LUFUNJISHO 10

Kwalaula Jiwi

Byambo bya Maana 8:4, 7

BYO MWAFWAINWA KUBA: Suntulaiko jiwi nangwa kwambako lubilo pa kuba’mba mukwashe bantu kumvwisha kyo mubena kwambapo.

Suntulaingako jiwi. Ambai na jiwi ja peulu inge mukeba kukosesha kishinka nangwa kutundaika bantu. Byo byo mwafwainwa kuba ne pa kutanga kinembelo muji byambo bya luzhachisho. Inge mukeba bantu kutako muchima ku byambo bisakulondelapo nangwa inge mubena kwamba pa bijikila, bwezhaiko jiwi panshi.

Kange mupatenga pa kwamba ne, mambo kuba bino kulengela bantu kumvwa nobe mubena kwibakajipila. Kechi mwafwainwa kubikamo bisela pa kuba’mba bantu bemutote ne.
Alaulainga jiwi pa kwamba. Mwafwainwa kusuntulako jiwi pa kumwesha kizaku nangwa pa kulumbulula kintu kyo mubena kwambapo byo kyabaya ne kulepa. Inge mubena kwamba pa bulanda nangwa pa bijikila, mwafwainwa kubwezhako jiwi panshi.
Alulaingako jiwi kwesakana na byo mubena kwambapo. Inge mubena kwamba byambo bya lusekelo, mwafwainwa kwamba lubilo. Bino inge mubena kwamba bishinka byanema, ambai pachepache pa kuba’mba byumvwanyike.

Kechi mwafwainwa kufikenatu kusuntula jiwi ponkapotu ne, mambo kuba bino kwakonsha kubazhimuna bantu. Kabiji kechi mwafwainwa kwambanga lubilo kya kuba byambo kebibule kumvwanyika ne.