Bimwesho Byaamba Pa Bekala Mwiulu

YEHOBA YE MWINE WAKILA

“Mwiulu mwajinga jitanda kabiji pajinga ne waikelepo. Ne aye waikelepo wamwekelenga nobe jibwe ja yasipa kabiji nobe jibwe ja salajasi, ne ku jitanda kwazhokolokele kakongolo kamwekelenga nobe jibwe ja emalode.”—Lumwekesho 4:2, 3.

“Kwajinga kyeya kyamuzhokolokele kyamwekelenga nobe kakongolo mu jikumbi ja mvula ubena kunoka. Abino byo byajinga kyeya kyamuzhokolokele. Kyamwekelenga nobe lukumo lwa Yehoba.”—Ezikyo 1:27, 28.

Bino bimwesho byamwene mutumwa Yoano ne ngauzhi Ezikyo byalumbulula lukumo lwa Mwine Lesa Wakila, aye Yehoba na bintu byo twakonsha kufwanyikizha, nabiji mabwe a buneme abembela, kakongolo, ne jitanda ja lukumo. Bino bimwesho bibena kumwesha’mba kwikala Yehoba kulengesha moyo, kuji bintu bya buya kabiji kuji mutende.

Lesa byo bamulumbulula pano byaswañana na byanembele nyimbi wa masalamo amba: “Yehoba ye mukatampe kabiji ye yenka wafwainwa kutotwa. Aye ulengesha bingi moyo kukila balesa bonse. Balesa bonse ba mitundu ya bantu bo balesa batutu, pakuba Yehoba ye walengele jiulu. Mu kyenyi kyanji muji lukumo ne munema; bulume ne buwame biji mu nzubo yanji yazhila.”—Salamo 96:4-6.

Nangwa kya kuba Yehoba ye Mwine Wakila, bino wituswisha kulomba kwi aye kabiji uteleka inge tubena kulomba. (Salamo 65:2) Lesa witutemwa bingi ne kwituta muchima. Kyo kyalengejile mutumwa Yoano kunemba’mba: “Lesa butemwe.”—1 Yoano 4:8.

YESU WIKALA PAMO NE LESA

“[Mwana wa bwanga aye Setepena], byo ayujilwe na mupashi wazhila, watajile mwiulu ne kumona lukumo lwa Lesa ne Yesu saka aimana ku kuboko kwa kilujo kwa Lesa, waambile’mba: ‘Talai! Namona jiulu jashinkuka ne Mwana muntu waimana ku kuboko kwa kilujo kya Lesa.’”—Byubilo 7:55, 56.

Setepena wamwene kino kimwesho saka papitatu moba acheche kufuma po baipaijile Yesu ku bantangi ba Bayudea bonka Setepena bo ambilenga nabo. Kino kimwesho kyamwesheshetu patoka kuba’mba Yesu bamusangwile ne kumupa kifulo kikatampe. Mutumwa Paulo wanembele pa kino amba: “[Yehoba] wasangwile [Yesu] kufuma ku bafu ne kumwikazha ku kuboko kwa kilujo mu mapunzha a mwiulu, kukila makafulumende onse, luusa lonse, bulume bonse, bunkambo bonse ne mazhina onse atelwa, kechi mu buno bwikalo bonkatu ne, bino ne mu bobwa bukeya.”—Efisesa 1:20, 21.

Byo apwishishe kwamba pa kifulo kikatampe kya kwa Yesu, mu Binembelo Paulo walumbulula’mba Yesu wata bingi muchima bantu byonkatu Yehoba byo ebata muchima. Byo aingijilenga mwingilo wanji pano pa ntanda, Yesu wabukile bakolwa, bajinga na misongo yapusana pusana, kabiji wasangwile ne bafu. Lufu lwanji lwa bukitapisho, lumwesha byo atemwa Yehoba ne bantu. (Efisesa 2:4, 5) Byo aimana ku kuboko kwa kilujo kwa Lesa, Yesu katatakatu akengijishe bulume bo bamupa kuleta mapesho akeyowa bantu ba kishinka pano pa ntanda ponse.

BAMALAIKA BENGIJILA LESA

“[Amiwa ngauzhi Danyela] natwajijile kutala kufikatu ne byo babikilepo matanda a bufumu kabiji awa wa Kala Kene [Yehoba] waikelepo. . . . Kabiji milyonyi umo bamwingijilenga, ne mamilyonyi 100 baimene ko ajinga.”—Danyela 7:9, 10.

Mu kino kimwesho mo amwene bya mwiulu, Danyela wamwene bamalaika bavula bingi. Kino kimwesho kyajinga kya kukumya. Bamalaika ke bilengwa bya mupashi biji bingi na maana ne bulume. Pa bano bamalaika paji baselafi ne bakelubi. Baibolo waamba pa bamalaika bimye kukila pa 250.

Bamalaika kechi bantu bajingako kala pano pa ntanda ne. Lesa walengele bamalaika saka akyangye kulenga bantu. Kitendekesho kya ntanda byo kyaajilwe, bamalaika bamweneko babijikilenga na lusekelo saka batakaika Lesa.—Yoba 38:4-7.

