Byambo Bikwabo bya mu Mutanchi wa Kupwila kwa Bwikalo ne Mwingilo
MAY 4-10
BYA BUNEME BIJI MU MAMBO A LESA | NTENDEKELO 36-37
“Yosefwa Bamubijile Kichima”
“Umvwai Mwane, Kino Kiloto”
Baibolo wakumbula’mba: “Bakolojanji byo bamwene’mba: Bashetu bamutemwisha kukila atweba bonse, bamushikilwe ne kumwambila bya mutende ke ne.”* (Ntendekelo 37:4) Ibyo kino kibalengejile kichima, pano bino bakolojanji Yosefwa kechi bafwainwe kukizhamo kwikala na kichima ne. (Byambo bya Mana 14:30; 27:4) Nanchi ne anweba mwakyubilapo kichima mulongo nangwa nyenga kimye kyo bamupele mwingilo mu kipwilo ye mwakebelenga nyi? Vulukainga bakolojanji Yosefwa. Kichima kibalengejile kuba bintu byo bafwainwe kubula kuba. Byo baubile ke bya kuvululamo bena Kilishitu kuba’mba, kyawama bingi ‘kusekela pamo na boba basekela.’—Loma 12:15.
Yosefwa wayukishetu bulongo kuba’mba bakolojanji bamushikwa. Nanchi wafile munkukumba wanji kuchina’mba bakolojanji bakamumona nyi? Kampe byobyo akebelenga kuba. Nangwa byonkabyo, vulukai kuba’mba, Yakoba wamusonejile uno munkukumba kumwesha’mba wamutemwa. Yosefwa wakebelenga kuba bintu kwesakana na byo bamuketekejile ku bashanji, onkao mambo, kimye kyonse wavwalanga uno munkukumba wanji. Byo aubile tufunjilako bintu byanema bingi. Nangwa kya kuba Shetu wa mwiulu kechi uji na misalululo ne, kimye kyonse umona bakalume banji bakishinka ne kwibobila bintu byawama. Kabiji wibakambizha kupusanako na bantu ba mu ino ntanda muji byubilo byatama. Byonka byaubile Yosefwa na munkukumba wanji, ne byubilo byawama bibalengela bena Kilishitu kupusanako na bantu bebazhokoloka. Bino byubilo byabo byawama kimye kimo bilengela bantu kwibobila kichima ne kwibashikwa. (1 Petelo 4:4) Nanchi bena Kilishitu bafwainwa kufya kayukilo kabo ka kwikala bakalume ba Lesa nyi? Ine—boba byonkatu byaubile Yosefwa wabujile kufya munkukumba wanji.—Luka 11:33.
“Umvwai Mwane, Kino Kiloto”
Bino biloto byafumine kwi Yehoba Lesa. Bino biloto byajinga bungauzhi, Lesa wabujile Yosefwa kubulañana mwatajile bino biloto. Yosefwa wafwainwe kuba byonka byaishile kuba bangauzhi kulutwe pa kubulañana byaamba Lesa ne lukabisho lo atetejilenga bantu banji basatukile.
Yosefwa waambijile bakolojanji mu jishinda jawama amba: “Umvwai mwane, kino kiloto kyo nalota.” Bakolojanji bayukile mwatajile kino kiloto kabiji kechi batemenwe ne. Bamwambijile’mba: “Nanchi obewa ukekala ke mfumu wetu nyi?” Jishimikila jatwajijila kwamba’mba: “Onkao mambo bamupachishetu na mambo a biloto byanji ne na mambo a byambo byanji.” Yosefwa byo ebalumbulwijile kiloto kya bubiji bashanji ne bakolojanji, kechi baumvwine bulongo ne. Tutanga’mba: “Shanji wamukainye ne kumwambila’mba: I kika kyo walota? Nanchi amiwa ne inobe ne bakolojobe kine tukeya na kukulambila panshi nyi?” Nangwa byonkabyo, Yakoba watwajijile na kulangulukapo pa kino kiloto. Nanchi Yehoba wakonsha kwamba na mwanyike nyi?—Ntendekelo 37:6, 8, 10, 11.
