Bantu Bepuzha’mba . . .

Mambo ka Bakamonyi ba kwa Yehoba o bayila na Kusapwila ku Nzubo ku Nzubo?

▪ Mu Baibolo muji mukambizho Yesu ye akambizhe baana banji ba bwanga wa kuba’mba: “Yainga na kufunjisha bantu ba mu bisaka byonse kwikala ke baana bami ba bwanga, . . . ne kwibafunjisha.” (Mateo 28:19, 20) Nanchi uno mukambizho wa bena Kilishitu bonse nyi? Baana ba bwanga batanshi ba kwa Yesu bayukile kuba’mba byobyo kiji. Mutumwa Petelo waambile’mba: “Witukambizhe kusapwila bantu ne kwibabujisha bulongo.” (Byubilo 10:42) Kabiji mutumwa Paulo naye wanembele’mba: “Kyamfwainwa amba ñingile uno mwingilo. Malwa o ami umvwe nabula kusapwila mambo awama!”—1 Kolinda 9:16.

Paulo ne Petelo kechi bo bonkatu baumvwijile ne, ne bena Kilishitu batanshi nabo baumvwijile mukambizho wa kwa Yesu. Banemekele bingi mwingilo wa kusapwila mu bwikalo bwabo. (Byubilo 5:28-32, 41, 42) Bakamonyi ba kwa Yehoba nabo bamukokela uno mukambizho. Basapwila mambo awama onka asapwilangapo Yesu pa “Bufumu bwa mwiulu.”—Mateo 10:7.

Bañanyi bobabulako ano mambo awama a Bufumu? Yesu waambile’mba bafwainwa kusapwila ku bantu bonse mwaya ntanda. Waambijile baana banji ba bwanga amba: “Mukekala batumonyi bami . . . monse mwapela ntanda.” (Byubilo 1:8) Kabiji wibabujile jimo kuba’mba mpelo ya buno bwikalo saka ikyangye kufika “ano mambo awama a Bufumu akasapwilwa pano pa ntanda ponse kuba amba ba mu bisaka byonse bya bantu bakeomvwe.” (Mateo 24:14) Bena Kilishitu batanshi nabo byobyo baubanga, basapwilanga bantu bonse, kechi ku bayukanetu bonka nangwa bantu babula mu bupopweshi ne. (Kolose 1:23; 1 Timoti 2:3, 4) Kyo kimotu, Bakamonyi ba kwa Yehoba nabo basapwilatu bantu bonse.a

Ñanyi jishinda jikatampe jo basampenyamo mambo awama a Bufumu? Yesu wayukile kwakutana bantu bavula bakusapwila, watumine baana banji ba bwanga kuya na kusapwila mu mizhi ikatampe ne icheche, ku mazubo a bantu. (Mateo 10:7, 11, 12) Ne panyumatu ya lufu ne lusanguko lwa kwa Yesu, baana banji ba bwanga batwajijile kusapwila “ku nzubo ku nzubo.” (Byubilo 5:42) Byonkatu byaubanga Yesu, nabo basapwilanga konse ko batananga bantu ne mu mapunzha mutanwa bantu bavula. (Yoano 4:7-26; 18:20; Byubilo 17:17) Lelo jino Bakamonyi ba kwa Yehoba bengijisha ano mashinda antu amo pa kusapwila ku bantu bonse.

Yesu waambile kuba’mba kechi bonse bakomvwa ne. (Mateo 10:14; 24:37-39) Nanchi kino kyakonsha kulengela bena Kilishitu kuleka kusapwila nyi? Akilangulukai pa kino: Umvwe muji pa jibumba ja babena kupulusha bantu kwapita kitentanshi kikatampe, nanchi mwafwainwa kwikileka kukeba bakupulusha umvwe mwatanakotu bacheche saka mwakeba kimye kyabaya nyi? Ine, mwafwainwa kuchinchika umvwe mukeba kupulushakotu nangwa umo. Yesu watundaikile baana banji ba bwanga kuchinchika umvwe bamona’mba bakonsha kumvwa mambo awama a Bufumu bwa Lesa mo bakiji. (Mateo 10:23; 1 Timoti 4:16) Kupichila mu kuya na kukeba bantu ba uno mutundu ku nzubo ku nzubo, Bakamonyi ba kwa Yehoba bamwesha byo batemwa Lesa ne bantu mambo bano bantu bakakonshatu kupuluka inge baumvwa ne kukokela mambo a Bufumu.—Mateo 22:37-39; 2 Tesalonika 1:8.

Uno magazini ye mubena kutanga muji ano mambo a mu Baibolo. Inge mukeba kuyukilapo byavula, mukabule Bakamonyi ba kwa Yehoba umvwe bemufwakesha jikwabo nangwa tuminai nkalata banembi ba uno magazini.

[Tubyambo twa mushi]