KAKITENGULUZHA MWALUMBULULWA BISHINKA 10C
Kwibakwasha Kwimana Jibiji
KULANGULUKA pa kimwesho kyanembwa pa Ezikyo 37:1-14 kwakonsha kwitutundaika bingi inge tubena kupita mu makatazho. Kyakonsha kwitutundaika byepi?
Kimye kimo makatazho o tupitamo mu bwikalo etupezha bingi maana. Nangwa byonkabyo, kulanguluka pa kimwesho kya bungauzhi kyamwene Ezikyo kya kubwezha bupopweshi bwa kine kwakonsha kwitukosesha bingi. Mambo ka? Mambo ku buno bungauzhi tufunjilako kuba’mba Lesa uji na bulume bwa kulengela bikupa kwikala ke bantu bomi jibiji, ne atweba wakonsha kwitupa bulume bwa kuchinchika makatazho nangwa kya kuba abayepotu byepi.—Tangai Salamo 18:29; Fili. 4:13.
Vulukai kuba’mba saka kwakishala myaka yavula, Ezikyo saka akyangye ne kwikalako ne, ngauzhi Mosesa waambile’mba Yehoba uji na bulume kabiji ukebesha bingi kukwasha bantu banji. Mosesa wanembele’mba: “Lesa ye wa kufyamamo kufumatu ne kala, maboko anji a myaka akakukwasha.” (Mpitu. 33:27) Kya kine, inge twamujijila Lesa mu bimye bya malwa, Yehoba uketukwasha na maboko anji kuba’mba twimane jibiji.—Ezi. 37:10.