Mwakonsha Kusala Bwikalo Bwawama bwa Kulutwe Mu Ñanyi Jishinda?

TWAKONSHA kusala byepi bwikalo bwawama? Jishinda jimo jakonsha kwimukwasha ke kulanguluka pa bikafuma mu byo mufuukula.

Kechi kyapela kufuukula bintu mukafuma byawama kulutwe na lwendo ne. Mambo ka? Mambo bavula bakebatu kwitobwela pa kyonkakyo kimye. Akilangulukai pa jifunde jiji mu Baibolo jikwatankanya kisemi. (Efisesa 5:22–6:4) Pa kuba’mba mube bino mwafwainwa kumonangapo kimye kya kwikala pamo na kisemi pa juba pa juba, ne kuchinuzhuka kutwezhamo ne mutwe mu nkito, mu makayo ne mu bya kisangajimbwe. Mu bintu byavula mu bwikalo, tufuukula byo tukamwenamo kulutwe ne bya pa kyonkakyo kimye. Ki ka kyakonsha kwimukwasha kusala bwikalo bwawama? Londelai ano mashinda ana.

1 Langulukainga pa Bikafuma mu byo Mufuukula

Pa kufuukula bya kuba langulukainga pa bikafumamo kwa kubula kwijimbaika anweba bene. Baibolo witujimunako’mba: “Wajimuka pa kumona bileta lufu bibenakwiya ufyama.” (Byambo bya Mana 22:3) Umvwe mwalangulukishapo bulongo pa bikafumamo, mukachinuzhuka kufuukula bintu byakonsha kwimuletelela. Kabiji inge mwalanguluka pa bikafuma mu kusalapo bwikalo bwawama, mukatundaikwa kwikyuba.

Ishikishai anweba bene amba: ‘Bika bikafuma mu byo nafuukula panyuma ya mwaka umo, myaka 10 nangwa 20? Bikandengela kwiumvwa byepi kumuchima kabiji butuntulu bwa mubiji wami bukekala byepi? Byo nafuukula byakunza byepi kisemi kyami ne bantu bakwabo?’ Kabiji kyakilamo kunema ipuzhai kuba’mba: ‘Nanchi byo nafuukula bikatokesha Lesa ku muchima nyi? Nga bulunda bwami ne aye bukekala byepi?’ Byo kiji kuba’mba Baibolo wanembelwe na lutangijilo lwa Lesa, wakonsha kwimukwasha kuyuka bimutokesha Lesa ku muchima ne kwimujimuna ku bizumba byo mwakonsha kubula kumona na maana enu.—Byambo bya Mana 14:12; 2 Timoti 3:16.

2 Ifuukwilainga Anweba Bene

Bamo kechi befuukwila bya kuba abo bene ne, balondelatu byuba bakwabo. Bwikalo inge bo basalapo bavula kechi kilumbulula’mba bo bwawama ne. Ifuukwilainga anweba bene. Akyumvwai byaubile Natalie.a Waambile’mba: “Nakebelenga masongola awama. Bino naishile kwikimona kuba’mba kechi nkasongolwa bulongo ne, inge natwajijila na bwikalo bo naikalanga. Pa sukulu balunda nami bonse bajinga bingi na maana. Nangwa byonkabyo kechi bafuukulanga bya maana ne. Bakambwe batolangapotu. Ne amiwa najinga na bakambwe bavula. Bwikalo bwa uno mutundu bwandetelanga bingi milanguluko.”

Natalie watendekele kufunda Baibolo na Bakamonyi ba kwa Yehoba. Waambile’mba: “Mu Bakamonyi ba kwa Yehoba namwene bakyanyike baji mu masongola baji bingi na lusekelo. Nangwa kya kuba kechi kyapelele ne, pachepache napimpwile bwikalo bwami.” Ki ka kyafumamo? Natalie waambile’mba: “Nakebanga kusongolwa ku mwanamulume ye nakebeshanga. Byo papichile moba nasongwelwe ku mwanamulume waitabila mu byo naitabilamo. Natemwa bingi Lesa pa kumpa bwikalo bwa kisemi bwawama bingi.”

3 Langulukainga pa Bikafumamo pa Kupitapo Myaka Yavula

Pa kuba’mba mubulenga kulangulukatu bya pa kyonkakyo kimye, mwafwainwa kuyuka bulongo biji kulutwe byo mukeba ne kunengezha bulongo byo mukebifikizha. (Byambo bya Mana 21:5) Pa kulanguluka pa bya kulutwe, kange mulangulukengatu kupelela pa myaka 70 nangwa 80 ikala muntu pa kyalo ne. Ifwanyikizhainga kwikala bwikalo bwa kulutwe bwawama bwa myaka ne myaka bwatongolwapo mu Baibolo.

