Lesa Walengele Jiulu ne Ntanda

Yehoba Lesa ye Mulenga wetu. Ye walengele bintu byonse, bintu byo tumona ne byo tubula kumona. Saka akyangye kulenga bintu byo tumona, walengele bamalaika bavula bingi. Nanchi bamalaika wibayuka nyi? Bamalaika ke bilengwa bya mupashi Yehoba byo alengele. Kechi twakonsha kwibamona ne, byonkatu byo twakonsha kubula kumona Lesa. Malaika mutanshi Yehoba ye alengele ye wamukwashishenga pa kulenga bintu byonse. Uno malaika waingijilenga pamo ne Yehoba pa kulenga tubangabanga, mapulaneti ne bintutu bikwabo. Pa mapulaneti o alengele paji ne ntanda, po twikala ne kwiyowa bumi.

Kabiji Yehoba walengele ino ntanda kuba’mba pakekalenga bantu ne banyama. Walengele juba kabiji jatendekele kusaama pano pa ntanda. Walengele mitumba, tulunga twa mema ne mikola.

Ki ka kyalondejilepo? Yehoba waambile’mba: ‘Nsakumenesha nsono, bijimwa ne bichi.’ Bichi bipanga bipangwa byapusana pusana, bishu ne maluba byatendekele kumena. Kepo Yehoba alengele banyama, bañonyi, masabi, ne bilongolo. Walengele ne banyama bacheche nabiji tululu, ne bakatampe nabiji banzovu. Ñanyi nyama ye watemwa bingi?

Kepo Yehoba aambijile malaika mutanshi ye alengele amba: “Tulenge muntu.” Bantu bapusana bingi na banyama. Bantu balanguluka ne kulenga bintu. Bamba, kuseka ne kulomba. Bakonsha kulama ntanda ne banyama. Nanchi wamuyuka muntu mutanshi ye balengele nyi? Twaya tumone.