Lesa Wanengezha Jishinda ja Kupokolwelamo Bantu

Lesa walayile Abalahama kuba’mba “lukunwa” walayilwe ukafuma ku baana banji. Na mambo a yenka uno mulaye, bantu ba mu “bisaka byonse” mo bakamwena mapesho. (Ntendekelo 22:18) Munkananji Abalahama aye Yakoba waile ku Ijipita, ko akasemejile baana ne kwikala ke mukoka mukatampe wa Isalela.

Panyuma ya bino, byo bajinga mu Ijipita, Felo wajinga wakanama wamanyikilenga bena Isalela kufikatu ne kimye Lesa kyo aambijile ngauzhi Mosesa watangijile uno mukoka kwibafumya mu kyokya kyalo. Mu jishinda ja kukumya, waabenye mema pa kwabuka pa Kalunga Kachila. Palutwe kacheche, Lesa wapeele bena Isalela mizhilo, kubikapo ne yoya Mikambizho Jikumi pa kuba’mba ibatangijilenga ne kwibazhikijila. Ino mizhilo yaambilenga pa kupana kwa milambo pa kuba’mba mambo alekelwe. Lesa watangijile Mosesa kubula bena Isalela amba Lesa ukebatumina ngauzhi mukwabo. Uno ngauzhi ukekala “lukunwa” walaiwe.

Pepi na myaka bitota bitanu, Lesa walayile Mfumu Davida amba awa ukeya ko kuba’mba “lukunwa” walaiwe mu Edena ukalama pa bufumu myaka ne myaka. Auno ukekala Mesiasa Mupokolweshi watongolwa ne Lesa kupulusha bantu ne kubwezha Paladisa pano pa ntanda.

Kupichila mwi Davida ne bangauzhi bakwabo, Lesa pachepache wasolwejilepo bishinka bikwabo pe Mesiasa. Baambijile jimo kuba’mba ukekala wikepesha, wa lusa ne kuba’mba kimye kyo akatendeka kulama, nzala, bubi ne nkondo bikapwa. Bantu ne banyama bakekalanga mutende. Kubela, buyanji ne lufu kechi byo byakebelenga Lesa ne. Bino bintu byonse bikapwa kabiji bantu bafwile bakabuka ne kwikala pano pa ntanda.

Lesa waambijile jimo kupichila mu ngauzhi Mika kuba’mba Mesiasa ukasemekelwa mu Betelema kabiji kupichila mu ngauzhi Danyela waambile amba bakamwipaya. Bino Lesa ukasangula Mesiasa ne kumutongola kwikala Mfumu wa mwiulu. Danyela waambijile jimo kuba’mba Bufumu bwa Bumesiasa bo bukapinga pa makafulumende ajipo. Nanchi Mesiasa waishile, kwesakana na byaambile bungauzhi nyi?

—Byafuma mu Ntendekelo bitango 22-50, ne Kulupuka, Mpitulukilo ya mu Mizhilo, 2 Samwela, Masalamo, Isaya, Danyela, Mika, Zekaliya 9:9.

[Kitenguluzha pa peja 5]

JIZHINA JAZHILA JA LESA

Mu buku wa Ntendekelo 2:4, mo mutanwa jizhina ja Yehoba mu Baibolo kimye kitanshi. Jino jizhina jitanwamo pepi bimye 7,000 mu Binembelo Byazhila byanembelwe mu mulaka mutanshi. Jilumbulula kuba’mba “Wikela Monse Moasakila.” Kino kitulengela kuketekela kuba’mba Lesa uji na bulume bwa kufikizha byonse byo akeba ne milaye yanji.