Mepuzho Afuma Ku Batanga

Mambo ka Bakamonyi ba kwa Yehoba o balengela bipikichala bya mutumwa Paulo na jibala?

Kishinka ke kya kuba’mba kafwako nangwa umo lelo jino wayuka byamwekanga Paulo ne. Bipikichala bitaanwa mu mabuku etu ke bipikichalatu bilenga basendwe kwesakana na bishinka byataaine bapoya bya kupoyapoya.

Nangwa byonkabyo, kuji bintu bimo bitukwasha kuyuka byamwekanga Paulo. Zion’s Watch Tower wa March 1, 1902, waambile’mba: “Kwamba pa byamwekanga Paulo: . . . mu buku wa kuba’mba ‘Acts of Paul and Thecla,’ . . . wanembelwe mu mwaka A. D. 150, balumbulula byamwekanga Paulo, kabiji kyamweka byo bamulumbulula byo ibyo byo amwekanga. Bamulumbulula’mba, ‘muntu wakepa mubiji, uji na jibala, wajinga na ngobe, wamwekanga bulongo, kabiji bikiki byasambakene byamwekangatu nobe kimo; kabiji wajinga ne na mona walepa.’”

Buku wa kuba’mba The Oxford Dictionary of the Christian Church (wa mu 1997) waambile pa bino byambo byanembelwe kala’mba: “Kyamweka byambo biji mu buku wa Acts of Paul and Thecla bya kine.” Uno buku bamunemekele bingi mu myaka kitota kitanshi, mambo mamanyusikilipiti a Kingiliki 80 a uno buku, ne a mu milaka ikwabo koaji. Onkao mambo, bipikichala byo tulenga byakwatankana na byo bamulumbulula mutumwa mu mabuku a kala.

Kabiji vulukainga kuba’mba, kuji bintu byanema kukila pa mwekelo ya kwa Paulo. Nangwatu kimye Paulo kyo aingijilenga mwingilo wa kusapwila, bantu bamyendeleko baambilenga’mba “umweka kukooka kabiji byambo byanji kechi byumvwanyika ne.” (2 Ko. 10:10) Bino kechi twafwainwa kulubako kuba’mba waikele mwina Kilishitu kimye Yesu kyo amwekele kwi aye mu jishinda ja kukumya ne. Kabiji twafwainwa kulangulukanga pa mwingilo Paulo ye aingijile byo ajinga ‘muntu ye basajile kuba’mba akashimune jizhina ja Kilishitu ku bisaka bya bantu.’ (Byu. 9:3-5, 15; 22:6-8) Kabiji langulukai pa byo twakonsha kumwenamo mu kutanga mabuku a mu Baibolo anembele Paulo na lutangijilo lwa Yehoba.

Paulo kechi witumbijikile na mambo a bintu byo aubile saka akyangye kwikala mwina Kilishitu ne, kabiji kechi waambilepo pa mwekelo yanji ne. (Byu. 26:4, 5; Fili. 3:4-6) Waambile’mba: “Amiwa yami mucheche pa batumwa, kabiji kechi nafwainwa kutelwa’mba mutumwa ne.” (1 Ko. 15:9) Kabiji wanembele’mba: “Amiwa, muntu mucheche kukila pa bonse bazhijikwa, bangubijile luno lusa lukatampe, kuba’mba nsapwile ku bisaka bya bantu mambo awama aamba pa bintu byawamisha bya Kilishitu bya kubula kukonsha kuyuka.” (Efi. 3:8) Byambo byaambile Paulo byo byo twafwainwa kutapo muchima, kechi mwekelo yanji ne.