Kechi Mwafwainwa Kumona Amba Mwakoma kya Kukankalwa Kwingijila Lesa ne
Mu muzhi wa Málaga, waikela ku kabeta ka ku bulenge bwa Spain, mwikala nsemi wa mukazhi ne mwananji wamukazhi. Bonse babiji batelwa na jizhina jimotu ja Ana, babatizwe pa 19 December, 2009. Bajinga pa boba bantu 2,352 babatizwe mu Spain mu 2009. Pano kintu kyakumishekotu ke myaka ya kusemwa yajinga na bano ba mwana ne inanji. Bainanji babatizwe saka baji na myaka ya kusemwa 107, kabiji mwanabo wajinga na myaka 83!
Ki ka kibalengejile kubatizwa mu kumwesha kwipana kwabo kwi Yehoba? Ku ntendekelo ya 1970, wakinkalankulo umo wasendanga ba Ana baana, ku Lufunjisho lwa Buku lwa Kipwilo lwaikelanga mu nzubo ya kwa Kamonyi umo. Ba Ana batanwangako kimye kimo. Pano na mambo a nkito yabo ya ku mubiji, ba Ana balekele kutanwako.
Byo papichile myaka jikumi, baana ba bano bonka ba Ana batendekele kufunda Baibolo kabiji pa kupitapo kimye, baikele bakalume ba Yehoba. Umo pa bano baana wa jizhina ja Mari Carmen watundaikile bainanji kutemwa jibiji bukine bwa mu Baibolo ne kwibakwasha kufunda Baibolo. Bankambo yanji Mali Carmen nabo batelwa amba ba Ana batendekele kumwesha lusekelo mu Baibolo. Mu kuya kwa kimye bantu jikumi ba mu kino kisemi babatizwe.
Juba ja lubatizhilo lwabo, ba mwana ne inanji bonse babiji batelwa amba ba Ana basangalele bingi. Ba Ana ba myaka ya kusemwa 107 baambile amba: “Yehoba wangubila byawama pa kunkwasha kumuyuka.” Kabiji baana babo nabo banungilepo amba: “Paladisa saka akyangye kwiya, mbena kukeba kwingijila Yehoba, kuba kyaswa muchima wanji, ne kusapwilako mambo awama kwesakana na papelela bulume bwami.”
Kintu kibaletela lusekelo bano bonse babiji nangwa kya kuba bafwisha bamwatawabo ke kutanwa ku kupwila. Mukulumpe mu kipwilo umo mo baji waambile amba: “Kechi bashalapo nangwa ku kupwila kumo ne. Kimye kyonse benengezha kukumbulapo pa Lufunjisho lwa Kyamba kya Usopa.”
Kyakumwenako kyabo kyawama kituvululamo mwanamukazhi wafwijilwe wa jizhina ja Ana “wabujilenga kulupuka mu nzubo ya Lesa, kasa engijila Lesa na kuzhikilwa na nzala ne kulomba bufuku ne mute.” Kino kyamulengejile kwikala na jishuko ja kumona Yesu byo akijinga mwana. (Luka 2:36-38) Byo afikizhe myaka ya kusemwa 84, Ana kechi walekele kwingijila Yehoba na mambo a bukote ne, kyo kimotu ne bamazhina banji nabo batwajijila kwingijila Yehoba lelo jino.
Nanchi ne anweba mujipo na balongo benu baji na muchima wa kusaka kuteleka ku Baibolo nyi? Inyi mwakisambakanapo kala wakikulumpe wamwesha lusekelo lwa kufunda inge mwaya pa nzubo yanji? Bakikulumpe ba uno mutundu baji nobe ba Ana babiji baambiwapo mu uno mutwe, kechi bafwainwa kulanguluka amba bakoma kya kuba bakankalwa kutendeka kwingijila Yehoba, Lesa wa kine ne.
[Mabulañano pa peja 25]
“Yehoba watwajijila kungubila bintu byawama bingi”
[Mabulañano pa peja 25]
“Paladisa saka akyangye kwiya, mbena kukeba kwingijila Yehoba”