Kulambula Bitapisho Kwi Yehoba Na Mweo Yense

“Byonse byo muba, mwibyubenga na mweo yense nobe mubena kwingijilaYehoba.”—KOLO. 3:23.

1-3. (a) Nanchi lufu lwa kwa Yesu pa kichi kya lumanamo lulumbulula’mba Yehoba kechi ukeba bitapisho kufuma kwi atweba nenyi? Lumbululai. (b) Ñanyi bwipuzho bo twakonsha kwipuzha pa mambo a bitapisho lelo jino?

MU MYAKA yajingako bena Kilishitu batanshi, Yehoba wasolwele patoka kuba’mba kitapisho kya bukuzhi bwa kwa Yesu kyazhimañenye Mizhilo ya Mosesa. (Kolo. 2:13, 14) Bitapisho byonse byapananga Bayudea kufumatu ne kala kechi byakebewenga jibiji ne. Mizhilo yajinga nobe “kalama wa kwitutwala kwi Kilishitu” kabiji mwingilo wayo wapwile.—Nga. 3:24.

² Kino kechi kibena kulumbulula’mba bena Kilishitu kechi bakebewa kupana bitapisho ne. Nangwa byonkabyo, Mutumwa Petelo waambile pa “kupana bitapisho mwayila lutangijilo lwa mupashi wa Lesa, kabiji byaitabilwa kwi aye kupichila mwi Yesu Kilishitu.” (1 Pe. 2:5) Kabiji mutumwa Paulo watokeshepo bingi bulongo kuba’mba bwikalo bonse bwa mwina Kilishitu bwafwainwa kumonwa’mba “kitapisho.”—Loma 12:1.

³ Onkao mambo, mwina Kilishitu upana bitapisho kwi Yehoba kupichila mu kupana nangwa kukana bintu bimo na mambo a aye. Kwesakana na byo twayuka byakebewanga pa kuba’mba bitapisho bya bena Isalela bitabilwe, nga atweba lelo jino twakonsha kuyuka byepi amba bitapisho byetu byaitabilwa kwi Yehoba?

MU BWIKALO BWETU BWA PA JUBA PA JUBA

4. Twafwainwa kuvulukanga ka mu bintu byonse byo tuba pa juba pa juba?

⁴ Mu bwikalo bwetu, kyakonsha kwitukatazha kuyuka’mba mingilo yetu ya pa juba pa juba yavwangamo kupana bitapisho kwi Yehoba. Mu mingilo ya pa nzubo, ya ku sukulu, ku nkito, pa kupota bintu ne mingilotu ikwabo yakonsha kumweka nobe kechi yakunza bulunda bwetu ne Lesa ne. Pano bino, umvwe mwipana kwi Yehoba nangwa mubena kulanguluka kukepana kulutwe na lwendo, jishinda jo mubilamo bintu janema bingi. Twi bena Kilishitu kimye kyonse. Twafwainwa kulondelanga mafunde a mu Binembelo mu mbaji yonse ya bwikalo bwetu. O ene mambo Paulo o etutundaikijile’mba: “Byonse byo muba, mwibyubenga na mweo yense nobe mubena kwingijila Yehoba kechi bantu ne.”—Tangai Kolose 3:18-24.

5, 6. Ñanyi bintu byo twafwainwa kulangulukangapo mu mvwajilo ne mu byo tuba pa juba pa juba?

⁵ Mingilo ya pa juba pa juba ya mwina Kilishitu kechi lubaji lwa mingilo yazhila ne. Nangwa byonkabyo, Paulo byo etutundaika kwingila ‘na mweo yense nobe tubena kwingijila Yehoba,’ kitulengela kulanguluka pa bwikalo bwetu bonse. Onkao mambo, nanchi jino jifunde twakonsha kwijilondela byepi? Nanchi tuvwala byafwainwa pa kimye kyonse nyi? Inyi kimye kyo twingila mingilo ya pa juba pa juba, tumvwa bumvu kwisolola’mba twi Bakamonyi ba kwa Yehoba, kampe na mambo a byubilo byetu nangwa mvwajilo yetu nyi? Kechi twafwainwa kubanga bino ne! Bantu ba Yehoba kechi bafwainwa kubanga bintu bipeezha jizhina ja Lesa ne.—Isa. 43:10; 2 Ko. 6:3, 4, 9.

⁶ Pano twayai tumone kukebesha kwingila na ‘mweo yense nobe tubena kwingijila Yehoba’ byo kwakunza mbaji yavula ya bwikalo bwetu. Pa kuba bino, twafwainwa kuvulukanga kuba’mba bitapisho byonse byapananga bena Isalela kwi Yehoba byaitabilwanga umvwe bapana byawamisha.—Lupu. 23:19.