Yosefwa kechi wajinga mutanshi nangwa wapeleko kwamba byambo bya bungauzhi bya mulengejile kumumanyika ne. Yesu ye mwine walumbulwile byambo bungauzhi kabiji waambijile ne baana banji ba bwanga’mba: “Umvwe bampachile amiwa, ne anweba bakemupata.” (Yoano 15:20) Bena Kilishitu bonse bakonsha kufunjilako byavula bingi ku lwitabilo ne ku byachinchikile Yosefwa.
Kukeba Bishinka Bikwabo Byanema
it-1 678
Edomu
(Edomu) [Kuchila], Bena Edomu.
Edomu jajinga jizhina jikwabo jo batumbile Isao. Isao ne Yakoba bajinga mapasa. (Nt 36:1) Kupotesha bubeji na masuku achila ko kwalengejile kumutumba jino jizhina. (Nt 25:30-34) Kabiji Isao pa kusemwa wachijile bingi. (Nt 25:25), kabiji bantu bachila bavujile bingi mu mapunzha avula mu kyalo mo aikalanga aye ne ba mu kikota kyanji.
it-1 561-562
Kuzhikijila
Inge muntu waswa mwingilo wa kufunga mikooko nangwa bañombe, ko kuba’mba waswanga mwingilo wa kuzhikijila bano banyama kwesakana na mwayijile mizhilo. Kuba bino kwamweshanga patoka kuba’mba waswa kujiisha ne kuzhikijila bano banyama. Inge bebeba, ko kuba’mba ye ukekala na mambo. Nangwa byonkabyo, kechi kimye kyonse kyo bamupangamo mambo ne, mambo mizhilo yaambile’mba inge banyama bebalukuka ku banyama bakaji bamungye kya kuba ulama bano banyama kyamukatazha kwibazhikijia, kechi wafwainwe kwikala na mambo ne. Pano bino, pa kuba’mba babule kumupamo mambo pa mwingilo wanji, wafwainwe kupana kishiino ku mwina banyama, nabiji kuleta nyama wafwa ye baja. Inge mwine mwina bano banyama wamona kino kishiino, kechi wamupangamo mambo ne.
Abino byo byo baubanga ne mu bintu bikwabo, nabiji na muntu ye bafwainwa kupa bipe bya buswanyi bya kisemi, nabiji wamulume mukulumpe mu kisemi ye wajinga na mwingilo wa kulama bankasanji babalume ne banyenga yanji. Onkao mambo, kino kitulengela kumvwisha kyalengejile Lubenyi byo ajinga mubeji kukeba kuzhikijila Yosefwa kimye bakolojanji bakwabo kyo bakebelenga kumwipaya, byonka byaamba Ntendekelo 37:18-30. “Wibambijile’mba: ‘Kange tonaune bumi bwanji ne.’ . . . ‘Kange mwichile mashi ne. . . . kange mumube kyatama ne.’ Waubile kino kuba’mba amupokolole kwi abo pa kuba’mba akamubwezhe kwi shanji.” Kabiji Lubenyi byo ataaine kuba’mba Yosefwa ufwamo mu mushima, kyamuletejile bulanda bukatampe. “Watabwile bivwalo byanji” ne kujila’mba “Mwanyike ufwamo! Nanchi amiwa nsakuba byepi?” Wayukile’mba aye yeye basakupamo mambo pa lufu lwa nkasanji. Pa kuchiina kino, bankasanji bafuukwilepo kubepa’mba bamuja ku nyama mukaji. Batumpikile munkukumba wanji wawama mu mashi a mbuzhi. Kepo batwajile uno munkukumba watapakana mashi kwi shabo aye Yakoba kuba’mba amumone inge ye iye. Uno munkukumba ye walengejile Lubenyi kubula kumupamo mambo. Mambo Yakoba byo amwene uno munkukumba wa kwa Yosefwa wajinga na mashi, washiinwe kuba’mba kya kine Yosefwa bamuja ku nyama mukaji.—Nt 37:31-33.
