Lufunjisho 5

Balunda Na Lesa Bakekala Mu Paladisa

Paladisa kechi ukekala byonka biji ino ntanda yo twikalamo pa kino kimye ne. Lesa kechi wakebele ntanda kuyulwa na makatazho, bulanda, misongo ne buyanji ne. Mu kimye kya kulutwe, Lesa ukalenga ino ntanda kwikala paladisa. Paladisa ukekala byepi? Twayai tumone bishimuna Baibolo:

Bantu bawama. Paladisa ukekala muzhi wa balunda na Lesa. Bakeubilanga bintu byawama bene na bene. Kabiji bakekalanga mwayila mashinda a kwa Lesa a bololoke.—Byambo bya Mana 2:21.

Kajo kavula. Mu Paladisa kechi mu kekala nzala ne. Baibolo yaamba’mba: “Kukekalanga kuvula bingi kwa kajo panopantanda.”—Masalamo 72:16.

Mazubo awama ne mingilo ya kusangajika. Mu ntanda ya Paladisa, kila-kisemi kikekala na nzubo yakyo. Muntu yense ukengila mwingilo uleta lusekelo lwa kine.—Isaya 65:21-23.

Mutende mu ntanda yonse. Bantu kechi bakalwapo jibiji ne kwiipaya mu nkondo ne. Kyambo kya kwa Lesa kyashimuna’mba: “[Lesa] upwisha makondo.”—Masalamo 46:8, 9.

Butuntulu bwa mubiji. Baibolo yalaya’mba: “Kafwako nangwa umo wikala mu yewa muzhi ukamba’mba: Nakolwa, ne.” (Isaya 33:24) Kabiji kechi kukekala kilema nangwa mpofu nangwa kishinka matwi nangwa kamama ne.—Isaya 35:5, 6.

Misongo, bulanda, ne lufu bikapwa. Kyambo kya kwa Lesa kyashimuna’mba: “Ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne: bintu bitanshi byapichijila.”—Lumwekesho 21:4.

Bantu babipa kechi bakekalamo ne. Yehoba walaya’mba: “Babi bakebafumyamo mu ntanda, neba bongozhi nabo bakebangatamo.”—Byambo bya Mana 2:22.

Bantu bakatemwañana ne kwishingika bene na bene. Buchibamambo bwabula koloka, lumanyiko, buntanyi ne lupato bikapwa. Bantu bakakwatankana pamo ne kwikela mwayila mashinda a kwa Lesa a bololoke.—Isaya 26:9.