BYO BYAKUNZA BWIKALO BWENU

7. Ñanyi bintu byavwangwa mu kwipana kwa bwina Kilishitu?

⁷ Kimye kyo mwipaine kwi Yehoba, mwipaine na muchima yense, nanchi kechi ibyo nenyi? Mu ñambilo ikwabo mwaambile’mba mu bwikalo bwenu bonse mukatangizhangako Yehoba. (Tangai Bahebelu 10:7.) Mwafuukwile bingi bulongo. Kwakubula nangwa kuzhinaukatu ne, mwatana kuba’mba inge mwayuka bikeba Yehoba pa bintu bimo ne kubila bintu mwayila kyaswa muchima wanji, jonse mufuma byawama bingi. (Isa. 48:17, 18) Bantu ba Lesa bazhila kabiji basangalala mambo baji na byubilo bya Mwine wibafunjisha.—Levi 11:44; 1 Timo.1:11.

8. Mambo ka o kyanemena kuyuka’mba Yehoba wamonanga bitapisho byapananga bena Isalela amba byazhila?

⁸ Bitapisho byapananga bena Isalela byamonwanga’mba byazhila. (Levi 6:25; 7:1) Kyambo kya Kihebelu kyatuntululwa’mba “byazhila” kilumbulula byapatulwa, byasalululwa nangwa’mba bya kwa Lesa. Pa kuba’mba bitapisho byetu bitabilwe kwi Yehoba, byafwainwa kwikala byapatulwa byabula bubipisho bwa miteeto ya pano pa ntanda. Kechi twafwainwa kutemwa kintu nangwa kimo kyashikwa Yehoba ne. (Tangai 1 Yoano 2:15-17.) Kino kibena kumweshatu patoka kuba’mba twafwainwa kuchinuzhukanga kupwanañana na bantu nangwa kuba bintu byakonsha kulengela Lesa kwitutala bibi. (Isa. 2:4; Lum. 18:4) Kilumbulula ne kuba’mba kechi twafwainwa kutalanga pa bintu byatama nangwa kufwanyikizhanga bintu byatama ne.—Kolo. 3:5, 6.

9. Byuba mwina Kilishitu na bakwabo byanemena ka?

⁹ Paulo watundaikile bakwabo ba mu lwitabilo amba: “Kange muvulamenga kuba byawama ne kupapo bakwenu bintu byenu ne, mambo bitapisho bya uno mutundu bitokesha Lesa ku muchima.” (Hebe. 13:16) Onkao mambo, kwikala muntu wawama ne kubila bakwetu byawama Yehoba wikimona’mba kitapisho kyaitabilwa kwi aye. Bino Kutemwa bantu ko kupusanyako bena Kilishitu bakine ku bantu bonse.—Yoa. 13:34, 35; Kolo. 1:10.

BITAPISHO BYA MU MPOMPWELO

10, 11. Yehoba umona byepi mwingilo wetu wa bwina Kilishitu ne mpopwelo yetu, kabiji kino kyakonsha kwitukwasha byepi?

¹⁰ Jishinda jimo jikatampe atweba bena Kilishitu jo tubilamo byawama ku bantu ke kupichila mu ‘kusapwila pa luketekelo lwetu.’ Nanchi mushukilwapo tubimye twa kusapwila nyi? Paulo watelele uno mwingilo wanema wa bena Kilishitu amba “kitapisho kyo tupana kwi Lesa. Twingijisha byatunwa byetu kuyukanyikishishamo jizhina janji [Lesa] ku bantu.” (Hebe. 10:23; 13:15; Ho. 14:2) Kyanema bingi kulanguluka pa kubaya kwa kimye ne byo twikingijisha mu mwingilo wa kusapwila mambo awama a Bufumu. Kabiji mbaji yavula ya Kupwila kwa Mwingilo yaikelako kwitutundaika kwingila uno mwingilo. Pano bino, twafwainwa kuvulukanga’mba mwingilo wetu wa mu bujimi ne busapwishi bwa kushukilwa ke “kitapisho kyo tupana kwi Lesa,” kabiji lubaji lwa mpopwelo yetu. Onkao mambo, kino kitapisho kyafwainwa kwikala kintu kyawamisha. Nangwa kya kuba bwikalo bwapusana pusana, bino kimye kyo tusapwila mambo awama kimwesha byo twanemeka bintu bya ku mupashi.

