Batumwa Babwezhezhepo Jikwabo Kukeba Bifulo Bikatampe

Yesu ne baana banji ba bwanga byo bafikile ko bayilenga ku bulenge bwa Pelia kwipi na Yelusalema, baabukile Mukola wa Yodano kwipi na Yeliko. Kabiji bantu bavula bayijilenga nabo pamo ku Kijiilo kya Lupitailo mu 33 C.E.

Yesu watangijileko kabiji baana banji ba bwanga bamulondejilenga mambo wakebeshetu kuya ku Kijiilo kya Lupitailo. Pano bino, baana ba bwanga baakaminwe. Patanshi, kimye Lazalasa kyo afwile ne Yesu byo akebele kuya ku Yudea kufuma ku Pelia, Tomase wabuujile bakwabo amba: “Ne atweba twayai tuyeko, kuba’mba tukafwile nanji pamo.” (Yoano 11:16, 47-53) Onkao mambo, baana ba bwanga bayukile kuba’mba kuya ku Yelusalema kwajinga kubika bumi mu kizumba, o ene mambo o baakamijilwe.

Pa kwibakwasha kwinengezhezha jimo ku bintu byajinga kulutwe, Yesu watwajile batumwa banji ku mbaji ne kwibabuula’mba: “Tubena kuya ku Yelusalema kabiji Mwana muntu bakamupana ku bañanga bakatampe ne ku banembeshi. Abo bakamuzhachisha amba bamwipaye ne kumupana ku bantu ba mu bisaka bikwabo, kuba’mba bakamwendelekenga ne kumututaula ne kumwipayila pa kichi; kabiji pa juba ja busatu bakamusangula.”—Mateo 20:18, 19.

Kino kyajinga kimye kya busatu Yesu kyo abuujile baana banji ba bwanga pa lufu ne lusanguko lwanji. (Mateo 16:21; 17:22, 23) Nangwa byonkabyo, pa kikye kimye waambile’mba bakamwipayila pa kichi. Kabiji nangwa kya kuba bamutelekelenga, bino bakankelwe kukwatakanya. Kampe baketekejilenga’mba usakubwezha bufumu bwa bena Isalela pano pa ntanda, kabiji batengejilenga kutumbijikwa ne kunemekelwa pamo na Kilishitu mu bufumu pano pa ntanda.

Pa boba bo bayilenga nabo pajinga ne Salome inabo batumwa babiji ba Yakoba ne Yoano. Yesu wibatumbile bano batumwa babiji jizhina jalumbulwilenga’mba “Baana Batatauka Nobe Mvula,” na mambo a muchima wabo wa lupata nobe mujilo. (Mako 3:17; Luka 9:54) Pa kimye kyabaya bano babiji bakebeshenga bingi bifulo mu Bufumu bwa kwa Kilishitu, kabiji babuujileko ne inabo. Onkao mambo, inabo waishile kwi Yesu wafukama ne kwibambilako. Yesu wamushikishe’mba: “Ñanyi kintu kyo mubena kukeba?” Aye waambile’mba: “Ambilai bano baana bami ba balume babiji bakekale umo ku kilujo kyenu, mukwabo ku kipiko kyenu mu Bufumu bwenu.”—Mateo 20:20, 21.

Bene balombelenga kino bajinga ba Yakoba ne Yoano. Byo ebalumbulwijile’mba ukapita mu lumanamo ne kumwipaya, Yesu wibambijile’mba: “Kechi mwayuka kyo mubena kulomba ne. Nanchi mwakonsha kutomamo mu katomeno ko nsakutomamo nyi?” Abo bamukumbwile’mba: “Ee twakonsha.” (Mateo 20:22) Nangwa byonkabyo, kyamweka kechi bakwatakenye kyo aambilengapo ne.

Pano bino, Yesu wibabuujile’mba: “Kine mu katomeno kami musakukatomamo, bino kwikala ku kilujo nangwa ku kipiko kyami kechi yami mpana ne, bino kya boba bo banengezhezha jimo kwi Batata.”—Mateo 20:23.

Batumwa bakwabo jikumi byo bayukile kyalombelenga ba Yakoba ne Yoano bazhingijile bingi. Nanchi ba Yakoba ne Yoano bo babushishe mapata pakachi ka batumwa pa mambo a wajinga mukulumpe nyi? (Luka 9:46-48) Byo balombele pa kikye kimye byamwesheshe’mba batumwa Jikumi na Babiji kechi balondejile bibafunjishe Yesu pa mambo a wajinga mukulumpe ne. Kine, bakebeshe kwikala na bifulo bya peulu.

Yesu wafuukwilepo kupwisha luno lukatazho bukiji bukiji. Waichile batumwa Jikumi na Babiji kabiji mu butemwe wibafunjileko amba: “Mwayuka’mba bamfumu ba bisaka bya bantu bobila bunkambo bantu babo kabiji bebalama bibi ku babinemanga babo. Anweba kange mwikale bino ne; bino yense ukeba kwikala mukulumpe wenu, wafwainwa kwikala wa mwingilo wenu, ne yense ukeba kwikala mutanshi mwi anweba wafwainwa kwikala muzha wa bonse.”—Mako 10:42-44.

Yesu waambile pa muntu ye bafwainwe kulondela. Walumbulwile’mba: “Mwana muntu byo aishile, kechi waishile’mba bamwingijile ne, poso amba ebengijile ne kupana bumi bwanji kwikala bukuzhi bwa kukuula bavula.” (Mateo 20:28) Pa myaka isatu, Yesu waingijilenga bantu, waubile bino kufikatu ne byo ebafwijile. Baana ba bwanga bafwainwe kwikala na muchima wajingapo ne Kilishitu wa kwingijila bakwabo kechi kukeba kwibengijila abo ne, kabiji bafwainwe kwipelula kechi kukeba bifulo bikatampe ne.