“Twatana Mesiasa”!

Byo papichile bitota bya myaka bitanu na bibiji, bungauzhi bwaambilenga pe Mesiasa bwanembelwe mu buku wa Mika bwafikile. Yesu wasemekejilwe mu Betelema. Panyuma ya kupitapo myaka 30, mu 29 C.E., lubaji lumo lwa bungauzhi bwa kwa Danyela bwaambilenga pa kwiya kwakwa Mesiasa bwafikile. Yesu wabatizhiwe kabiji Lesa wamushingile na mupashi wazhila. Byonkatu byo kyaambijilwe jimo, Mesiasa nangwa amba Lukunwa ye bapembelejilenga pa kimye kyalepa wafikile!

Panyumatu ya bino, Yesu watendekele mwingilo wanji, wa ‘kusapwila mambo awama a bufumu bwa Lesa.’ (Luka 8:1) Monkatu mwaambijile bungauzhi, Yesu wajinga wa lusa, kutekanya ne kuta muchima bantu. Byo afunjishenga byakwashanga bingi bantu kabiji wabukanga bantu ne kupwisha ‘misango yonse ya bulema,’ kumwesha kuba’mba Lesa wajinga ne aye. (Mateo 4:23) Bantu bapusanapusana bayanga kwi Yesu ne kwamba’mba: “Twatana Mesiasa”!—Yoano 1:41.

Yesu waambijile jimo kuba’mba Bufumu bwanji saka bukyangye kutendeka kulama, mu ntanda mukekala makondo, bitentanshi ne makatazhotu akwabo. Wakambizhe bonse ‘kulabanga ne kukenketa.’—Mako 13:37.

Yesu wajinga walumbuluka, watwajijile kukokela Lesa, pano bino wajinga na balwanyi abo bamwipayile. Lufu lwanji lwajinga kitapisho kyalumbuluka kyapotele jibiji kintu kyaelele Adama ne Evwa ko kuba’mba bumi bwa myaka ne myaka mu Paladisa.

Lufu lwa kwa Yesu lwafikizhe bungauzhi kimye Lesa kyo asangwile Yesu nobe kilengwa kya mupashi kya bulume byo papichile moba asatu. Yesu byo asangwilwe wamwekele ku baana banji ba bwanga kukila pa 500. Saka akyangye kuya mwiulu, Yesu wakambizhe baana banji ba bwanga kusapwila mambo awama pe aye ne pa Bufumu “ku bantu ba mu bisaka byonse.” (Mateo 28:19) Baingijile byepi pakatampe mu mwingilo ye ebapeele?

—Byafuma mu Mateo, Mako, Luka, Yoano, 1 Kolinda.