Byubilo Byatama Bikapwa!

LESA witupa Mambo anji alumbulula bulongo ene mambo bantu o bobila bintu byatama. Witupa ne lūsa lwa kwifuukwila bintu ne bulume bwa kwikanya mu bintu kabiji kino kitulengela kusalapo kubula kuba bintu byatama. (Mpitulukilo ya mu mizhilo 30:15, 16, 19) Na mambo a buno bukwasho, twakonsha kuyuka umvwe twatendeka kwikala na miteeto yatama kabiji ne kukeba mashinda a kwiilekelamo ponkapotu. Umvwe twakana kwivwanga mu byubilo byatama, tukekala ba lusekelo pamo ne aba bonse betumona.—Salamo 1:1.

Bino nangwa tukosekotu byepi, byubilo byatama bikatwajijila mu ino ntanda na mambo a bantu babi bajimo. Baibolo witujimunako amba: “Uyuke kino amba, mu moba akapelako kukeya bimye byakatazha.” Kabiji pa kumwesha kine kintu kilengela ano moba ‘kukatazha,’ Baibolo watwajijila kwamba’mba: “Bantu bakekala ba kwitemwa abo bene, ba kutemwa mali, ba kwitota, ba kwilemena, ba mwenga, ba kulengulula bebasema, ba kubula kusanta, ba kubula kuzhila, ba kubula muchima wa bumuntu, ba kubula kupwanañana, ba kwibabepela bakwabo, ba kubula kwilama, bashinta, ba kubula kutemwa byawama, ba kufutuka, ba lupata lwa kuba bibi, ba kwilundumika, ba kutemwa bya lusangajiko, ne kutemwa Lesa ne; kasa baji na kipashañanotu kya munema wa kunemeka Lesa, kabiji bulume bwa ao munema bebukana: kabiji bano nabo wibavundamine.”—2 Timoti 3:1-5.

Mu byambo bya bungauzhi biji mu kinembelo peulupo muji byambo byaamba’mba ‘moba a kupelako.’ Nanchi bino byambo bilumbulula ka kwi anweba? Bantu bavula bayuka’mba ‘moba a kupelako’ alumbulula’mba kintu kimo kibena kuya na kupwa. I ki ka kyonkakyo? Akimonai Lesa byo alaya mu Mambo anji.

Babi bonse kechi bakekalako jibiji ne.

“Pakishala pacheche ne babi bakekala ke kafwako: Ee kine, obewa ukatajishanga pantu panji kabiji aye ukekala ke kafwapo. Pakuba bakimote bakaswana ntanda. Kabiji bakasangalela mu kuvula kwa mutende.” —SALAMO 37:10, 11.

“Yehoba wibalama bonse bamutemwa; pakuba babi bonse ukebonauna”—SALAMO 145:20.

Kumanama konse kukapwa.

“Aye ukamupokolola wakajilwa pa kujila, ne aye mulanda wabulwa ne wa kumukwasha. Ukebakula myeo yabo ku kunyantwa ne ku bukapondo.”—SALAMO 72:12, 14.

‘Bilengwa byonse nabyo bikapokololwa ku buzha bwa bubole, bikekala na bwana bwa bene bwa lukumo bwa baana ba Lesa.’—LOMA 8:21.

Bantu bakekala na bintu byonse byo bakeba.

“Bonse pa muntu pa muntu bakekala munshi ya miñanzañanza yabo, nangwa munshi ya mikuyu yabo, kafwako nangwa umo ukebobisha moyo ne.”—MIKA 4:4.

“Kechi bakashimika mazubo mwaikala ungi ne; kabiji kechi bakajimba miñanzañanza, ne ungi waja bipangwa byayo ne; mambo byonka bivula myaka ya bichi byo bikavula ne myaka ya bantu bami, kabiji bantu bami basalululwa bakamwenamo lusekelo myaka ne myaka mu mingilo ya maboko abo.”—ISAYA 65:21, 22.

Kukekala bunchibamambo bwaoloka.

‘Nanchi ne aye Lesa kechi akebachibile mambo banji bo asalulula, bamujijila mute ne bufuku . . . nenyi? Nemubula namba, ukebachibila mambo bukiji.’—LUKA 18:7, 8.

‘Yehoba watemwa bunchibamambo bwaoloka, ne kwibalekelela bazhijikwa banji ne. Abo balamwa myaka ne myaka.’—SALAMO 37:28.

Bantu ba lwiso bakazhiya, kukashalatu baoloka.

‘Aba bekala pano pa ntanda bakafunda bya bololoke.’—ISAYA 26:9.

“Atweba, monka mwayila mulaye wanji, tutengela bya mwiulu bipya ne ntanda ipya, mo bwaikala bololoke.”—2 PETELO 3:13.

Bantu Babena Kupimpula Byubilo Byabo

Atweba bonse twatemwa bingi pa kumvwa milaye ya uno mutundu. Pano twayuka byepi’mba ino milaye ikafika? Nangwatu luno, tuji na kishiino kibena kumwesha’mba milaye ya Lesa ikafika. Kishiino ka kyonkakyo? Ke kyokya kya kuba’mba bantu bavula mwaya ntanda lelo jino baji na lusekelo na mambo a kusankilapo byubilo byatama nabiji lwiso, bujimbijimbi ne malwañano kabiji bafunda kwikala na bukishinka, mutende ne lusa. Lelo jino, Bakamonyi ba kwa Yehoba bafika ku mamilyonyi atanu na abiji, baikala pamo mu bwanabwankazhi bubula kuleta misalululo ya kutala pa mutundu, bisho, kyalo ne bya bukomo byalengela bantu mu bwikalo bwabo kwishikwa, kulwa ne kwiipaya.a Kishinka kya kuba’mba bantu babena kupimpula byubilo byabo lelo jino, kitulengela kuketekela’mba bintu byo alaya Lesa kine bikobiwa.

