Bya Kuchinchika Inge Mukwenu wa mu Masongola Wasatuka

BA MARGARITA ne bamwatawabo ba Raúl, baingijijilenga Yehoba pamo mu mwingilo wa kimye kyonse pa myaka yavula.a Pano bino panyumatu ya kusemwa kwa mwanabo mubeji, ba Raúl batendekele kusatukila Yehoba. Mu kuya kwa moba, ba Raúl batendekele kwikala bwikalo buncha kabiji bebapangile ne mu kipwilo kya bwina Kilishitu. Ba Margarita baamba amba: “Bino byonse byo byaubiwenga, naumvwinengatu nobe nsakufwa. Najinga na bulanda bukatampe, kabiji kino kyampezhezhe bingi maana.”

Ba Jane byo basongwelwe, bamwatawabo bebasatukijile kupichila mu kwibasebanya ku bantu mu mashinda apusana pusana. Batendekele kwibayanjisha bingi. Ba Jane baamba amba: “Juba jitanshi jo bamfumfwile bimfumfwa bamwatawami, nakankamenetu kabiji naumvwine bingi bumvu. Byo kibajile ndowe, baubangatu bampuma babwela kebansashijile amba nebalekeleko mambo. Nalangulukilenga namba byo nji mwina Kilishitu nafwainwa kwibalekelako mambo kimye kyonse ne kulubako. Kabiji nalangulukilenga namba kubulako muntu mukwabo nangwatu bakulumpe mu kipwilo kyetu pa mambo a makatazho etu ke kubula bukishinka. Kino kisela kyabo kya kunkabisha kyatwajijile kabiji ne amiwa natwajijile kwibalekelako mambo pa myaka yavula. Kimye kyonse, nalangulukilenga namba nafwainwa kubapo bintu bimo byakonsheshe kulengela bamwatawami kuntemwa. Byo bapondokele pa nzubo kwitusha pamo ne mwanami wamukazhi, nalangulukile namba kyapwa natapwila meema ku shomeka wasabika, kabiji ne kuba’mba nafwainwe kuba bintu byavula nangwa kwamba byambo bikwabo pa kuba’mba tukoseshe masongola etu.”

Byonkatu byajinga ba Margarita ne ba Jane, ne anweba kampe mwakonsha kuba kemuyande mu milanguluko, mu bya mali nangwa ku mupashi na mambo a kuba bamwata wenu bemusatukila. Nangwa kampe mwakonsha kwikala mwanamulume kabiji mubena kuyanda mu milanguluko ne kwikalatu na makatazho akwabo na mambo a kubula bukishinka kwa bakazhi benu. Kya kine, tubena kwikala ‘mu moba apelako a bimye byakatazha,’ onka aambijile jimo Baibolo. Buno bungauzhi bumwesha kuba amba mu “mo akapelako,” bisemi bikabenamo kabiji bantu bakekala ba kubula muchima wa bumuntu. Bamo bakabepekezhanga kuba amba bengijila Lesa. (2 Timo. 3:1-5) Bena Kilishitu nabo bapita mu ano makatazho, pano ki ka kyakonsha kwimukwasha umvwe yenu basatukila?

Imonainga Byonka byo Emumona Yehoba

Pa kutendekatu, kyakonsha kwimukatazha bingi kuswa kuba’mba muntu ye mwatemwisha wimushikwa. Kampe mwakonsha ne kwipamo mambo na mambo a byubilo byanji byatama.

Nangwa byonkabyo, vulukai kuba’mba nangwatu Yesu muntu walumbuluka naye bamusatukijile ku muntu ye aketekejile ne kutemwa. Yesu wasajile batumwa banji kwikala balunda nanji, panyuma ya kulangulukishapo ne kulomba kyabaya bingi. Bonse 12 bajinga bakalume ba Yehoba baketekejilwe. Onkao mambo, kwakubula nangwa kuzhinaukatu ne, Yesu kyamukolele bingi ku muchima Yudasa byo ‘aalukile ke wa kumusolola.’ (Luka 6:12-16) Nangwa byonkabyo, Yehoba kechi wapelemo Yesu mambo pa byubilo bya kwa Yudasa ne.

