Sɛptɛmba

Gɔd dɔn gi Jizɔs di pawa fɔ sɔlv ɔl mɔtalman prɔblɛm dɛn. Di mirekul dɛn we Jizɔs bin de pafɔm sho se i gɛt pawa fɔ sɔlv ɔl di prɔblɛm dɛn we wi nɔ go ɛva ebul fɔ sɔlv bay wisɛf. Fɔ ɛgzampul, i gɛt di pawa fɔ fri wi frɔm di men tin we de mek wi gɛt prɔblɛm, we na di sin we wi gɛt frɔm wi fɔs mama ɛn papa ɛn ɔl di tin dɛn we de apin to wi bikɔs ɔf sin, lɛk sik ɛn day. (Mat. 9:1-6; Rom. 5:12, 18, 19) In mirekul dɛn bin pruv se i go ebul mɛn “ɔlkayn” sik ɛn ivin gi layf bak to di wan dɛn we dɔn day. (Mat. 4:23; Jɔn 11:43, 44) Dɔn bak, i gɛt di pawa fɔ kɔntrol big big briz ɛn fri pipul dɛn frɔm wikɛd spirit dɛn. (Mak 4:37-39; Lyuk 8:2) Wi rili gladi fɔ no se Jiova dɔn gi in Pikin da kayn pawa de! Wi go ebul gɛt kɔnfidɛns se ɔl di gud tin dɛn we Gɔd dɔn prɔmis se go apin ɔnda in Kiŋdɔm go kam tru. Di mirekul dɛn we Jizɔs bin pafɔm we i bin de na di wɔl de tich wi bɔt wetin i go du ɔlsay na di wɔl bikɔs in na di Kiŋ na Gɔd in Kiŋdɔm. w23.04 3 ¶5-7

If yu de na big kɔngrigeshɔn, ɛn yu fil se dɛn nɔ de kɔl yu fast fast, sɔntɛm yu go tink se i bɛtɛ lɛ yu giv-ɔp. Bɔt nɔ ɛva stɔp fɔ tray fɔ gi kɔmɛnt. Pripia bɔku kɔmɛnt dɛn fɔ ɛni mitin. Da tɛm de, if dɛn nɔ kɔl yu we di stɔdi stat, yu go stil gɛt chans fɔ kɔmɛnt we di mitin de go ɔn. We yu de pripia fɔ di Wachtawa Stɔdi, tink bɔt aw ɔl di paregraf dɛn gɛt sɔntin fɔ du wit di atikul in taytul. If yu du dat, i go mɔs bi se yu go gɛt sɔntin fɔ tɔk as di stɔdi de go ɔn. Dɔn bak, wan ɔda tin we yu kin du na fɔ pripia kɔmɛnt fɔ paregraf dɛn we de tɔk bɔt di dip tin dɛn na di Baybul we at fɔ ɛksplen. Wetin mek? Bikɔs i go mɔs bi se bɔku pipul dɛn nɔ go es dɛn an we wi rich da pat de na di stɔdi. Bɔt wetin yu go du if yu stil nɔ de gɛt chans fɔ gi kɔmɛnt na mitin? Na fɔ go mit di brɔda we de kɔndɔkt bifo mitin stat ɛn tɛl am di kwɛstyɔn we yu go lɛk fɔ ansa. w23.04 21-22 ¶9-10

Josɛf bin rɛdi fɔ fala Jiova in advays, ɛn dat bin mek i bi gud maredman. Tri tɛm, Gɔd bin tɛl am wetin fɔ du we i kam to in famili. Ɔl dɛn tɛm dɛn de, i nɔ bin de westɛm fɔ obe Jiova, pan ɔl we i nɔ bin izi fɔ am. (Mat. 1:20; 2:13-15, 19-21) Bikɔs Josɛf bin de fala Gɔd in advays, i bin ebul fɔ protɛkt Meri, i bin de sɔpɔt am, ɛn i bin de kia fɔ am. Imajin aw Meri bin lɛk ɛn rɛspɛkt Josɛf mɔ ɛn mɔ bikɔs ɔf di tin dɛn we i bin de du! Maredman dɛn, una go ebul fɔ falamakata Josɛf bay we una de luk fɔ advays dɛn na di Baybul bɔt aw fɔ kia fɔ una famili. We una fala dis advays, ilɛksɛf i nɔ izi, una go ebul sho se una lɛk una wɛf ɛn una mared go strɔng mɔ ɛn mɔ. Wan sista we de na Vɛnuatu, we i dɔn pas 20 ia we i mared, tɔk se: “We mi man de luk fɔ Jiova in advays ɛn fala am, a de rɛspɛkt am mɔ. A de fil sef, ɛn a gɛt kɔnfidɛns pan di tin dɛn we i de disayd.” w23.05 21 ¶5

