NANCHI MWAYUKA NYI?

Mambo ka muzhi wa Ninevwa wa kukala kyo bamutelelanga’mba “muzhi mo bechila mashi”?

Ninevwa wajinga muzhi mukatampe wa Bufumu bwa bena Asilya. Wajinga muzhi waile nkuwa na mambo a bipango byawama ne mazubo a kupopwelamo, mikwakwa ikatampe ne nsakwa. Ngauzhi waambanga mulaka wa Kihebelu aye Nahuma wamutele amba “muzhi mo bechila mashi.”—Nahuma 3:1.

Ino ntelelo ya uno muzhi yaijilemo bingi mambo bantu bafumanga ku jilapa ja kwa Senakelibu jaikejile mu Ninevwa bemwenanga bumbanzhi bwaubiwanga mu Asilya. Kipikichala kimo kimwesha byo bamanyikanga muntu walaala panshi ye babena kukoka lujimi. Byambo byanembwa pa mabwe bimwesha kuba’mba bazha bebakashilanga ntambo ku myona nangwa ku mivumbo saka baya mu munongo. Batalanga pa bazha bavwalanga mu nshingo byamwekanga nobe malungo byonka byavwalanga bamfumu babo ku mitwe.

Wafunda pa bya bwikalo bwa bena Asilya aye Archibald Henry Sayce waamba pa byubilo byatama byajinga mu uno muzhi pa nyuma ya kumushinda kuba’mba: “Mitwe ya bantu bafwa imwesha kushinda kwaubiwe mu uno muzhi, bansongwalume ne bansongwakazhi bebasokelenga bomi nangwa kwibamanyika mu jishinda jikwabo jatama, babalume bakulumpe bebapopanga, kwibasuba bikoba saka bakiji bomi, kwi basaba meso, kwibachiba maboko ne maulu, matwi ne myona.”

Mambo ka Bayudea kyo bazhokolosheshangapo kalupango pa musemi wa mazubo abo?

Bayudea bebakambizhe kwi Lesa amba: “Byo mukatunga nzubo ya katataka mukazhokoloshepo kalupango pa musemi peulu, kuchina’mba muntu wakapona panshi, ne kuleta luzhachisho lwa mashi pa nzubo yenu.”(Mpitulukilo ya mu mizhilo 22:8) Luno luzhikijilo lwanemene bingi, mambo kala Bayudea baikalanga pa misemi ya mazubo abo.

Mazubo avula abena Isalela ajinga na misemi yaselebala. Pa musemi pawamine bingi kwikalapo ne kwingijilapo mingilo imo, mambo pajinga mute kabiji papitanga mwela wawama bulongo. Mu kimye kya kisalo popo bayanga na kulaala. (1 Samwela 9:26) Banjimi baanyikangapo kajo saka bakyangye kutwala na kupela nangwa kwanyikapo makuyu ne mañanzañanza.—Yoshua 2:6.

Pa kupopwela Lesa wa kine nangwa bankishi baikalanga pa musemi. (Nehemiya 8:16-18; Yelemiya 19:13) Pa kushikimana juba, mutumwa Petelo wakanjijile peulu ya nzubo na kulomba. (Byubilo 10:9-16) Umvwe paikala kimfutele kya miñanzañanza mwawamanga bingi kukokolokela.

Buku wa kuba’mba The Land and the Book wamba’mba mazubo abena Isalela ajinga na ndandalashi ya kukanjijilapo kuya peulu ya nzubo, “pangye ya nzubo bino monka mukachi ka kipango.” Mwina nzubo wakonsheshe kwikila kufuma peulu ya nzubo kwa kubula kutwela mu nzubo. Kino kikwasha kumvwisha lujimuno lwa kwa Yesu lwa kunyema muzhi ye balukuka amba: “Muntu uji pa musemi wa nzubo kange akekile kuya na kusenda bintu byanji mu nzubo ne,”—Mateo 24:17.

[Kipikichala pa peja 10]

Kipikichala kya palubumbulu paji bashilika basenda mitwe ya balwanyi babo ne kwiitaya pa mulumba

[Byambo bya Muntu Ungi]

Erich Lessing/Art Resource, NY