¹¹ Bena Kilishitu kimye kyonse bapopwela Lesa mu mazubo abo ne mu kipwilo. Yehoba ye ukeba kuba’mba tubenga bino. Kya kine kuba’mba kechi tukikokela muzhilo wa kukokoloka pa juba ja Sabado nangwa kuya ku Yelusalema ku bijiilo ne. Bino byo baubanga bipashako na bikebwa mu bwikalo bwa bena Kilishitu lelo jino. Ne lelo jino, Lesa ukeba’mba tusankilengapo mingilo ifu ne kufunda Mambo anji, kulomba ne kutanwa ku kupwila kwa bwina Kilishitu. Kabiji mitwe ya bisemi ibikishako kwikala na kupopwela kwa kisemi na ba mu mazubo abo. (1 Tesa. 5:17; Hebe. 10:24, 25) Pa mwingilo wetu wa ku mupashi, twafwainwa kwishikisha’mba, ‘Nanchi nafwainwa kuwamishako mpopwelo yami nyi?’

12. (a) Byakufutumuna byo bafutumunanga kala twakonsha kwibyesakanya ku ka lelo jino? (b) Kabiji milombelo yetu yakonsha kwikala byepi nobe byakufutumuna?

¹² Mfumu Davida waimbile kwi Yehoba amba: “Lulombelo lwami lutulwe ku meso enu pamo nobe byakufutumuna biji na bwema bwawama.” (Sala. 141:2) Akilangulukai pa milombelo yenu, mulomba kimye kyonse nyi, kabiji mulomba byepi? Buku wa Lumwekesho waesakanya “milombelo ya bazhijikwa” ku byakufutumuna, amba kwi Yehoba milombelo ijitu nobe bwema bwawama. (Lum. 5:8) Ku bena Isalela ba kala, byakufutumuna byo bafutumunanga pa kyakusokelapo bitapisho kya kwa Yehoba byakebewanga kutako muchima ne kwibinengezha bulongo. Byaitabilwangatu kwi Yehoba inge bebipana kwesakana na mikambizho yanji. (Lupu. 30:34-37; Levi 10:1, 2) Kyo kimotu, umvwe milombelo yetu yafuma panshi ya muchima, twakonsha kushiinwa’mba yaitabilwa kwi Yehoba.

KUPANA NE KUTAMBULA

13, 14. (a) Epafolodita ne kipwilo kya bena Filipai bamukwashishe byepi Paulo, kabiji uno mutumwa waumvwine byepi? (b) Twakonsha kulondela byepi byaubile Epafolodita ne bena Filipai?

¹³ Mali abingulwa ku mwingilo wa ntanda yonse aji nobe kitapisho, nangwa twabingula acheche nangwa avula. (Mako 12:41-44) Mu myaka ya bena Kilishitu batanshi, kipwilo kya mu Filipai kyatumine Epafolodita ku Loma kuba’mba akakwashe Paulo mu byo akajilwe. Uno muluwe watumine bena Filipai kyamweka wasendele ne mali afumine ku kipwilo. Kino kechi kyajinga kimye kitanshi bena Filipai kutumina Paulo bukwasho ne. Na mambo a lusa lwabo bakebelenga Paulo kubula bijikila bya kukajilwa pa kuba’mba engilenga kimye kyabaya mu mwingilo. Nga Paulo wibumwene byepi buno bupe? Wibutelele amba “bo bwema bwawama, kyo kitapisho kyaitabilwa kitokesha Lesa ku muchima.” (Tangai Filipai 4:15-19.) Paulo wibasanchijile bena Filipai pa kintu kyawama kyo baubile, kabiji ne Yehoba naye wibasanchijile.

¹⁴ Popamotu ne lelo jino, Yehoba usanta pa mibingu yetu yakukwasha mwingilo wa ntanda yonse. Walaya kuba’mba uketumwenanga byo tukeba ku mupashi ne ku mubiji umvwe twatwajijila kutangizhako bintu bya Bufumu mu bwikalo bwetu.—Mat. 6:33; Luka 6:38.

SANTAINGA

15. Ñanyi bintu bimo bimulengela kusanchila Yehoba?

¹⁵ Kechi twakonsha kubala bitulengela kumusanchila Yehoba ne. Nanchi kechi twafwainwa kumusanchilanga pa juba pa juba pa kwitupa bumi nenyi? Witupa byonse byo tukeba, bya kuja, bya kuvwala, mwakulaala ne mwela ye tupema. Kabiji tumusanchila ne pa lwitabilo lwetu lwaimena pa maana alumbuluka lwitulengela kwikala na luketekelo. Kyanema bingi kupopwela Yehoba ne kulambula bitapisho kwi aye, na mambo a byo aji ne bintu byo etubila.—Tangai Lumwekesho 4:11.