Di Ju dɛn we de go bak we kɔmɔt Babilɔn go bi ‘oli pipul dɛn’ to dɛn Gɔd. (Dyu. 7:6) Bɔt dat nɔ min se dɛn nɔ nid fɔ mek chenj dɛn fɔ mek Jiova go gladi. Bɔku pan di Ju dɛn we dɛn bɔn na Babilɔn bin dɔn yus to di we aw di Babilonian dɛn bin de tink bɔt tin dɛn ɛn dɛn lɔ dɛn. Afta 69 ia we di fɔs Ju dɛn go bak na Izrɛl, Gɔvnɔ Nɛimaya bin sɔprayz fɔ no se pikin dɛn we dɛn bɔn na Izrɛl nɔ ivin sabi tɔk di langwej we di Ju dɛn de tɔk. (Dyu. 6:6, 7; Nɛi. 13:23, 24) Aw dɛn pikin dɛn de go lan fɔ lɛk ɛn wɔship Jiova if dɛn nɔ ɔndastand Ibru, we na di men langwej we dɛn bin rayt Gɔd in Wɔd pan? (Ɛzra 10:3, 44) So dɛn Ju dɛn de bin nid fɔ mek impɔtant chenj dɛn, bɔt i go izi fɔ lɛ dɛn mek dɛn chenj dɛn de na Izrɛl, usay dɛn bin dɔn bigin bak fɔ wɔship Jiova di rayt we smɔl smɔl.​—Nɛi. 8:8, 9. w23.05 15 ¶6-7

I sɔri fɔ no se pan ɔl we wi kin gɛt tin we de muv wi fɔ du sɔntin ɛn wi kin dɔn tren wisɛf gud gud wan, tin dɛn kin apin we kin mek i nɔ izi fɔ mek wi du di tin dɛn we wi bin want fɔ du. Fɔ ɛgzampul, “tin dɛn we . . . [wi] nɔ de ɛkspɛkt” kin tek wi tɛm ɛn atɛnshɔn, ɛn dat kin mek na smɔl tɛm nɔmɔ wi go gɛt fɔ du di tin we go ɛp wi fɔ rich wi gol. (Ɛkli. 9:11) Wi kin gɛt prɔblɛm dɛn we kin mek wi at pwɛl ɛn nɔ gɛt bɛtɛ trɛnk. (Prɔv. 24:10) Bikɔs wi nɔ pafɛkt, wi kin du tin dɛn we kin mek i nɔ rili izi fɔ rich wi gol. (Rom. 7:23) Ɔ sɔntɛnde wi kin jɔs taya. (Mat. 26:43) If sɔntin apin we de mek i nɔ izi fɔ mek wi rich wi gol, wetin go ɛp wi? Mɛmba se if sɔntin stɔp yu, i nɔ min se yu dɔn fel. Di Baybul tɔk se prɔblɛm dɛn go de mit wi. Bɔt i mek wi no bak klia wan se wi go ebul rich wi gol. Fɔ tru, we wi kɔntinyu fɔ du tin dɛn fɔ rich wi gol pan ɔl we wi kin gɛt tin dɛn we de stɔp wi fɔ du dat, wi de sho se wi rili want fɔ mek Jiova gladi. Wan dawt nɔ de se Jiova kin gladi we i de si yu de kɔntinyu fɔ tray tranga wan fɔ rich yu gol. w23.05 30 ¶14-15