MAY 11-17
BYA BUNEME BIJI MU MAMBO A LESA | NTENDEKELO 38-39
“Yehoba Kechi Walekelejile Yosefwa Ne”
“Nanchi Buno Bubi Bukatampe Nebube Byepi?”
“Kabiji Yosefwa bamuletele ku Ijipita, kabiji aye Potifwalo, kineme umo wa kwa Felo, mukulumpe wa bashilikale balaminenga mfumu, mwina Ijipita, amupotele ku bena Ishimela, bonkaba bamuletele konka.” (Ntendekelo 39:1) Jino jishimikila ja mu Baibolo jitumwesha Yosefwa byo eumvwinenga kimye kyo bamupoteshenga ja bubiji saka akijitu mwanyike. Twakonsha kufwanyikizha Yosefwa saka abena kulondela nkambo yanji wakatataka, kineme wa mu Ijipita, babena kupita mu mashitolo ne mu mikwakwa mwajinga bantu bavula, saka babena kuya ku nzubo ya kineme.
Nzubo yamwene Yosefwa kyo kyajinga kimye kitanshi kwiimonapo. Wakomejile mu bwikalo bwa mu matente ne kuvilauka vilauka kabiji balamanga ne matanga a mikooko. Bena Ijipita nabiji Potifwalo, baikalanga mu mazubo awama bulongo. Bamfunji ba bya kupoyapoya bamba kuba’mba bena Ijipita batemenwe bingi kwikala mu mapunzha awama bulongo o bajimbamo ne bichi biji na bimfutele ne mazhiba a mema mo bajimbanga mambanga, maluba aji na miba ne bichi bikwabo bya mu mema. Mazubo amo beashimikijile mu bichi, kabiji ajinga ne na mwakwikala mubena kupita mwela wawama, mawindo, bibamba byavula, kibamba kikatampe kya kujiilamo ne tumazubo mwaikalanga bamingilo.
“Nanchi Buno Bubi Bukatampe Nebube Byepi?”
Kechi twayuka bulongo tuleya twa bena Ijipita byo twajinga pa kyokya kimye ne. Bamfunji ba bya kupoyapoya poya batana kuba’mba tuno tuleya twajinga na nsakwa ikatampe bingi kabiji twajinga ne na bimbo mo babikanga bakaili. Yosefwa walumbulwile ino mpunzha amba “kaleya ka panshi” ko kuba’mba mwabula kyeya. (Ntendekelo 40:15) Mu buku wa Masalamo, tufundamo bintu bikwabo byapichilemo Yosefwa amba: “Maulu anji beakozhezhe na manjongolo: Walajile mu nshimbi.” (Salamo 105:17, 18) Bena Ijipita kimo kimye bakashilanga manjongolo bakaili saka bafutwila maboko panyuma mu nkokola; bakwabo bebabikanga mashimbi mu nshingo. Yosefwa wafwainwa wayanjile bingi byo bamumanyikilenga kwa kubula ne mambo!
Bino byonse kechi byalengejile Yosefwa kulefulwa ne. Jishimikila jaamba’mba, “waikajile monka mu kaleya.” Waikajilemo myaka yavula bingi! Yosefwa kechi wayukile inge ukafuma mu kaleya nangwa ne. Moba byo ayilenga na kuvujilakotu saka aji mu kaleya, ñanyi bintu bya mukwashishe kubula kulefulwa?
Jishimikila jaamba kuba’mba: “Yehoba wajinga ne Yosefwa kabiji wamubijile lusa.” (Ntendekelo 39:21) Yehoba wakonsha kubila muntu lusa nangwa kya kuba uji mu manjongolo, mu kaleya ka panshi mwabula ne kyeya. (Loma 8:38, 39) Kampe twakonsha kufwanyikizha Yosefwa ubena kubuula Shanji wa mwiulu makatazho o apichilengamo mu milombelo ne kutambwila mutende ufuma kwi “Lesa wa bukwasho bonse.” (2 Kolinda 1:3, 4; Filipai 4:6, 7) Ñanyi bintu bikwabo Yehoba byo aubijile Yosefwa? Tutanga kuba’mba Yehoba “wamubijile lusa, wamulumbulwile ku meso a kalama wa kaleya.”
