Mosesa Mwanamulume Wipelwile

NANCHI KWIPELULA KULUMBULULA KA? Kwipelula kwavwangamo kubula kwilundumika nangwa kwitota. Muntu wipelula kechi wimona’mba wanema kukila bakwabo ne. Muntu wipelula uvuluka kuba’mba mbulwa kulumbuluka kabiji uswa kuba’mba ulubankanya.

MOSESA WIPELWILE BYEPI? Mosesa kechi walekele kifulo kumulengela kwilundumika ne. Javula, inge muntu bamupa kifulo popo ayukanyikwa kana wipelula nangwa ne. Robert G. Ingersoll waambile’mba: “Bantu bavula bakonsha kuchinchika lumanamo. Pano bino inge mukeba kuyuka yeo muntu byoaji mupai kifulo.” Pano bino Mosesa wajinga wakumwenako wawama mu kwipelula. Mu ñanyi jishinda?

Mosesa bamupele kifulo kikatampe bingi, mambo Yehoba wamutongwele kutangijila bena Isalela. Pano bino, kino kechi kyalengejile Mosesa kwitota ne. Akilangulukai pa jishinda jawama jo akumbwijilemo bwipuzho bwakosa bwaambilenga pa buswanyi. (Kubala 27:1-11) Buno bwipuzho bwakosele bingi mambo kyonse kyo bashi bakafuukule inge kyajinga kya kulondela ne bisemi bya kulutwe.

Mosesa wakumbwile byepi? Abya walangulukile kuba’mba byo ajinga ntangi wa bena Isalela, wafwainwa kuchiba oa mambo nyi? Nanchi Mosesa waketekejile mu maana anji mwine, mu byo apichilemo pa myaka yavula nangwa pa byo ayuka ndangulukilo ya Yehoba nyi?

Muntu wilundumika inge byobyo aubile. Bino Mosesa kechi byobyo aubile ne. Jishimikila ja mu Baibolo jitubula’mba: “Mosesa waletele mambo abo kwi Yehoba.” (Kubala 27:5) Akilangulukai pa kino! Nangwatu panyuma ya kutangijila bena Isalela pa myaka 40, Mosesa kechi wiketekejile aye mwine ne, waketekejile mwi Yehoba. Mu bino momo tumwena kwipelula kwa kwa Mosesa.

Mosesa kechi walangulukile’mba ye yenkatu uji na lūsa pa bintu ne. Wasangalele kimye Yehoba kyo atongwele bena Isalela bakwabo kwikala bangauzhi pamo ne aye. (Kubala 11:24-29) Bako banji byo bamwambijile kuba’mba atongolepo bantu bamo ba kumukwashako mingilo, Mosesa wipelwile kabiji waumvwijile byo bamubujile. (Kulupuka 18:13-24) Kabiji byo kwashajile pacheche kuba’mba afwe, Mosesa nangwa kya kuba wakijinga na bulume, waambijile Yehoba kutongola muntu wa kumuswana. Yehoba byo atongwele Yoshua kwingila mingilo, Mosesa wamutundaikile na muchima yense ne kwambila bantu kumukokela Yoshua byo akebatangijilanga mu Ntanda ya Mulaye. (Kubala 27:15-18; Mpitulukilo ya mu mizhilo 31:3-6; 34:7) Kwambatu kine, Mosesa wikimwene kwikala jishuko bingi kutangijila bena Isalela mu mpopwelo. Pano bino kechi walekele kifulo kumulengela kukebangatu byamuwamina ne.

TWAFUNJILAKO KA? Twafunjilako kuba’mba kechi twafwainwa kuleka bulume, kifulo, nangwa maana akuyuka bintu kwitulengela kwilundumika ne. Vulukainga kuba’mba: Pa kuba’mba Yehoba e twingijishenga, twafwainwa kwipelula. (1 Samwela 15:17) Inge twipelula kya kine, tukebikako kulondela lujimuno lwa mu Baibolo lwa kuba’mba: “Ketekela mwi Yehoba na muchima wobe yense, ne kuta muchima ku milangwe yobe obe mwine ne.”—Byambo bya Mana 3:5, 6.

Kyakumwenako kya kwa Mosesa kibena kwitufunjisha ne kuba’mba kechi twafwainwa kuta muchima pa bwikalo bwetu nangwa pa kifulo kyo tuji nakyo ne.

Abya tumwenamo byawama mu kulondela kwipelula kwa kwa Mosesa nyi? Kwa kubula nangwa kuzhinaukatu ne! Inge twipelula, tulengela bakwetu bwikalo kuwama ne kwitutemwa. Ne kyakilamo kunema tulengela Yehoba Lesa kwitutemwa, mwine mwina kino kyubilo. (Salamo 18:35) “Lesa ukana bantu belundumika, pakuba umwesha lusa lwanji ku bepelula.” (1 Petelo 5:5) Bino bintu bitulengela kukebesha kulondela kwipelula kwa kwa Mosesa.