Mashinda a Kwingijisha

Pa Kutendeka Mafunjisho a Baibolo pa Kibelushi Kitanshi mu January

“Bantu bavula bafuma mu bupopweshi bwapusana pusana kabiji bapopwela Lesa mu mashinda apusana pusana. Mwalanguluka’mba Lesa umvwa byepi pa kino? [Lekai akumbule.] Akimonai Yesu byo afunjishe pa kino.” Pai mwina nzubo Kyamba kya Usopa kya October–December ne kwisambila pamo nanji byambo biji pa kamutwe katanshi pa jipa 16, kabiji tangaipo ne kinembelo kimo pa binembelo bijipo. Shai magazini ne kunengezha kimye kyo mukabwelako na kwisamba bwipuzho bwalondelapo.

Kyamba kya Usopa October-December

Pa kwisamba na muntu uji mu masongola mwakonsha kweseka bino: “Ñanyi jishinda jawama jo mwatana ja kwikelamo mutende na bena kwenu? [Lekai akumbule.] Akimonai kino kyepelo kya mu Baibolo byo kyaambapo pa kikebewa ku baji mu masongola kusala bulongo bya kwamba kimye kyo babena kwisamba. [Tangai Kolose 4:6.] Uno magazini waamba pa kwingijisha jino jifunde byo kwakonsha kuleta mutende pa nzubo.”

Awake! January

“Mazhikakanwa, kubozha ne mashinda akwabo a kubula bukishinka asampukila ne pakatele mu bya busulu. Bamo balanguluka’mba kubula bukishinka mu bya busulu kujitu bulongo pa kuba’mba bintu byendenga bulongo. Anweba mulangulukapo’mba ka? [Lekai akumbule.] Akimonai bino byambo bikebewa kulangulukapo. [Tangai Byambo bya Mana 20:17.] Uno magazini walumbulula ene mambo o kyanemena kwikala bakishinka.”