“Nanchi Buno Bubi Bukatampe Nebube Byepi?”
Jishimikila jaamba kuba’mba: “Yehoba wajinga ne Yosefwa kabiji wamubijile lusa.” (Ntendekelo 39:21) Yehoba wakonsha kubila muntu lusa nangwa kya kuba uji mu manjongolo, mu kaleya ka panshi mwabula ne kyeya. (Loma 8:38, 39) Kampe twakonsha kufwanyikizha Yosefwa ubena kubuula Shanji wa mwiulu makatazho o apichilengamo mu milombelo ne kutambwila mutende ufuma kwi “Lesa wa bukwasho bonse.” (2 Kolinda 1:3, 4; Filipai 4:6, 7) Ñanyi bintu bikwabo Yehoba byo aubijile Yosefwa? Tutanga kuba’mba Yehoba “wamubijile lusa, wamulumbulwile ku meso a kalama wa kaleya.”
Kukeba Bishinka Bikwabo Byanema
it-2 555
Onanyi
(Onanyi) [jilumbulula “bulume bwa lusemo; bulume bukatampe”].
Wajinga mwana wa mulume wa kwa Yuda wa bubiji ye asemejile mu mwanamukazhi mwina Kenana wa jizhina ja Shuwa. (Nt 38:2-4; 1Mo 2:3) Kolojanji Onanyi aye Ela wabujile kusemapo mwana bamwipayile kwi Yehoba na mambo a byubilo byanji byatama. Onanyi bamwambijile kwi shanji aye Yuda kusongola bukwe yanji Tamala washile kolojanji. Inge baji basemene mwana wa mulume, inge kechi wajinga wa kwa Onanyi ne, kabiji inge ye waswaine bya buswanyi byafwainwe mubeji aye Ela. Inge uno nswanyi wabula kusemwa, ko kuba’mba bya buswanyi byonse inge byajinga bya kwa Onanyi. Onkao mambo, Onanyi byo alaajile na bukwe yanji aye Tamala, ‘watayijilenga malume anji panshi.’ Kino kechi kibena kulumbulula’mba Onanyi wisukilenga ne. Mambo jishimikila jaamba’mba, “byo alaajile na bukwe yanji” watayijilenga malume panshi. Kyamweka Onanyi ‘wafuminyenga ne kutayila panshi’ mambo kechi wakebelenga kutaile malume mukachi kuba’mba Tamala emite ne. Na mambo a kubula kukookela bashanji, muchima wanji wa lunkumbwa ne kubula kunemeka masongola byonka bikeba Lesa, kyokyo bamwipaijile kwi Yehoba naye saka akyangye kwikalapo na mwana. Mambo o bamwipaijilepo kechi ajinga a kwisuka ne.—Nt 38:6-10; 46:12; Ba 26:19.
w04 1/15 30 mafu. 4-5
Mepuzho Afuma ku Batanga
Yuda walubankenye pa kubula kupa Tamala mwananji wa mulume aye Shela byonka byo amulaile. Kabiji walaajile na mwanamukazhi ye alangulukilenga’mba pite. Kino kyo aubile kyalajile muzhilo wa Lesa wakambizha bantu kuba’mba bafwainwatu kwilaala mu masongola. (Ntendekelo 2:24) Bino kwesakana na byo kyajinga, Yuda kechi walaajile na pite ne. Nangwa kechi wayukile ne, waimenejilengako mwananji aye Shela wafwainwe kusongola uno bukwe yanji. Onkao mambo, mwana ye asemene wajinga nswanyi wa kwa Ela.
Pa kuba Tamala kechi walengelepo mambo ne. Kabiji baana banji mapasa bo asemene kechi bajinga baana ba mu bukende ne. Boaza wa ku Betelema byo asongwele mwina Moabu aye Luta, bakulumpe ba mu Betelema batakaikile mwana wa kwa Tamala aye Peleze, byo baambijile Boaza amba, “Nzubo yobe ikale byonka byajinga nzubo ya kwa Peleze, yenka Tamala ye asemene kwi Yuda, kupichila mu baana Yehoba bo akakupa mu uno nsongwakazhi.” (Luta 4:12) Kabiji Peleze wanembwa ne pa bashakulu ba kwa Yesu Kilishitu.—Mateo 1:1-3; Luka 3:23-33.
