Ñanyi Kimye Kikeya Nkondo Ya Amagedonyi?

“Ponkapo namwene jibumba jikatampe jo babula kukonsha kubala ku muntu nangwa umo jafumine mu bisaka byonse, mu mikoka yonse, mu mitundu yonse ya bantu ne mu njimi yonse . . . bapita mu malwa akatampe.”—LUMWEKESHO 7:9, 14.

NKONDO ya Amagedonyi yafwenya kala pepi. Twayuka byepi?

Mu ano moba, kuji bantu bakwatankana babena kwingijila Yehoba ne kwikela mwayila mafunde anji a mu Baibolo. Mu bukwasho bwa Lesa, bantu bafuma mu bisaka byonse, mu mikoka yonse, mu mitundu yonse ya bantu ne mu njimi yonse bakwatankana pamo ne kulenga bwanabwankazhi. Bantu bakwatankana bino ke Bakamonyi ba kwa Yehoba.—Yoano 13:35.

Katatakatu Satana apwizhe pamo mazhita anji ne kutula bulemo bantu ba mutende bamweka nobe kafwako wa kwibazhikijila. (Ezikyo 38:8-12; Lumwekesho 16:13, 14, 16) Twakonsha kushiinwa byepi kuba’mba kino kikamweka? Baibolo waamba pa bintu bitukwasha kuyuka kimye kikafikilamo nkondo ya Amagedonyi. Tubena kwimwena na meso biyukilo bya kwiya kwayo.

Bintu byo Mwimwena na Meso Bibena Kufika

Baana ba bwanga ba kwa Yesu bamushikishe pa byo bakonsheshe kuyuka’mba “mpelo ya buno bwikalo” yafwenya pepi. (Mateo 24:3) Yesu wibakumbwile kupichila mu kwamba pa bintu bikamweka kulutwe, waambile’mba, “kisaka kikalukuka kisaka kikwabo ne bufumu bukalukuka bufumu bukwabo, kabiji kukekala bipowe bya nzala ne bitentanshi kuku ne kuku.” Kabiji waambile ne kuba’mba: “Bino bintu byonse yo ntatwilo ya bisanso.” (Mateo 24:7, 8) Mutumwa Paulo watelele oa moba amba, “moba akapelako,” ne kuba’mba akekala “bimye byakatazha.” (2 Timoti 3:1) Nanchi mulanguluka’mba buno bungauzhi bwaamba pa bintu bibena kumweka mu ano moba nyi?

Pano mambo ka ano moba kyo akatezha bibye? Mutumwa Yoano waambapo kishinka kimo. Waambijile jimo kuba’mba Satana ne bandemona banji bo bashinkila pano pa ntanda bakashala na “kakimye kacheche” ka kwingijilamo mingilo yanji. Mu ano moba Satana watongolwa’mba “wazhingila bingi.” (Lumwekesho 12:7-12) Nanchi mumona bantu bavula mwaya ntanda byo bakanama michima nyi?

Yesu waambile’mba nangwa kya kuba ano moba akakatazha, bino mwingilo mukatampe ukengijiwa. Waambile’mba: “Ano mambo awama a Bufumu akasapwilwa pano pa ntanda ponse kuba amba ba mu bisaka byonse bya bantu bakeomvwe, apa bino mpelo ikafike.” (Mateo 24:14) Lelo jino, mu byalo kukila pa 235, Bakamonyi ba kwa Yehoba babena kusapwila mambo awama a Bufumu bwa Lesa mu milaka kukila pa 500. Magazini a Kyamba kya Usopa ne Awake!, beasampanya mwaya ntanda kukila magazini akwabo. Kabiji Bakamonyi batuntulula Baibolo mu milaka kukila pa 100. Bengila ino mingilo bepana abo bene kabiji uno mwingilo utundaikwa na bupe bwa kwitemenwa. Nanchi uno mwingilo wa kusapwila ufikizha bungauzhi bwa kwa Yesu nyi?

Baibolo waamba pa bintu bikamweka pa kunangijila ku nkondo ya kwa Yehoba na balwanyi banji. Twayai twisambe pa bungauzhi busatu bo mubena kwimwena na meso.

Bintu byo Mukemwena Bikamweka Katataka

Bungauzhi 1. Baibolo waamba’mba mikoka ya bantu ikabijika’mba: “Mutende ne luzhikijilo.” Bakalanguluka’mba twapwisha makatazho avula a bantu. Pa kuba bikalondelapo bikekala byo babula kuketekela.—1 Tesalonika 5:1-3.

Bungauzhi 2. Kepo makafulumende akalukilamo bupopweshi bwa bubela. Mu Baibolo, lukinyama wimenako makafulumende, ne mwanamukazhi uji pa lukinyama wimenako bupopweshi bwa bubela pano pa ntanda ponse. (Lumwekesho 17:3, 15-18) Lukinyama wa kifwanyikizho ukoba kyaswa muchima wa Lesa kwakubula kuyuka byo akonauna bupopweshi bwa bubela bubepekezha kwimenako Lesa.

Mutumwa Yoano walumbulula mu bukifwanyikizho byo kikamweka’mba: “Aya nsengo jikumi ne awa lukinyama ye wajikumona bakamushikwa pite, kumonauna ne kumuvūla kabiji bakaja nyama yanji ne kumusokatu pelu mu mujilo. Mambo Lesa ye wabika mu michima yabo kuba kyaswa muchima wanji.”—Lumwekesho 17:16, 17.

Bungauzhi 3. Panyuma ya kuzhiisha bupopweshi bwa bubela, Satana ukapwizha pamo bantu ba mu mikoka yonse bakulukuka bapopweshi ba Yehoba Lesa.—Lumwekesho 7:14; Mateo 24:21.

Nga Anweba Kikekala Byepi?

Inge mukyangye kufundapo bya mu Baibolo, kechi kyakonsha kwimupelela kwitaba’mba bintu byo twaambapo bikamweka ne. Pano bino kuji bishinka bitulengela kushiinwa kuba’mba byonse byo baamba mu bungauzhi katatakatu bikafike. Kabiji bungauzhi bwavula bwafika kala bwitulengela kushiinwa.a

Nga mambo ka akubujila kumonapo ka kimye ka kwipuzha Bakamonyi ba kwa Yehoba kibalengela kushiinwa’mba, “nkondo ya aja juba jikatampe ja Lesa Wabulume Bonse” yafwenya kala pepi kabiji ne ene mambo o mwafwainwa kubujila kwakamwa? Bambilai besambe nenu byaamba Baibolo pa byo mwafwainwa kuba pa kuba’mba mukekale pa bantu bo akazhikijila Yehoba Lesa. (Lumwekesho 16:14) Byo mukafunda byakonsha kwimulengela kubula kwakamwa na bikamweka kulutwe.

[Tubyambo twa mushi]

[Mabulañano pa peja 8]

Nanchi mwingilo wa Bakamonyi ba kwa Yehoba ubena kufikizha bungauzhi bwa mu Baibolo nyi?