Kya kine, ne lelo jino baji mu masongola kechi balumbuluka ne. Bonse babiji bakonsha kulenga bilubo. Nyimbi wa masalamo wanembele amba: “Anweba Yehoba, inge mwaji mulondalonda kulenga mambo kwetu, Anweba Nkambo, inge ñanyi ukakonsha kupuluka?” (Sala. 130:3) Umvwe kebalondele Yehoba, ba mulume ne mukazhi bakonsha kuba kebelekeleko mambo.—1 Pe. 4:8.

Nangwa byonkabyo, “atweba bonsetu umo umo tukeambila mambo kwi Lesa.” (Loma 14:12) Umvwe umo wa mu masongola waikala na muteeto wa kwingijisha ñambilo ya mwenga nangwa kwikala na byubilo byatama, ko kuba amba uketotolwela mwine kwi Yehoba. Yehoba washikwa bukapondo ne ñambilo ya mwenga, onkao mambo kafwako jifunde jaamba kuba amba ba mu masongola bafwainwa kwiubila bintu kwakubula kwimwesha butemwe ne mushingi ne. (Sala. 11:5; Efi. 5:33; Kolo. 3:6-8) Inge kya kuba mwina Kilishitu watwajijila kwikala na bukaji kwakubula kulapila, wafwainwa kupangiwa mu kipwilo kya bwina Kilishitu. (Nga. 5:19-21; 2 Yoa. 9, 10) Aba baji mu masongola kechi bafwainwa kwizhachisha pa mambo a kusolola byubilo byabula bya bwina Kilishitu ku bakulumpe mu kipwilo ne. Kya kine, Yehoba wibobila bingi lusa aba bo bakabisha.

Umvwe umo wa mu masongola wauba bukende, kechi walengatu mukwabo wa mu masongola mambo ne, bino walenga ne Yehoba mambo. (Mat. 19:4-9; Hebe. 13:4) Inge kya kuba mukwabo wa mu masongola wibikishako kulondela mafunde a mu Baibolo, kechi wafwainwa kwizhachisha pa mambo a bunsatuki bwa mwinakwanji wauba bukende ne.

Yukai kuba’mba Yehoba wayuka byo mwiumvwa. Witela aye mwine kwikala mulume wa mukoka wa bena Isalela, kabiji mu Mambo anji muji bibaba bimwesha byo kyamukolele ku muchima na mambo a kubula bukishinka bwa yewa mukoka. (Isa. 54:5, 6; Yele. 3:1, 6-10) Yukai kuba amba Yehoba umona kujila kwenu inge bemusatukila ku mukwenu wa mu masongola. (Mala. 2:13, 14) Wayuka kuba amba mukeba kwimutekenesha ne kwimutundaika.

Yehoba byo Etutekenesha

Jishinda jimo Yehoba jo etutekenesheshamo ke kupichila mu kipwilo kya bwina Kilishitu. Ba Jane batambwijilepo buno bukwasho bavuluka amba: “Kalama wa mwanzo wafwakashijile kipwilo pa kimye kyo nalefwilwe bingi. Wayukile bulanda bo najingamo kimye bamwatawami kyo basakilenga kuba amba masongola apwe. Wantekenyejile pa kuba’mba ankwashe kulanguluka pa binembelo nabiji 1 Kolinda 7:15. Bibaba bya mu Baibolo ne byambo byanji byawama byankwashishe kubula kwikala na milanguluko ya kwizhachisha kabiji nakasulukile mu milanguluko.”b

