FWENYAI KWIPI NE LESA
‘Aye ye Lesa . . . wa Bomi’
Nanchi lufu lwakila Lesa nyi? Ine. Lufu nangwa “mulwanyi’ mukwabotu wakonsha kukila byepi “Lesa wa Bulume Bonse”? (1 Kolinda 15:26; Kulupuka 6:3) Lesa uji na bulume bwa kufumyapo lufu kupichila mu lusanguko, kabiji bino byo byo alaya kuba mu ntanda ipya.a Twayuka byepi kuba’mba uno mulaye wakine? Mwana Lesa, aye Yesu waambile byambo bitulengela kwikala na luketekelo.—Tangai Mateo 22:31, 32.
Pa kwamba ku Basadusea babujile kwitabila mu lusanguko, Yesu waambile’mba: “Pa mambo a kusangula bafu, nanchi kechi mwatangapo kala Lesa byo emwambijile, amba: ‘Amiwa ne Lesa wa Abalahama, Lesa wa Izaka ne Lesa wa Yakoba nenyi’? Aye kechi Lesa wa bafu ne, ke wa bomi.” Yesu waambilenga pa mwisambo wajinga ne Mosesa ne Lesa mu kipupu kyatemenenga mujilo mu 1514 B.C.E. (Kulupuka 3:1-6) Kwesakana na byaambile Yesu, Yehoba byo aambijile Mosesa amba: “Amiwa ne Lesa wa Abalahama, ne Lesa wa Izaka, ne Lesa wa Yakoba” bimwesha kuba’mba lusanguko lukekalako. Mu ñanyi jishinda?
Akimonai byo kyajinga. Kimye Yehoba kyo esambilenga ne Mosesa, mushakulu Abalahama, Izaka ne Yakoba saka bafwa kala, Abalahama wafwile na myaka 329, Izaka na myaka 224, ne Yakoba na myaka 197. Pano bino Yehoba waambile’mba ‘ne’ Lesa kechi amba ‘najinga’ Lesa ne. Yehoba waambilenga pa bano bashakulu basatu nobe po bakiji. Mambo ka?
Yesu waambile’mba: “Aye [Yehoba] kechi Lesa wa bafu ne, ke wa bomi.” Akilangulukaipo pacheche mwatala bino byambo. Inge kechi kwajinga lusanguko ne, Abalahama, Izaka ne Yakoba inge batwajijile kwikala mu bilende. Ko kuba’mba, Yehoba inge wajinga Lesa wa bafwa. Inge kyaikala bino kyakonsha kulumbulula’mba lufu lwakila Yehoba, uba nobe kechi wakonsha kusangula bakalume banji ku lufu ne.
Pano twakonsha kwambapo’mba ka pe Abalahama, Izaka, Yakoba ne bakwabotu bafwa bamwingijilanga Yehoba? Yesu waambile’mba: “Bonse kwi aye ke bomi.” (Luka 20:38) Kya kine, mulaye wa kwa Yehoba wa kusangula bakalume banji bakishinka bamwingijilanga bafwile kala ukafika mambo wibambapo nobe bakiji bomi. (Loma 4:16, 17) Yehoba ukatwajijila kwibavuluka bonse kufikatu ne kimye kyo akebasangula.
Nanchi luketekelo lwa kumonañana jibiji na batemwe betu bafwa mwilumvwa bulongo nyi? Yukai kuba’mba Yehoba uji na bulume bwa kusangula bafwa. Kafwako kintu nangwa kimo kyakonsha kumulengela kubula kufikizha mulaye wanji wa kusangula bafwa ne. Nga mambo ka akubujila kuyukilapo byavula pa mulaye wa lusanguko ne pe Lesa ukafikizha uno mulaye? Kuba bino kukemulengela kufwenya kwipi ne Yehoba ‘Lesa wa . . . bomi.’
KUTANGA BAIBOLO MU FEBRUARY
[Tubyambo twa mushi]
a Pa kuba’mba muyuke byavula pa mulaye wa Lesa wa lusanguko ne wa kwikala na bumi mu ntanda ipya ya bololoke, monai kitango 7 mu buku wa Nanchi Baibolo Kine Ufunjisha’mba Ka? wanembwa na Bakamonyi ba kwa Yehoba.
[Mabulañano pa peja 7]
Yehoba uji na bulume bwakila lufu