Baibolo walumbulula’mba kupichila mu kitapisho kya bukuzhi kya kwa Kilishitu Yesu, Lesa wanengezhezha bantu kwikala na bumi bwa myaka ne myaka. (Mateo 20:28; Loma 6:23) Lesa walaya kuba’mba katatakatu bwikalo bo akebelenga bantu kwikala pano pa ntanda bufike. Bonse batemwa Lesa bakekala bwikalo bwawama bwa myaka ne myaka mu ntanda ipya. (Salamo 37:11; Lumwekesho 21:3-5) Buno bwikalo bobo mukekala inge kemulanguluke pa bya kulutwe.

4 Ubainga byo Mwafuukula

Mwakonsha kuba byepi umvwe mukeba kukekala bwikalo bwa kulutwe bo betulaya? Tendekelaipo kufunda Mambo a Lesa. (Yoano 17:3) Kufunda Baibolo kukemulengela kushiinwa kuba’mba milaye ya Lesa ya bintu bya kulutwe ya kine. Luno lwitabilo lukemulengela kwikala na kizaku kya kupimpula bwikalo bwenu pa kuba’mba mwitabilwe kwi Lesa.

Akyumvwai byajinga bwikalo bwa ba Michael. Bashimikizha’mba: “Natendekele kutoma maalwa ne kupepa bizhima na myaka 12. Najinga mu jibumba ja bambanzhi kabiji kechi nalangulukanga’mba nkafikizha myaka 30 na bumi ne. Bukaji ne kumvwa bibi ku michima kwandengelanga kukeba kwiipaya pa bimye byavula. Nayukile kuba’mba ko kiji kine kintu kyo twaikela na bumi, bino kechi nekiyukile ne.” Ba Michael byo bajinga pa sukulu, mukwabo wa mu jibumba ja bambanzhi watendekele kufunda Baibolo na Bakamonyi ba kwa Yehoba. Ba Michael nabo batendekele kufunda Baibolo.

Ba Michael byo bafunjile mu Baibolo bibalengejile kwikala na mweno ya kimye kya kulutwe yawama. Bashimikizha’mba: “Nafunjile kuba’mba kulutwe na lwendo ino ntanda ikekala paladisa kabiji bantu bakekala mutende kwa kubula binyenge. Ne amiwa nekimwene kuba’mba nafwainwa kukekalamo. Pano natele muchima pa kuwamisha bulunda bwami ne Yehoba. Bino kechi kyapelele ne. Nangwatu byo natendekele kufunda Baibolo, bimye bimo natomanga maalwa ne kupendwa bingi. Kabiji najinga ne na mukambwe.”

Pano ba Michael bakonsheshe byepi kusankilapo bino byubilo nangwa kya kuba kibakatazhanga? Baambile’mba: “Bamfunjishanga Baibolo bantundaikile kutanga Baibolo pa juba pa juba ne kulenga bulunda na bantu batokesha Lesa ku muchima. Nekimwene kuba’mba balunda nami ba mu jibumba ja bambanzhi bo bandengelanga kubwela panyuma. Nangwa kya kuba bajinga nobe balongo bami, nalekele kupwanañana nabo.”

Ba Michael bebikijile bikonkwanyi bipi ne kusala byo bafwainwa kunemekesha, kuba bino kwibalengejile kufikizha kikonkwanyi kyabo kikatampe kya kwikela mwayila mafunde a Lesa. Ne anweba mwakonsha kuba bino. Nembai bikonkwanyi byenu ne byo musakubanga pa kuba’mba mukebifikizhe. Bulai byo mwafuukula bakwimukwashako, kabiji babulai ne kwimuketa pa kuba’mba bamonenga inge mubena kununguluka.

Kange mulalaikenga kufunda pe Lesa ne kulondela lutangijilo lwanji mu bwikalo bwenu ne. Ubainga bintu bya kwimulengela kutemwa Lesa ne Mambo anji, Baibolo. Mambo a Lesa aamba pa muntu ulondela mafunde a mu Baibolo kuba’mba: “Byonse byo akoba bikalumbuluka bulongo.”—Salamo 1:1-3.

[Tubyambo twa mushi]