FUNJISHAINGA BAANA BENU
Petelo ne Ananyasa Babepele Twakonsha Kufunjilako ka?
Byonka byo mwayukila jimo, bubela ke kwamba kintu kyo wayuka’mba kechi kya kine ne. Abya wakibepapo kala nyi?—a Nangwatu bakulumpe batemwa ne Lesa bakibepapo kala. Kampe mwayuka muntu watongolwa mu Baibolo wabepele. Jizhina janji Petelo, umo pa batumwa ba kwa Yesu 12. Pano twayai tuteleke ku jishimikila pa kuba’mba tuyuke kyamulengejile kubepa.
Yesu bamukasa, bamutwala ku nzubo ya ñanga mukatampe. Byo kyafika pakachi ka bufuku, Petelo watwela mu kipango kya nzubo ya ñanga mukatampe mu bufyamfya. Byo aikala nakota mujilo, nsongwakazhi wamwingilo wa ñanga mukatampe wa muyuka. Wamwambila’mba: “Ne anweba mwajinga ne Yesu.” Na mambo a moyo, wakana’mba kechi wajinga nanji ne.
Baibolo wamba kuba’mba, “nsongwakazhi mukwabo wamumwene.” Waamba’mba: “Uno muntu wajinga ne Yesu.” Pano napo Petelo wakana. Papitatu kakimye kacheche, bakwabo nabo baiya kwi Petelo ne kumwambila’mba: “Kwambatu kine ne obewa wi mwananji wa bwanga.”
Petelo waumvwa moyo. Pano ja busatu wabepa ne kwamba’mba: “Amiwa kechi namuyuka uno muntu ne!” Shikombwe wakokola. Yesu watala Petelo, kabiji wavuluka kuba’mba Yesu wamwambijile’mba: “Shikombwe saka akyangye kukokola, usakunkana jisatu.” Petelo wajila jibingo. Waumvwa kutama.
Nanchi bintu bya uno mutundu byakonsha kukumwekela nyi?—Kampepo mwakonsha kwikala pa sukulu, pano bakwenu mo mufunjila batendeka kwamba pa Bakamonyi ba kwa Yehoba. Umo waamba’mba: “Kechi bapana mushingi ku mbandela ne.” Kabiji mukwabo naye waamba’mba: “Kechi bakeba kulwilako kyalo kyabo ne.” Mukwabo naye amba: “Kechi bena Kilishitu bakine ne, mambo kechi basekelela kusemwa kwa Yesu ne.” Pano mukwabo waalulukila ko muji ne kwimwipuzha’mba: “Wi Kamonyi wa kwa Yehoba nyi?” Ukakumbula mba ka?—
Mwafwainwa kwinengezhezha jimo mwakukumbwila bino byonse saka bikyangye kwimumwekela. Petelo kechi winengezhezhe ne. Byo ba mubazhimwine, wabepele. Pano bino kyo aubile kya mukolele bingi ku muchima, bino Lesa wamulekejileko mambo.
Mwana wa bwanga wa Yesu mukwabo wabepele wajinga Ananyasa. Bino aye nangwa mukazhanji Safila, Lesa kechi wibalekejileko mambo ne. Safila waumvwañene na mwatawanji kuba’mba babepe. Twayai tumone Lesa kyo abujile kulekelako mambo ba Ananyasa ne Safila.
Byo papichile moba jikumi kufuma Yesu po ashijile baana banji ba bwanga ne kubwela kwi Lesa mwiulu, bantu nobe 3,000 babatizhiwe mu Yelusalema. Bavula bafumine mu mapunzha a kwalepa kwiya ku Kijiilo kya Pentekosita, kabiji byo baikele baana ba bwanga ba kwa Yesu bakebelenga kwikalako na kimye kyabaya pa kuba’mba bafunjilepo byavula pa lwitabilo lwabo lwakatataka. Onkao mambo baana ba bwanga ba kwa Yesu baingijishanga mali abo kupotamo bya kuja.
Ananyasa ne mukazhanji bapoteshepo bipe bimo pa kuba’mba batane mali a kujishishamo bano bena Kilishitu babatizhiwe katataka. Ananyasa byo aletele mali ku batumwa, waambile’mba waleta mali onse o apoteshe bipe. Bino kechi waletele onse ne. Wilamijilepo amo. Lesa wikisolwele kino kwi Petelo, kepo Petelo aambijile Ananyasa amba: “Kechi wabepa bantu ne, wabepa Lesa.” Ponkapotu Ananyasa waponene panshi ne kufwa. Byo papichile maola asatu mukazhanji waishile. Byo abujile kuyuka kyamwekela mwatawanji, naye wabepele kabiji waponene panshi ne kufwa.
Twafunjilako kintu kyanema bingi, kuba’mba kyanema kwamba bukine. Bonsetu twafwainwa kufunjilako. Pano bino bonse twakibepapo kala kikatakata byo twakijinga banyike. Nanchi mwi balusekelo kuyuka kuba’mba Yehoba wimutemwa kabiji ukemulekela mambo byonka byo alekejile Petelo nyi?—Vulukai kuba’mba twafwainwa kwambanga kine. Inge twabepa, twafwainwa kulombanga Lesa kwitulekelako mambo. Kyamweka bino byo byaubile Petelo, kabiji bamulekejileko mambo. Inge twibikishako kubula kukabepapo jibiji, ne atweba Lesa uketulekela mambo.
Tangai mu Baibolo Wenu
Byubilo 2:38-42; 4:32-37; 5:1-11
[Tubyambo twa mushi]
a Inge mubena kutanga na mwana, kakishilwa kabena kwimubula’mba mwafwainwa kutulumanako ne kwambila mwana amba akumbule.