We yɔŋ brɔda de payɔnia, dat de ɛp am fɔ sabi aw fɔ wok fayn fayn wan wit difrɛn pipul dɛn. I de ɛp am bak fɔ sabi yuz di mɔni we i de gɛt wit sɛns ɛn nɔ spɛn pas wetin i de gɛt. (Fil. 4:11-13) Wan fayn we pɔsin go bigin yuz ɔl in tɛm fɔ sav Jiova na we i de ɔgzilari payɔnia bikɔs dat go ɛp am fɔ bigin rɛgyula payɔnia. We pɔsin de payɔnia, dat de mek i gɛt chans fɔ du ɔda wok dɛn lɛk fɔ bi kɔnstrɔkshɔn savant, ɛn fɔ wok na Bɛtɛl. Ɔl brɔda dɛn fɔ tray fɔ kwalifay ɛn gɛt di kwaliti dɛn we dɛn nid fɔ wok fɔ dɛn brɔda ɛn sista dɛn as ɛlda dɛn na di kɔngrigeshɔn. Di Baybul se man dɛn we de tray fɔ du dis na “fayn wok [dɛn] want fɔ du.” (1 Tim. 3:1) I fɔ kwalifay fɔs fɔ wok as ministerial savant. Ministerial savant dɛn de ɛp di ɛlda dɛn fɔ du impɔtant wok dɛn. Ɛlda ɛn ministerial savant dɛn de put dɛnsɛf dɔŋ fɔ wok fɔ dɛn brɔda ɛn sista dɛn ɛn fɔ du di prichin wok wit zil. w23.12 28 ¶14-16

Kiŋ Josaya na bin tineja we i bigin fɔ luk fɔ Jiova. I bin want fɔ lan bɔt Jiova ɛn du wetin I want. Bɔt tin nɔ bin izi fɔ dis yɔŋ kiŋ. Di tɛm we i bin de rul, bɔku pan di pipul dɛn bin de wɔship lay lay gɔd dɛn. So Josaya bin nid fɔ gɛt maynd fɔ mek i go stɔp dɛn fɔ wɔship lay lay gɔd dɛn. Ɛn i bin rili gɛt maynd! Bifo i rich 20 ia, i bigin fɔ pul lay lay wɔship na di neshɔn. (2 Kro. 34:1, 2) Ilɛksɛf yu rili yɔŋ, yu kin disayd fɔ falamakata Josaya bay we yu lan mɔ bɔt Jiova ɛn in wɔndaful kwaliti dɛn. We yu du dat, yu go want fɔ gi yu layf to am. Aw dis go afɛkt yu layf? Lyuk, we baptayz di tɛm we i bin ol 14 ia tɔk se: “Frɔm naw, a go put Jiova fɔs na mi layf ɛn a go tray fɔ mek i gladi.” (Mak 12:30) If yu disayd fɔ du di sem tin, yu go gɛt bɔku blɛsin! w23.09 11 ¶12-13

We apɔsul Pɔl bin rayt dis lɛta, di kɔngrigeshɔn na Tɛsalonayka nɔ bin dɔn wan ia yet. I go bi se di man dɛn we i bin pik fɔ bi ɛlda dɛn nɔ bin gɛt bɛtɛ ɛkspiriɛns ɛn sɔntɛm dɛn bin de mek mistek dɛn. Bɔt stil, dɛn bin fit fɔ gɛt rɛspɛkt. As di tɛm fɔ da big big trɔbul de kam nia, sɔntɛm wi go nid fɔ abop mɔ ɛn mɔ pan di ɛlda dɛn we de na di kɔngrigeshɔn pas aw wi abop pan dɛn naw. Sɔntɛm wi nɔ go ebul fɔ gɛt dayrɛkshɔn frɔm di brɔda dɛn na wɔl ɛdkwata ɛn di branch ɔfis, so i impɔtant fɔ mek wi lan fɔ lɛk ɛn rɛspɛkt wi ɛlda dɛn naw. Ilɛk wetin apin, lɛ wi kɔntinyu fɔ tink di rayt we, lɛ wi nɔ pe atɛnshɔn pan di mistek dɛn we dɛn de mek, bɔt lɛ wi pe atɛnshɔn pan aw Jiova de yuz Jizɔs Krays fɔ gayd dɛn fetful man dɛn ya. Jɔs lɛk aw ɛlmɛt bin de protɛkt sojaman in ed, na so wi op we go mek wi sev de protɛkt wi maynd ɛn ɛp wi fɔ tink di rayt we. Wi biliv se di tin dɛn we di wɔl de gi nɔ gɛt wan valyu. (Fil. 3:8) Wi op de ɛp wi fɔ mek wi nɔ wɔri ɛn fɔ mek natin nɔ shek wi. w23.06 11-12 ¶11-12