Nanchi ki ka kilengela bantu kupimpula byubilo byabo byatama? Milaye ya Lesa yanembele ngauzhi Isaya yakumbula buno bwipuzho. Wanembele’mba:

‘Musuka ukekala pamo ne mwana mukooko, ne kisumpa ukalaala pamo ne mwana mbuzhi, kabiji mwana ñombe ne mwana bokwe ne nyama wa kulela wanuna bakekalanga pamo, ne mwanyike mucheche ukebatangijilanga. . . . Kabiji ñombe wa mukazhi ne mbeyala bakajanga pamo ne baana babo bakalaalanga pamo; kabiji bokwe ukajanga nsono nobe ñombe. Mwana ukyamwa ukakayilanga pa bwina bwa muloolo, ne mwana wasumuka ukabika kuboko kwanji palaala kipiji. Kechi bakekozhanga nangwa kwionauna ponse pa mutumba wami wazhila ne; mambo pano pa ntanda pakakumbana maana a kumuyuka Yehoba byonka byakumbana mema mu kalunga ka mema.’—Isaya 11:6-9.

Nanchi buno bungauzhi bubena kwambatu pa kimye banyama kyo bakekala mutende na bantu kwapwa nyi? Ine, bwaamba ne pa bintu bikwabotu. Akimonai byambo byapelako mu buno bungauzhi bibena kumwesha kine kintu kikalengela luno lupimpu: ‘Pano pa ntanda pakakumbana maana a kumuyuka Yehoba.’ Nanchi maana a kuyuka Lesa apimpula byubilo bya banyama nyi? Ine. Pano bino, akonsha kupimpula byubilo bya bantu! Buno bungauzhi bwaamba’mba aba baji na byubilo bya bunyama bakebisankilapo ne kwikala na muchima wajingapo na Kilishitu na mambo a kufunda ne kulondela bintu bifunjisha Baibolo.

Akimonai byaubile Pedro.b Byo atwelele mu kipanyi kya bansatuki, wamwene’mba ubena kulwilako bunchibamambo bwaoloka. Panyuma ya kufunda bya bunsatuki, bamwambijile kuya na kulukuka muzhi wa bakapokola. Byo akikebelenga mashinda mwakubila kino, bamukwachile ne kumutaya mu kaleya. Pedro waikele bañondo 18 mu kaleya mo atwajijile na byubilo byanji byatama. Pa kino kimye, mukazhanji Pedro watendekele kufunda Baibolo na Bakamonyi ba kwa Yehoba. Byo bamufumishe mu kaleya, Pedro naye watendekele kufunda Baibolo kabiji bintu byo afunjile pe Yehoba Lesa byamulengejile kupimpula byubilo byanji byatama. Waambile’mba: “Namusanchila bingi Yehoba mambo kechi naipayilepo muntu nangwa umo kimye kyo najinga nsatuki ne. Luno mbena kwingijisha mpoko ya mupashi wa Lesa, Baibolo, pa kufunjisha bantu mambo a mutende wa kine ne bunchibamambo bwaoloka, ko kuba’mba mambo awama a Bufumu bwa Lesa.” Pedro wafwakeshe yewa muzhi ye akebelenga konauna kuba’mba asapwile mambo a mutende kabiji ne pa mambo a ntanda mukabula malwañano.

Kishinka kya kuba’mba Mambo a Lesa apimpula byubilo bya bantu kitulengela kwikala na lwitabilo mu mulaye wa Lesa wa kuba’mba byubilo byatama byonse bikapwa. Kya kine, bantu kechi bakobapo bintu byatama jibiji ne, mambo bakekala na byubilo byawama. Katatakatu Yehoba akafumyepo mulwanyi mukatampe, aye Satana Diabola ubena kutundaika bantu kuba bintu byatama pano pa ntanda. Baibolo waamba’mba: “Byonse bya panopantanda biji mu bulume bwa kwa aye mubi.” (1 Yoano 5:19) Pano bino, katatakatu bakamufumyepo. Kabiji aba bakana kuleka byubilo byabo byatama nabo bakebafumyapo. Kikawama bingi kwikala mu ino ntanda mukabula babi!

Muntu ukeba kukekala mu ino ntanda yawama, wafwainwa kuba ka? Vulukai’mba ‘maana a kumuyuka Yehoba’ o abena kulengela bantu kupimpula byubilo byabo lelo jino, kabiji o akalengela ne bintu mu ino ntanda kwikala bulongo kulutwe na lwendo. Kwikala na maana a kuyuka bintu biji mu Baibolo ne kwibingijisha byonka byaubile Pedro, kukemulengela ne anweba kutonga kwikala mu ntanda ipya ‘mukekala bololoke.’ (2 Petelo 3:13) Onkao mambo, twimutundaika kwingijisha kimye kyenu kyashalako kuyukilamo Lesa ne Yesu Kilishitu mambo kino kikemulengela kwikala na bumi bwa myaka.—Yoano 17:3.

[Tubyambo twa mushi]

[Mabulañano pa peja 9]

Ne anweba mwakonsha kutonga kwikala mu ntanda ipya ‘mukekala bololoke.’—2 PETELO 3:13.