MAY 18-24
BYA BUNEME BIJI MU MAMBO A LESA | NTENDEKELO 40-41
“Yehoba Wapokolwele Yosefwa”
“Nanchi Kulumbulula Kechi Kufuma kwi Lesa Nenyi?”
Kaseya walubileko byamubijile Yosefwa, bino Yehoba kechi wamulubileko ne. Juba jimo, Yehoba walengejile Felo kulota biloto bibiji byakatazha bingi. Mu kitanshi, mfumu walotele bañombe bawama banuna batanu na babiji saka bafuma mu Mukola wa Nile, kabiji palondejile bakwabo batanu na babiji batama ne kunyana. Bañombe batama banyana bajile banuna. Mu kikwabo, wamwene mitwe ya kajo itanu na ibiji saka isapuka ku mutwe wa kinenge kimo. Kabiji wamwene mitwe itanu na ibiji yapeeta ne kupya na lubesha wa kyuya, yakomene ne kumina yoya yatunga ne kuwama. Byo bwakile lukelo, Felo wabukile saka aakamwa bingi pa byo alotele, kabiji waichile bañanga ba lubuko ne ba maana pakuba’mba bamulumbulwile byo. Bino bonse bakankelwe. (Ntendekelo 41:1-8) Kechi twayuka kana bakuminye nangwa kupusenamo pa kwibilumbulula ne. Felo ngovu yamupwile, kabiji wakebeshe bingi kulumbulula mwatajile bino biloto.
Pa kupitapo kimye, kaseya wavulukile Yosefwa! Jiwi janji ja mu muchima jamukatezhe, ne kwambila Felo pa nsongwalume wajinga mu kaleya ao wamulotolwejile kiloto kyanji ne kya uteeka saka papita ne myaka ibiji. Ponkapotu, Felo waichile Yosefwa wajinga mu kaleya.—Ntendekelo 41:9-13.
“Nanchi Kulumbulula Kechi Kufuma kwi Lesa Nenyi?”
Yehoba watemwa bantu bepelula kabiji bakishinka. O ene mambo o apelejile Yosefwa bulume bwa kulotolola kiloto kyakankelwe bantu ba maana ne bañanga. Yosefwa walumbulwijile Felo amba biloto byanji byalumbulwilengatu kintu kimo. Pa kwamba pa kintu kimo jibiji, Yehoba walumbulwilenga amba “kine kyo afuukula” kikafika. Bañombe banuna ne mitwe ya kajo yawama byaimenejilengako myaka itanu na ibiji ya kajo kavula mu Ijipita, kabiji bañombe banyana ne mitwe ya kajo kapeeta byaimenejilengako myaka itanu na ibiji ya kipowe kya nzala ikalondelapo. Kabiji kino kipowe kikakumbana mu kyalo kyonse.—Ntendekelo 41:25-32.
“Nanchi Kulumbulula Kechi Kufuma kwi Lesa Nenyi?”
Felo waubile monka mo aambijile. Ponkapo Yosefwa bamuvwikile kisapi kya linenyi kyawamisha. Felo wamuvwikile bupela bwa ngolode mu nshingo, kambalaminwe ka shitampa, kalaki wa bubiji wa buneme ne kumupa bulume bwa kupitañana mu kyalo kyonse ne kubula bantu byambo byanji. (Ntendekelo 41:42-44) Mu kimyetu kicheche, Yosefwa wajinga mu kaleya waikajilenga mu kipango. Wajinga kaili, waikajile ke wa bubiji kwi Felo. Lwitabilo lwa kwa Yosefwa mwi Yehoba Lesa, lwalengejile kumupesha! Yehoba wamwene nshiji yapichilengamo kalume wanji pa myaka yavula. Wakwashishe Yosefwa mu bino bya nshiji mu kimye kyafwainwa kabiji mu jishinda jawama. Yehoba wakebelenga kufumya Yosefwa mu buzha ne kulama mukoka wa kulutwe wa bena Isalela. Tukafunda byo aubile bino mu kibaaba bya kulutwe mu ino mitwe.
