4 | Zhikijilai Luketekelo Lwenu

ENE MAMBO O KYANEMENA

Bijikila biya na mambo a bya malwa bibena kumweka mu ntanda, byakonsha kulengela bantu kubula kwikala na butuntulu bwa mubiji bwawama ne kubula kulanguluka bulongo. Bantu bavula bapita mu bino bintu bamona nobe bwikalo kechi bukawamapo jibiji ne. Boba byepi?

• Bamo bakana ne kulanguluka pa bintu bya kulutwe.

• Bakwabo bengijisha maalwa ne bizhima pa kuba’mba bachinuzhuke kulanguluka pa makatazho abo.

• Kabiji bakwabo balanguluka kuba’mba kyawama ne kufwa. Bepuzha’mba, “Mambo ka a kwikela na bumi?”

Byo Mwafwainwa Kuyuka

• Makatazho amo o mupitamo akonsha kwikala a pa ka kimyetu kacheche kabiji akonsha kupwa.

• Nangwa kya kuba makatazho kechi apwa ne, bino kuji bintu bimo byo mwakonsha kuba byakonsha kwimukwasha kuchinchika.

• Baibolo walaya kuba’mba makatazho onse abena kupitamo bantu akapwa.

Byo Mwakonsha Kuba Luno

Baibolo waamba’mba: “Kange mubambishenga michima na mambo a juba ja kesha ne, mambo juba ja kesha jikekala na bijikila byajo. Juba jonse jiji na makatazho ajo.”—Mateo 6:34.

Kange mwakamwenga pa bintu bya kulutwe kya kuba bimulengela ne kukankalwa kuba bintu byo mwafwainwa kuba pa juba ja lelo ne.

Kukizhamo kwakamwa pa bintu bikamweka kulutwe kwakonsha kubayishatu bijikila ne kukookesha lwitabilo lwenu.

Baibolo Witupa Luketekelo lwa Kine

Nyimbi wa masalamo walombele kwi Lesa amba: “Byambo byenu ye lampi wa ku maulu ami, kabiji kyo kyeya kya mu jishinda jami.” (Salamo 119:105) Langulukai pa Mambo a Lesa, Baibolo, byo aji kyeya.

Inge bufuku kuji mfishi ikatampe, lampi witukwasha kumona po twafwainwa kunyanta. Byonka biji lampi, mu Baibolo muji maana alumbuluka akonsha kwitukwasha kuyuka bya kufuukula bulongo bintu.

Kyeya kitokesha mu jishinda pa kuba’mba tumone biji kulutwe, ne Baibolo naye wakonsha kwitukwasha kuyuka bintu byawama biji kulutwe.