Di wan dɛn we yɛri di “uman we ful” go nid fɔ disayd if dɛn go gri fɔ go ɔ dɛn nɔ go gri fɔ go. Gud rizin dɛn de we mek wi fɔ avɔyd mami ɛn dadi biznɛs di we aw Gɔd nɔ want. Di “uman we ful” de tɔk se: “Wata we dɛn tif swit.” (Prɔv. 9:17) Wetin na “wata we dɛn tif”? Di Baybul kɔmpia mami ɛn dadi biznɛs bitwin maredman ɛn in wɛf to wata we de mek pɔsin fil fayn. (Prɔv. 5:15-18) Man ɛn uman we mared ligal wan go ɛnjɔy fɔ du mami ɛn dadi biznɛs. Bɔt dat difrɛn frɔm “wata we dɛn tif.” I min mami ɛn dadi biznɛs di we aw Gɔd nɔ want. Bɔku tɛm, pipul dɛn we de du mami ɛn dadi biznɛs di we aw Gɔd nɔ want kin du am sikrit wan, jɔs lɛk tifman we de tray fɔ tif sɔntin. Sɔntɛm i go tan lɛk se di “wata we dɛn tif” swit mɔ if dɛn tink se nɔbɔdi nɔ go no wetin dɛn dɔn du. Dɛn de ful dɛnsɛf, bikɔs Jiova de si ɔltin. If Jiova vɛks pan wi, dat go bi di wɔs tin we go apin to wi, ɛn fɔ tru dat nɔ go fayn.​—1 Kɔr. 6:9, 10. w23.06 22 ¶7-9

Wetin yu go du if yu notis se yu nɔ de pre wit ɔl yu at igen ɔ yu nɔ de ɛnjɔy di prichin wok lɛk aw yu bin de ɛnjɔy am trade? Nɔ tink se yu nɔ gɛt Jiova in spirit igen. Yu na mɔtalman we nɔ pafɛkt, ɛn di we aw yu de fil kin chenj as tɛm de go. If yu nɔ gɛt bɛtɛ zil igen, tink bɔt apɔsul Pɔl in ɛgzampul. Pan ɔl we i bin tray fɔ falamakata Jizɔs, i bin no se tɛm dɛn go de we i nɔ go gɛt bɛtɛ zil lɛk ɔda tɛm dɛn. Pɔl bin dɔn mek-ɔp in maynd fɔ du di prichin wok pan ɔl we tɛm dɛn go de we i nɔ de fil fɔ du am. Semweso, nɔ alaw di we aw yu de fil fɔ disayd fɔ yu. Mek-ɔp yu maynd fɔ du wetin rayt pan ɔl we nɔto dat yu go want fɔ du. If yu kɔntinyu fɔ du wetin rayt, as tɛm de go di we aw yu de fil go chenj.​—1 Kɔr. 9:16. w24.03 11-12 ¶12-13

Wisɛf go ebul sho se wi lɛk wi brɔda ɛn sista dɛn bay we we wi de bi dɛn padi ɛn spɛn tɛm wit dɛn. (2 Kɔr. 6:11-13) Bɔku pan wi de na kɔngrigeshɔn dɛn wit brɔda ɛn sista dɛn we kɔmɔt difrɛn say ɛn we gɛt difrɛn abit dɛn. Wi go kɔntinyu fɔ lɛk dɛn ɔl mɔ ɛn mɔ bay we wi de pe atɛnshɔn pan dɛn gud kwaliti dɛn. Wi go nid fɔ sho se wi lɛk wi brɔda ɛn sista dɛn di tɛm fɔ da big big trɔbul. We da big big trɔbul go bigin, aw Jiova go protɛkt wi? Tink bɔt wetin Jiova bin tɛl in pipul dɛn fɔ du di tɛm we dɛn bin atak Babilɔn. I se: “Mi pipul dɛm, una kam insay una rum dɛn ɛn lɔk una do dɛn; una ayd unasɛf fɔ shɔt tɛm te di vɛksteshɔn dɔn.” (Ayz. 26:20) Sɔntɛm wisɛf go nid fɔ fala da sem advays de di tɛm fɔ da big big trɔbul. w23.07 6-7 ¶14-16