Jishinda jimo bamalaika ba kishinka jo bengijilamo Lesa, ke kwingila na muchima yense mu mwingilo wanema bingi ubena kwingijiwa mu ano moba. Uno mwingilo ke wa kusapwila mambo awama a Bufumu bwa Lesa. (Mateo 24:14) Mutumwa Yoano bamumwesheshe byo bengila uno mwingilo byo anembele’mba: “Namwene ne malaika mukwabo saka apita pakachi ka jiulu, kabiji wajinga na mambo awama a myaka ne myaka a kusapwila ku bekala pa ntanda, ku bisaka bya bantu byonse ne ku mikoka yonse ku ba njimi yonse ne ku mitundu yonse ya bantu.” (Lumwekesho 14:6) Nangwa kya kuba bamalaika kechi bamba ku bantu mu ano moba byonka byo baubanga kala ne, bino batangijila boba basapwila mambo awama ku bantu bakeba kufunda pe Lesa.

SATANA UBENA KONGOLA BANTU BAVULA BINGI

“Mwiulu mwabuukile nkondo: Mikela [Yesu Kilishitu] ne bamalaika banji balwile na nsuñunyi, ne uno nsuñunyi ne bamalaika banji balwile nabo bino bakankelwe kushinda, kabiji kechi mwajingapo mpunzha mwiulu ya kwikalamo abo ne. Onkao mambo, nsuñunyi mukatampe bamutayile panshi, yenka aye muloolo wa kala, utelwa’mba Diabola kabiji Satana, yenka ubena kujimbaika bantu ba pano pa ntanda ponse; bamutayile pa ntanda ne bamalaika banji bebatayile pamo nanji.”—Lumwekesho 12:7-9.

Mwiulu pa kimye kimo kechi mwajinga mutende ne. Kufumatu pa kulengwa kwa bantu, malaika umo wakebelenga kumupopwela. Wasatukijile Yehoba ne kwikala Satana. Jino jizhina jilumbulula’mba, “Wamilengulwila.” Bamalaika bamo nabo batendekele kutundaika buno bunsatuki kabiji batendekele kutelwa’mba bandemona. Bakanama bingi. Balengulula Yehoba kabiji balengela bantu bavula bingi kusatukila buntangi bwawama bwa Yehoba.

Satana ne bandemona bakanama bingi. Balwanyi ba bantu kabiji bo baleta buyanji pano pa ntanda. Satana waipayile banyama ne bamingilo ba kwa Yoba, mwanamulume wa kishinka. Kabiji waipaile baana jikumi ba kwa Yoba na “mwela mukatampe” wa kulwile nzubo mo bajinga. Panyuma ya bino, Satana wamanyikile Yoba na “bipute byakatazha kufumatu ku maulu anji kufika ne pa lumbwichi.”—Yoba 1:7-19; 2:7.

Katatakatu Satana bakamuzhiye. Kufumatu kimye kyo bamutaile pano pa ntanda, wayuka’mba “washalatu na kakimye kacheche.” (Lumwekesho 12:12) Satana kechi ukatwajijila kwikalako ne, ano ke mambo awama.

ABA BAKAFUMA PANO PA NTANDA

‘[Yesu] wamupotejile Lesa bantu na mashi anji kufuma mu mikoka yonse ne mu njimi ne mu mitundu ya bantu ne mu bisaka bya bantu, kabiji wibalula kwikala bufumu ne bañanga ba Lesa wetu, kabiji bakekala bamfumu ba kulama ntanda.’—Lumwekesho 5:9, 10.

Byonkatu Yesu byo bamusangwile kufuma pano pa ntanda ne kuya na kwikala mwiulu, ne bantu bavula byobyo kikekala. Yesu waambijile batumwa banji ba kishinka amba: “Mbena kuya na kwimunengezhezha mpunzha. Kabiji . . . nkabwela jibiji ne kwimutambula, kuba’mba akwa ko nkekala, ne anweba mukekale konka.”—Yoano 14:2, 3.

Aba bakaya mwiulu baji na mwingilo ye bakaya na kwingila. Bakengijilanga pamo ne Yesu mu Bufumu, buno bufumu bo bukalamanga bantu bonse pano pa ntanda kabiji bukebobila bintu byawama bingi. Buno bo Bufumu Yesu bo afunjishepo baana banji ba bwanga kulombapo mu lulombelo lwanji lwa kumwenako amba: “Tata wetu wa mwiulu, jizhina jenu jizhile. Bufumu bwenu bwiye. Kyaswa muchima wenu kyubiwe pano pa ntanda.”—Mateo 6:9, 10.

ABA BAKAYA MWIULU BYO BAKOBANGA

“Amiwa [mutumwa Yoano] naumvwine jiwi kufuma ku jitanda amba: ‘Tala! Tente wa Lesa uji na bantu, . . . kabiji ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.’”—Lumwekesho 21:3, 4.

Kino kimwesho kya bungauzhi kyaamba pa Bufumu bwa Lesa, bukalamwanga ne Yesu ne boba bakasangulwa ne kuya mwiulu, bakamufumyapo Satana kabiji ne kwalula ino ntanda ke paladisa. Bintu byonse bilengela bantu kumanama ne biletela bantu bulanda kechi bikekalako jibiji ne. Ne lufu nalo bakelufumyapo.

Pano kikekala byepi ku bantu bavula bafwa bakabula kuya mwiulu inge basangulwa? Bakebapa bumi bwa myaka ne myaka kabiji bakekalanga pano pa ntanda mu Paladisa myaka ne myaka.—Luka 23:43.