Kukeba Bishinka Bikwabo Byanema
Nanchi Mwayuka Nyi?
Mambo ka Yosefwa o atendejile nsuki saka akyangye kumonañana ne Felo?
Kwesakana na jishimikila ja mu buku wa Ntendekelo, Felo wakambizhe’mba Yosefwa kaili Muhebelu bamulete kwi aye amulotolweleko biloto byamukatezhenga. Pa kikye kimye, Yosefwa saka bamukasa myaka yavula mu kaleya. Nangwa kya kuba Felo wakambizhe’mba bamulete bukiji, Yosefwa wakitendele nsuki patanshi. (Ntendekelo 39:20-23; 41:1, 14) Wanembele jino jishimikila jibena kwamba pa bintu bibena kumweka kubula kunema, ubena kumwesha’mba wayukile bisho bya bena Ijipita.
Kulama myevu yavula kyajinga kisho kya bisaka byavula byajingako kala, kuvwangakotu ne Bahebelu. Muntu wa jizhina ja McClintock ne buku wa Strong’s Cyclopedia of Biblical, Theological, ne Ecclesiastical Literature waamba’mba, “bena Ijipita ba kala kyo kisakatu kyonka kyalamanga myevu yavula.”
Nanchi batendangatu myevu nyi? Magazini wa Biblical Archaeology Review waamba’mba bisho bya bena Ijipita bimo byakebanga muntu kwinengezha bulongo saka akyangye kuya kwi Felo byonkatu byo afwainwa kuba pa kutwela mu nzubo ya Lesa. Onkao mambo, Yosefwa watendele nsuki yonse ya mu mutwe ne pa mubiji.
Kumwesha Mushingi byo Tuji ba Mwingilo wa Lesa
14 Bansemi bajinga na moyo wa kwakamwa Lesa ba ku kala bamonanga kuba’mba baana babo bafunda kumwesha mushingi pa nzubo. Akimonai Abalahama ne mwananji Izaka byo bemwesheshe mushingi mu byambo biji mu Ntendekelo 22: 7. Kabiji Yosefwa naye wamwesheshe amba bansemi banji bamufunjishe bulongo. Byo bamukashile mukaleya wanemekeletu ne bakaili bakwabo. (Nte. 40: 8, 14) Byambo byo aambijile Felo bimwesha amba wafunjile jishinda jawama ja kwambilamo ku muntu wanema mu kafulumende.—Nte. 41: 16, 33, 34.
MAY 25-31
BYA BUNEME BIJI MU MAMBO A LESA | NTENDEKELO 42-43
“Yosefwa Wikainye”
“Nanchi Amiwa Yami Lesa Nyi?”
Nga aye Yosefwa wibayukile nyi? Ee, wafikenejiletu wibayuka. Kabiji kimye kyo ebamwene na kumufukamina, wavulukile byo ebabuujile ku bwanyike. Jishimikila jaamba’mba “ponkapotu Yosefwa wavulukile biloto” byamuloteshe Yehoba kimye kyo akijinga mwanyike. Bino biloto byajinga bya kuba’mba kimye kimo bakolojanji bakamufukamina, ne kine bamufukamijile. (Ntendekelo 37:2, 5-9; 42:7, 9) Pano nga Yosefwa waubile byepi? Wibatambwijile nyi, inyi washinkenye nabo?
“Nanchi Amiwa Yami Lesa Nyi?”
Bintu bya uno mutundu kampe kechi bikemumwekelapo ne. Nangwa byonkabyo, ano moba mu bisemi byavula mu ntanda muji mabano ne lupato. Umvwe kya kuba twaikala na luno lukatazho, kimye kimo twakonsha kubatu byonse byaiya ku muchima. Umvwe kintu kya uno mutundu kitumwekela, kyawama kulondela byaubile Yosefwa ne kuyuka bulongo Lesa byo abena kukeba amba tube na lolo lukatazho. (Byambo bya Maana 14:12) Vulukai kuba’mba kyanema bingi kwikala mu mutende na ba mu kisemi. Kabiji kwikala mu mutende na Yehoba ne Mwananji ke kintu kyakilamo kunema.—Mateo 10:37.
