FWENYAI KWIPI NE LESA
“Lombainga, Mukekitambula”
“Nkambo, tufunjishai bya kulomba.” (Luka 11:1) Bino byo byaambile mwana wa bwanga umo kwi Yesu. Pa kukumbula, Yesu waambile pa bishimpi bibiji bitufunjisha bya kulomba pa kuba’mba Lesa omvwe milombelo yetu. Umvwe kya kuba’mba muzhinauka inge Lesa umvwa milombelo yenu, musa kutemwa pa kumvwa byakumbwile Yesu.—Tangai Luka 11:5-13.
Kishimpi kitanshi kyaamba pa muntu ubena kulomba. (Luka 11:5-8) Mu kino kishimpi, muntu umo wafikilwe na mwenyi pakachi ka bufuku kabiji kechi wajinga na kajo ka kumupa ne. Kino kyamukatezhe bingi mwina nzubo. Nangwa kya kuba kyajinga pakachi ka bufuku, waile ku mulunda nanji na kulomba shinkwa. Mulunda nanji kimye kitanshi wakaine kubuka mambo aye ne kisemi kyanji balajile. Na mambo a lupata lwa mulunda nanji wajinga na mwenyi, wabukile ne kumupa kajo.a
Kino kishimpi kitufunjishapo ka pa mambo a kulomba? Yesu ubena kwitubula kuba’mba twafwainwa kwikala na mukoyo wa kulomba, kukeba, ne kukonkonsha. (Luka 11:9, 10) Mambo ka? Nanchi Yesu walumbulwilenga amba Lesa kechi umvwa milombelo yetu nenyi? Ine. Kishinka kyaambilengapo Yesu ke kya kuba’mba, Lesa ukumbula milombelo ya boba bamuketekela. Tumwesha kuba’mba tuji na lwitabilo umvwe twaikala na mukoyo wa kulomba. Kupichila mu kubwezhabwezhapo, tumwesha’mba tubena kukeba kintu kyo tubena kulomba. Kulomba kwa uno mutundu, kumwesha amba twaketekela Lesa kuba’mba usa kwitupa umvwe kintu kyo tubena kulomba kyailamo na kyaswa muchima wanji.—Mako 11:24; 1 Yoano 5:14.
Kishimpi kya bubiji kyaamba pa ‘umvwa milombelo,’ aye Yehoba. (Salamo 65:2) Yesu washikishe amba: “Ñanyi shetu mwi anweba, uba umvwe mwananji wamulomba jisabi, wamupa muloolo mu kifulo kya jisabi? nangwa wamulomba jike wamupa kaminye?” Mukumbu ke ine. Mambo kafwako nsemi wa butemwe wakonsha kupa baana banji bintu byakonsha kwibaletela lukatazho ne. Yesu walumbulwile kishimpi mo kyatajile amba: Umvwe bansemi bambulwa kulumbuluka ‘bayuka kupana byawama’ ku baana babo, “ko kuba amba Shenu wa mwiulu ukakilapo kupana mupashi wazhila” ko kuba’mba bupe bwakilamo kuwama ku baana banji ba pano pa ntanda ba mulomba.b—Luka 11:11-13; Mateo 7:11.
Nga kino kishimpi kitufunjishapo ka pe Yehoba ‘Umvwa milombelo’? Yesu witumwesha kuba’mba Yehoba ke Shetu upana bikeba baana banji. Bakalume ba kwa Yehoba bakasuluka kumubula byonse biji ku michima yabo. Byokiji kuba’mba Lesa wayuka bibawamina, batambwila byonse byo balomba nangwa kya kuba byapusana na bintu byo balombelenga.c
Kutanga Baibolo mu April
[Tubyambo twa mushi]
a Kishimpi kya kwa Yesu kimwesha byubilo ne bisho byubiwa mu bwikalo. Kutambwila benyi ke kintu kyanemene bingi ku Bayudea. Kisemi kyanengezhangatu shinkwa wa juba jimo. Javula balombangatu shinkwa inge wapwa. Inge bayanji, kisemi kyonse balalangatu kikungubule panshi mu kibamba kimo.
b Yesu javula waingijishanga byambo bya kuba’mba “ko kuba amba ukakilapo” pa kukwasha bantu kumvwisha Lesa byo akila bantu.
c Umvwe mukeba kuyuka byavula pa bya kulomba ne pa kuba’mba Lesa e mumvwe, monai kitango 17 mu buku wa Nanchi Baibolo Kine Ufunjisha’mba Ka? wanembwa na Bakamonyi ba kwa Yehoba.
[Mabulañano pa peja 11]
Lesa ukumbula milombelo ya boba bamuketekela