Bya Kuba pa Kuba’mba Mwiyowenga Kutanga
Twakonsha kuba byepi pa kuba’mba twiyowenga kutanga Baibolo? Kabiji twakonsha kuba byepi pa kuba’mba tumwenemo kimye kyo tubena kutanga? Twayai twisambeko pacheche pa bintu bisatu byakonsha kwitulengela kumwenamo mu lufunjisho lwa Baibolo lwa pa bunke.
1 LOMBAI: Kulomba kyo kintu kitanshi kyo twafwainwa kuba. (Sala. 42:8) Mambo ka? Twafwainwa kumonanga kutanga Mambo a Lesa amba nalo lubaji lwa mpopwelo yetu. O ene mambo o twafwainwa kulombela kwi Yehoba kwitukwasha kwikala na milanguluko yawama ne kwitupa mupashi wanji wazhila. (Luka 11:13) Ba Barbara baingila myaka yavula mu mwingilo wa bumishonale baambile’mba: “Ndomba kimye kyonse saka nkyangye kutendeka kutanga Baibolo. Panyuma ya kulomba, ñumvwa kuba’mba Yehoba uji ne amiwa kabiji byo mbena kuba byaitabilwa kwi aye.” Kulomba saka tukyangye kutendeka kutanga kwitukwasha kunengezha muchima kutambwila kajo ka ku mupashi.
2 LANGULUKAINGAPO: Na mambo a kubula kwikala na kimye kyabaya, bamo batanga Mambo a Lesa kwakubula kulanguluka langulukapo. Kuba bino kwibalengela kubula kumwenamo mu byo batanga mu Baibolo. Ba Carlos baingijila Yehoba myaka kukila pa 50 bekimona kuba’mba kwikala na kimye kya kulanguluka languluka pa byo batanga kwibalengela kumwenamo mu byo batanga. Baambile’mba, “Luno ntangatu mapa acheche a mu Baibolo, abiji pa juba pa juba. Ne kwikalapo na kimye kyabaya kya kulanguluka pa byo nabatangenga pa kuba’mba ntolemo bishinka byanema.” (Sala. 77:12) Inge ke twikalepo na kimye kya kulanguluka langulukapo pa byotutanga, tuyukilako byavula ne kuyuka kyaswa muchima wa Lesa.—Kolo. 1:9-11.
3 BINGIJISHAINGA: Inge twamona buneme bwa kintu popo twakonsha kumwenamo byawama. Kyo kimotu na kutanga Baibolo. Gabriel mulongo wakyanyike uji na mutanchi wa kutanga Baibolo pa juba pa juba waambile’mba: “Kutanga Baibolo kundengela kuyuka bya kuba na makatazho a mu bwikalo. Kabiji kundengela kuyuka bya kukwasha bakwetu.” Kabiji wanungilepo ne kuba’mba: “Mu bwikalo bwami ngeseka kwingijisha byonse byo mfunda.” (Mpitu. 11:18; Yosh. 1:8) Kya kine, tumwenamo byawama inge ketutange mambo a Lesa ne kwiengijisha.—Mana 2:1-5.
KUPITULUKAMO: Twatokwa bingi pa kwikala na maana a Yehoba aye Nsulo ya maana onse! (Loma 11:33) Onkao mambo, kimye kikwabo kyo mukatanganga Baibolo, kange mukavulame kulomba Yehoba kwimupa milanguluko yawama ne mupashi wanji wazhila. Kabiji mukatulumanengako ne kulanguluka pa byo mubena kutanga. Kabiji bingijishainga byo mufunda mu bwikalo bwenu. Umvwe mwauba bino bintu byanema bisatu, mukeyowanga kutanga Baibolo kabiji bikemukwasha.