Ba Margarita bakwambiwapo kuntendekelo, nabo bayukile amba Yehoba upana bukwasho bwa kine kupichila mu kipwilo kya bwina Kilishitu. Ba Margarita baamba amba; “Byo namwene amba bamwatawami kechi bakeba kulapila ne, amiwa ne baana bami twavilukile ne kuya mu muzhi mukwabo. Byo nafikile, nataine nzubo ya kusonkela ya bibamba bibiji. Juba jalondejilepo, saka nji na bulanda, naumvwinekotu muntu wakonkonsha ku kinzhilo byo napaulwilenga bipe byetu. Nalangulukile namba kampe mwina nzubo ye waiya, mambo ye wajinga kipi kipi na nzubo yetu. Olo, kumonakotu ke nyenga wafunjishanga bamama Baibolo kabiji ye wakwashishe ne kisemi kyetu kuyuka bukine. Kechi waketekejilenga kuntana pa yoya nzubo ne, bino waishile pa ino nzubo mambo a kuba wafundanga Baibolo na mwine mwina mazubo. Byo namumwene naikizhe ne kyefu, mambo bulanda bwankwachile bingi. Namulumbulwijile lukatazho lwami, kabiji bonse babiji twajijile. Ponkapotu wanengezhezhe kuba’mba tutanwe ku kupwila jonkaja juba. Kipwilo kitutambwijile, kabiji bakulumpe mu kipwilo babikileko lunengezho lwa kunkwasha kuta muchima kisemi kyami ku mupashi.”

Bakwabo mu Kipwilo byo Bakonsha Kukwashañana

Kya kine, ba mu kipwilo kya bwina Kilishitu bakonsha kukwashañana mu mashinda avula. Kyakumwenako, ba Margarita pa kyokya kimye bakebelenga kutwela nkito. Kisemi kimo mu kipwilo kimye kimo kibalaminangako baana babo inge bafuma ku sukulu.

Ba Margarita bashimikizha’mba: “Nsanta bingi kuba’mba balongo ne banyenga bepana kuya ne amiwa pamo ne mwanami mu mwingilo.” Ba mu kipwilo byo bapana buno bukwasho, ‘besendelako bibanemena abo bene na bene’ kabiji mu kuba bino balondela “muzhilo wa Kilishitu.”—Nga. 6:2.

Aba babena kumanama na mambo a bubi bwa bakwabo basanta bingi pa buno bukwasho bo batambwila. Ba Monique, bo basatukijile ku bamwatawabo ne kwibashila nkongole ya mali a kina America afikile ku $15,000 ne baana bana, baamba’mba: “Balongo ne banyenga yami ba ku mupashi bajinga bingi na butemwe. Kechi nayuka bwikalo bwami byo bwafwainwe kwikala kwakubula bukwasho bwabo ne. Neumvwa kuba amba Yehoba wampa balongo bawama bingi, abo bepaine kukwasha baana bami. Najinga wa lusekelo bingi kumona baana bami byo bakomenenga ku mupashi na mambo a bukwasho bwa balongo. Kimye kyo nakebewanga kunkwasha, bakulumpe mu kipwilo bankwashanga. Byo nakebanga kwisamba nabo, bantelekanga.”—Mako 10:29, 30.

Kya kine, mulunda wa butemwe uyuka kimye kyakonsha kubula kufwainwa kwamba pa makatazho abena kupitamo mukwabo. (Sapwi. 3:7) Ba Margarita baamba amba: “Javula naikalanga bingi na lusekelo kwisamba na banyenga ba mu kipwilo kyami kyakatataka pa mambo a mwingilo wa kusapwila, lufunjisho lwetu lwa Baibolo ne pa baana betu, twisambanga pa kiji kyonse kufumyakotu makatazho ami. Nebasanchila bingi pa byo bankwashishe kulubako ku bintu bya kunyuma ne kunkwasha kulanguluka pa byakatataka.”

Kwikala na Muchima wa Kushinkanya Ne

Kimye kimo, mu kifulo kya kwizhachisha na mambo a bubi bwa mukwenu wa mu masongola, kampe mwakonsha kuzhingila na mambo a kuba’mba mubena kuyanda na mambo a kutamisha kwanji. Umvwe kuzhingila kwakilamo, mwakonsha kuleka kwikala bakishinka kwi Yehoba. Kyakumwenako, kampe mwakonsha kwesekwa kukeba mashinda a kushinkenyamo na mukwenu wa mu masongola wabula bukishinka.