16. Twafwainwa kubapo byepi pa kitapisho kya bukuzhi bwa kwa Kilishitu?

¹⁶ Byonka byo twisambile mu mutwe wafumako, kitapisho kya bukuzhi bwa kwa Kilishitu bo bupe bukatampe Lesa bo apa bantu. Kino ke kintu kikatampe Lesa mo etumweshesha butemwe bwanji. (1 Yoa. 4:10) Pano twafwainwa kumubilapo ka pa kino? Paulo waambile’mba: “Butemwe bwa Kilishitu bo bwitwingijisha, mambo twalanguluka bino amba, muntu umo wafwijile bantu bonse; . . . wafwijile bonse ne kusangulwa kuba amba aba baji na bumi kechi bobengatu bintu byo bakeba bene ne, poso kuba byo akeba.” (2 Ko. 5:14, 15) Paulo waambilenga’mba umvwe tusanta pa lusa lukatampe lwa Lesa ko kuba’mba tukamutumbijikanga aye ne Mwananji mu bwikalo bwetu. Butemwe ne lusanchilo lwetu kwi Lesa ne Kilishitu lumwekela mu kwikala na lukokelo, kukebesha kusapwila ne kulenga baana ba bwanga.—1 Timo. 2:3, 4; 1 Yoa. 5:3.

17, 18. Ñanyi mashinda bamo mo bavuzhizha bitapisho byo bapana kwi Yehoba? Ambai kyakumwenako.

¹⁷ Nanchi kyakonsha kwimupelela kuwamishako bitapisho byo mupana kwi Lesa nyi? Panyuma ya kulanguluka pa bintu byawama bibobila Yehoba, bavula batundaikwa kutanchika bulongo kimye ne mingilo yabo pa kuba’mba bengilengako pakatampe mu mwingilo wa kusapwila Bufumu ne mingilotu ikwabo ya Lesa. Bamo bengilako bupainiya bwa kukwasha pa ñondo umo nangwa bavula pa mwaka pa mwaka, bakwabo nabo batendeka bupainiya bwa kimye kyonse. Kabiji bamo nabo bengilako mwingilo wa kushimika bishimikwa bya mwingilo wa Lesa. Nanchi ano kechi mashinda akumwesheshamo kusanta nenyi? Inge kya kuba byubiwa kufuma panshi ya muchima, ko kuba’mba na muchima wa kukeba kumwesha lusanchilo ne kumutota, ino mingilo yazhila Lesa wiitambwila.

¹⁸ Bena Kilishitu bavula beumvwa’mba baji na kikoloto kya kusanchila Yehoba kabiji kino kibatundaika bingi. Umo pa bano ke nyenga Morena. Bakebelenga mikumbu ya mepuzho avula pe Lesa ne pa ine nkebelo ya bumi. bakebanga mikumbu mu mafunjisho a mu Katolika mo bakomejile ne mu buntemwamaana bwa bena Asia. Bino mikumbu kechi beitaine ne. Mikumbu beitainetu kimye kyo batendekele kufunda na Bakamonyi ba kwa Yehoba. Ba Morena batemenwe bingi pa kutana mikumbu ya mu Binembelo ya mepuzho abo onse ne byo ibalengejile kusanchila Yehoba kupichila mu kwingijisha bulume bwabo mu mwingilo. Panyumatu ya kubatizhiwa batendekele kwingilako bupainiya bwa kukwasha bimye byavula. Kabiji bwikalo bwabo byo bwapimpwilwe batendekele bupainiya bwa kimye kyonse. Papita pano ke myaka 30, ne luno ba Morena bakiji mu mwingilo wa kimye kyonse.

19. Mwakonsha kuvuzha byepi bitapisho byenu kwi Yehoba?

¹⁹ Kuji bapopweshi bakishinka ba Yehoba bavula bekala bwikalo bubula kwibaswisha kwingilako bupainiya. Ponse po twakonsha kupelela mu mwingilo wa Yehoba, atweba bonse pa muntu pa muntu twakonsha kupana bitapisho byaitabilwa kwi aye. Mu byubilo byetu, twafwainwa kutangako muchima kulondela bulongo mafunde aoloka ne kuvulukanga kuba’mba twimenako Yehoba kimye kyonse. Mu lwitabilo, twaketekela na muchima mu kufikizhiwa kwa nkebelo ya Lesa. Mu mingilo yawama, tusampanya mambo awama. Monka mwavujila biji mu michima ne mu lusanchilo lwetu lwa byo etubila Yehoba, twayai tutwajijile kupana bitapisho kwi Yehoba na mweo yense.

MONAI INGE MWAKONSHA KUKUMBULA:

․․․․․

Twakonsha kunemeka byepi Yehoba mu byo tuba pa juba pa juba?

․․․․․

Ñanyi bitapisho byo tupana pa kupopwela Lesa?

․․․․․

Ñanyi bintu byo twakonsha kupa Yehoba?

[Mabulañano pa peja 25]

Nanchi buwame bwa Yehoba bwimulengela kuwamishako bitapisho byo mulambula kwi aye nyi?

[Kipikichala pa peja 23]

Nanchi mushukilwapo tubimye twa kusapwila nyi?