Mepuzho Afuma Ku Batanga

Yesu byo asemenwe, mambo ka Yosefwa ne Maliya o baikejile mu Betelema kwa kubula kubwela ku Nazala?

Baibolo kechi waambapo ne. Bino witubuula bishinka bimo byawama byalengejile kuba’mba basalepo kubula kubwela ku Nazala pa kyokya kimye.

Malaika wabuujile Maliya kuba’mba ukemita ne kusema mwana. Kimye malaika kyo aambile bino byambo, Maliya ne Yosefwa baikalanga mu Nazala, muzhi mwasemekejilwe Yosefwa, mu kibunji kya Ngalilea. (Luka 1:26-31; 2:4) Palutwe kacheche, byo bafumine ku Ijipita, babwelele ku Nazala. Ko kwakomejile Yesu ne kutendeka kutelwa’mba mwina Nazala. (Mat. 2:19-23) O ene mambo o tulangulukila pa Nazala inge twatongola Yesu, Yosefwa ne Maliya.

Maliya wajinga mulongo wa kwa Elisabeta, waikalanga mu Yuda. Elisabeta wajinga muka ñanga aye Zekaliya kabiji ye wasemene Yoano Mubatizhi. (Luka 1:5, 9, 13, 36) Maliya wayile kwi Elisabeta ne kwikala konka bañondo basatu. Kepo abwelele ku Nazala. (Luka 1:39, 40, 56) O ene mambo Maliya o ayukijile bulongo yoya mpunzha ya Yuda.

Pa kupitapo moba, Yosefwa wafumine ku Nazala ne kuya ku Betelema, mambo bena Loma baambile’mba ‘muntu yense wafwainwa kuya na kunembesha’ “ku muzhi wanji.” Kabiji Betelema yo mpunzha mwafwainwe kusemekelwa Mesiasa kwesakana na bungauzhi. (Luka 2:3, 4; 1 Sam. 17:15; 20:6; Mika 5:2) Yosefwa kechi walengejile Maliya kwenda museke walepa na lukeke ne. Baikele mu Betelema, palepele makilomita atanu na ana kufuma ku Yelusalema. Onkao mambo, kyakonsheshe kwibapelela kutwala kaana ka lukeke ku nzubo ya Lesa ne kupana mulambo kwesakana na mwayijile mizhilo.—Levi 12:2, 6-8; Luka 2:22-24.

Malaika wa Lesa wabuujile jimo Maliya kuba’mba mwananji bakamupa “jitanda ja kwa Davida” kabiji “ukekala Mfumu.” Kampe Yosefwa ne Maliya balangulukilenga’mba kyanemene bingi Yesu byo asemekejilwe mu muzhi wa Davida. (Luka 1:32, 33; 2:11, 17) Bafwainwa balangulukilenga’mba kyakonsheshe kuwama kutwajijila kwikala kokwa ne kupembelela Lesa kwibabuula kintu kikwabo kyo bafwainwe kuba.

Kechi twayuka myaka yo baikele mu Yelusalema kimye bamfunji ba tubangabanga kyo baishile ne. Bino pa kikye kimye, kisemi kyajinga mu nzubo, kabiji mwanabo saka ajimuka, kechi wakijinga lukeke ne. (Mat. 2:11) Kyamweka kechi babwelele ku Nazala ne, batwajijile kwikala mu Betelema, kabiji Betelema ye waikele ke muzhi wabo.

Heloda wakambizhe’mba bepaye “baana bonse ba balume ba bacheche ba mu Betelema . . . kutendekela pa ba myaka ibiji ne kubwela panshi.” (Mat. 2:16) Malaika wajimwineko Yosefwa pa uno mukambizho, onkao mambo, Yosefwa ne Maliya basendele Yesu ne kunyemena ku Ijipita, kabiji baikele konkakwa kufika ne kimye Heloda kyo afwile. Kepo Yosefwa atwajile kisemi kyanji ku Nazala. Mambo ka o babujile kubwela ku Betelema? Wachiine mwana wa kwa Heloda waswaine pa bufumu wakanamine bingi aye Akeleusa, walaminenga mu Yudea kabiji wakookejile lujimuno lwa Lesa. Ku Nazala, Yosefwa ko ko akomeshe Yesu kwikala mupopweshi wa Yehoba.—Mat. 2:19-22; 13:55; Luka 2:39, 52.

Kyamweka Yosefwa wafwile, Yesu saka akyangye kufwa ne kushinkula jishinda ja bantu bakwabo kuya na kwikala mwiulu. Onkao mambo, Yosefwa ukasangulwa ne kwikala pano pa ntanda. Bavula bakamonañana nanji ne kufunda byavula pa ene mambo aye ne Maliya o batwajijile kwikala mu Betelema kimye kyasemenwe Yesu.