“Nanchi Amiwa Yami Lesa Nyi?”
Yosefwa waesekele bakolojanji mu mashinda apusana pusana pa kuba’mba ayuke byubilo byabo. Watendekejilepo kwibakajipila ne kwibapamo mambo amba bajinga bamwendela ntanda. Pa kukeba kwipokolola mu mambo, bamubuujile biji kisemi kyabo, ne kuba’mba bajinga na nkasabo washajile ku nzubo. Yosefwa kechi wibamwesheshe amba waumvwa bulongo pa kumvwa bino ne. Nanchi kine nkasanji wakijinga mumi nyi? Yosefwa wayukile bya kuba. Wibabuujile’mba: “Nsakwimwesekela ku kino.” Kepo ebambijile’mba wakebelenga kumona uno mukala wabo. Palutwe kacheche, wibaswishishe kubwela ku nzubo na kusenda uno nkasabo umvwe kya kuba umo pe abo washala mu kaleya mo bajinga.—Ntendekelo 42:9-20.
it-2 ji. 108 jifu. 4
Yosefwa
Na mambo a bintu byo baubile Yosefwa, bakolojanji bayukile’mba Lesa ubena kwibakambula pa byo bapoteshe nkasabo mu buzha mu myaka ya kunyuma. Batendekele kwizhachisha mulwabo saka paji ne nkasabo aye Yosefwa ye babujile kuyuka. Byo aumvwine byo baambilenga byamwesheshe’mba balapila, Yosefwa waumvwine bingi bulanda kya kuba wafumineko ko bajinga ne kutatula kujila. Byo abwelele, wasendele Shimeona ne kumukasa, kufikatu ne kimye kyo baletele mukala wabo.—Nt 42:21-24.
Kukeba Bishinka Bikwabo Byanema
it-2 795
Lubenyi
Byubilo byawama bya kwa Lubenyi byamwekele kimye kyo akainye bankasanji batanu na bana kwipaya Yosefwa ne kwibabuula’mba bamutayetu mu mushima wauma. Lubenyi walangulukilenga kumufumya mu mushima mu bufyamfya ne kumubwezha kwi shanji. (Nt 37:18-30) Byo papichile myaka 20, bano bakolojanji byo bebakwachile mu Ijipita ne kwibapamo mambo amba bamwendela ntanda, batendekele kwizhachisha mulwabo amba babena kwibamanyika mambo mashi a kwa Yosefwa ebashinkamana. Lubenyi wibavulwilemo’mba aye wibakainyenga kwipaya Yosefwa. (Nt 42:9-14, 21, 22) Kabiji kimye shabo aye Yakoba kyo ebakainyenga kusenda Benjamina pa kuya ku Ijipita pa lwendo lwabo lwa bubiji, Lubenyi ye wipaine amba bakwachilemo baana banji babiji babalume, byo aambile’mba: “Umvwe nkabule kumubwezha [Benjamina], mukepaye baana bami ba balume babiji.”—Nt 42:37.
w04 1/15 14-17
Bishinka Bikatampe Kufuma mu Buku wa Ntendekelo—2
43:32—Mambo ka kuja kajo na Bahebelu o kyaikejile kya bunya ku Bena Ijipita? Kino kampe kyajinga na mambo a misalululo ya bupopweshi nangwa kwitota kwa mikoka. Kabiji bena Ijipita bashikilwe ne bakafunga. (Ntendekelo 46:34) Mambo ka? Mambo bakafunga kampe bajinga bantu bapanshi mu kisho kya bena Ijipita. Nangwa kyajinga na mambo a kuba’mba mushiji wa kujimapo byo akepele, bena Ijipita kyokyo bashikijilwe aba bakebanga mushiji wakulaminapo matanga.