Umvwe mwamona kuba’mba muji na muchima wa kusaka kushinkanya, mwakonsha kuvuluka kyakumwenako kya kwa Yoshua ne Kaleba. Bano banabalume bakishinka babikile bumi bwabo mu kizumba pa kwendela Ntanda ya Mulaye. Bamwendela ntanda bakwabo kechi bajinga bakishinka ne, kabiji balengejile bantu kuleka kukokela Yehoba. Bena Isalela bamo bakebelenga ne kwasa Yoshua ne Kaleba mabwe byo batundaikilenga mukoka kuba’mba atwajijile kwikala wakishinka. (Bala. 13:25–14:10) Na mambo a byubilo bya bena Isalela, ba Yoshua ne Kaleba baikele mu kiselebwa pa myaka 40, kechi na mambo a bilubo byabo ne, bino na mambo a bilubo bya bakwabo.

Nangwa kya kuba ba Yoshua ne Kaleba balefwilwe, kechi balekele bilubo bya balongo babo kwibazhingijisha ne. Batwajijile kuta muchima pa bumupashi bwabo. Panyuma ya kwikala myaka 40 mu kiselebwa, abo pamo ne bena Levi, bebapesheshe byo bapulukile mu kyokya kisemi ne kutwela mu Ntanda ya Mulaye.—Bala. 14:28-30; Yosh. 14:6-12.

Byubilo bya mukwenu wa mu masongola wabula bukishinka byakonsha kwimulengela kumanama pa myaka yavula. Masongola akonsha kupwa, kabiji panyuma ya bino mwakonsha kushala mu bulanda ne kwikala mu makatazho a bya mali. Nangwa byonkabyo, mu kifulo kya kuleka milanguluko yatama kwimulefula, vulukai kuba’mba Yehoba wayuka bulongo bya kuba na boba bakana kulama mizhilo yanji kya nshiji, byonkatu bimwesha kyakumwenako kya bena Isalela babujile bukishinka mu kiselebwa.—Hebe. 10:30, 31; 13:4.

Mwakonsha Kuchinchika

Mu kifulo kya kuleka milanguluko yatama kwimulefula, ikalai na ndangulukilo ya Yehoba. Ba Jane baamba amba: “Nataine kuba’mba kuteleka ku matepu a Kyamba kya Usopa ne Awake kwandengelanga kuchinchika. Kabiji kupwila kwankoseshanga bingi. Kwivwanga mu kupwila kwankwashanga kulubako ku makatazho ami. Mwingilo wa kusapwila naye wankwashanga bingi. Nakoseshanga lwitabilo lwami kupichila mu kukwasha bakwetu kwikala na lwitabilo lwakosa mwi Yehoba. Kabiji kuta muchima bo nafunjishanga Baibolo kwandengelanga kuta muchima ku bintu byanema.”

Ba Monique, bo twajikwambapo kuntendekelo baamba’mba: “Kutanwa ku kupwila kimye kyonse ne kwingila papelela bulume bwami mwingilo wa mu bujimi, kwankwasha kuchinchika. Ba mu kisemi kyami bakwatankana bingi bene na bene kabiji ne na kipwilo. Makatazho ami ankwasha kuyuka bukoke bwami. Naesekwa bingi, pano bino, na mambo a bukwasho bwa Yehoba natwajijila kuchinchika.”

Ne anweba mwakonsha kuchinchika meseko a byonka bino. Kechi na mambo a bulanda bwakonsha kwimuletela mukwenu wasatuka ne, ibikishaiko kulondela lujimuno lwa kwa Paulo lwa kuba amba: “Kechi tukoke mu kuba byawama ine: mambo mu kimye kyafwainwa tukanowa umvwe ne kupungila ne.”—Nga. 6:9.

[Tubyambo twa mushi]

[Kipikichala pa peja 31]

Aba bo basatukila ku bakwabo ba mu masongola basanchila bingi boba bebakwasha mu mwingilo wa mu bujimi