa. Langulukai pa bantu ne byambo byo mubena kwamba byo byakonsha kwibakwasha. Kuba bino kukemulengela kukasuluka pa kwamba, kabiji ñimeno yenu ne mmwekelo ya kilungi bikamwesha’mba mwashiinwa mu byo mubena kwamba.

Kechi mwafwainwa kwamba na bakulumpe byonkatu byo mwamba na bakwenu banyike ne. Byambo byenu byafwainwa kumwesha mushingi ne kwamba byonka byo mwamba pa juba pa juba.
Talainga bo mubena kwambako. Mwafwainwa kutala muntu ye mubena kwisamba nanji. Inge mubena kwamba jashi ja mvula bantu, mwafwainwa kutalanga bantu bo mubena kwambako, kechi kubalanyatu meso mu luonde ne.