Sho bay wetin yu de du se yu na pɔsin we nɔ de pin pan sɔntin. Aks yusɛf dɛn kwɛstyɔn dɛn ya: ‘Pipul dɛn de si mi as pɔsin we nɔ de pin, we de alaw pipul dɛn fɔ du tin dɛn yon we? Ɔ dɛn de si mi lɛk pɔsin we tu strikt, ash, ɛn trangayes? Mi na pɔsin we de lisin to ɔda pipul dɛn ɛn ajɔst we nid de? Di mɔ wi sho se wi na pɔsin we nɔ de pin pan sɔntin, na di mɔ wi de falamakata Jiova ɛn Jizɔs. Fɔ bi pɔsin we nɔ de pin pan sɔntin, wi fɔ rɛdi fɔ ajɔst we tin chenj na wi layf. Dɛn chenj dɛn de kin mek wi gɛt prɔblɛm dɛn we wi nɔ ɛva tink se wi go gɛt. Sɔntɛm, wantɛm wantɛm wi go gɛt siriɔs wɛlbɔdi prɔblɛm. Ɔ sɔntɛm, wantɛm wantɛm wi go gɛt mɔni prɔblɛm ɔ di gɔvmɛnt go chenj, ɛn dat kin mek tin rili tranga fɔ wi. (Ɛkli. 9:11) I kin ivin tranga mɔ fɔ wi if di ɔganayzeshɔn aks wi fɔ sav Jiova na difrɛn ples. Wi go ebul fɔ ajɔst to nyu tin dɛn if wi du dɛn 4 tin dɛn ya: (1) gri se tin dɛn dɔn chenj, (2) tink bɔt tumara bambay, (3) pe atɛnshɔn pan di gud tin dɛn we de apin na yu layf, ɛn (4) du tin fɔ ɔda pipul dɛn. w23.07 21-22 ¶7-8

Prɔfɛt Daniɛl bin yɔŋ di tɛm we di Babilonian dɛn bin kɛr am go as prizina na Babilɔn we bin de fa frɔm Jerusɛlɛm. Bɔt pan ɔl we Daniɛl bin yɔŋ, di Babilonian bigman dɛn bin notis am. Dɛn bin si se Daniɛl nɔ gɛt wan bɔt ɛn i kɔmɔt na impɔtant famili. (1 Sam. 16:7) Na fɔ dɛn rizin dɛn ya mek di Babilonian dɛn bin tren am fɔ mek i go wok na di pales (Dan. 1:3, 4, 6) Jiova bin lɛk Daniɛl bikɔs ɔf di kayn pɔsin we dis yɔŋman disayd fɔ bi. Infakt, we Jiova se Daniɛl bin tan lɛk Noa ɛn Job, i bin ol lɛk 20 ia. So Jiova bin si yɔŋ Daniɛl as pɔsin we de du wetin rayt lɛk Noa ɛn Job we bin dɔn sav am fetful wan fɔ lɔng tɛm. (Jɛn. 5:32; 6:9, 10; Job 42:16, 17; Izikɛl 14:14.) Ɛn Jiova bin kɔntinyu fɔ lɛk Daniɛl te i day.​—Dan. 10:11, 19. w23.08 2 ¶1-2

If yu want fɔ bay os yu go want fɔ chɛk ɔltin na di os fɔ yusɛf bifo yu disayd fɔ bay am. Wi kin du di sem tin we wi de rid ɛn stɔdi di Baybul. If yu jɔs rid am kwik kwik wan, na jɔs di men tin dɛn yu go lan, dat na “di pikin pikin tin dɛn bɔt Gɔd in mɛsej frɔm di biginin.” (Ibru. 5:12) Bɔt jɔs lɛk aw yu nid fɔ go insay os fɔ no mɔ bɔt am, na so yu nid fɔ tek tɛm stɔdi di Baybul fɔ mek yu go ɔndastand am gud gud wan. Wan fayn we fɔ stɔdi di Baybul na fɔ si aw di tin dɛn we di Baybul se na wan say kɔnɛkt wit wetin i se ɔdasay. Tray fɔ ɔndastand wetin yu biliv, ɛn tray bak fɔ ɔndastand di rizin dɛn we yu gɛt we mek yu biliv se dɛn tin ya na tru. Fɔ ɔndastand Gɔd in Wɔd gud gud wan, sɔm tin dɛn de we wi nid fɔ stɔdi gud gud wan. Apɔsul Pɔl bin ɛnkɔrej in Kristian brɔda ɛn sista dɛn fɔ tek tɛm stɔdi Gɔd in Wɔd so dat dɛn go “rili ɔndastand aw di [trut] wayd, lɔng, ay, ɛn dip.” Dɔn, dɛn go ebul “tinap tranga wan” fɔ wetin dɛn biliv. (Ɛfi 3:14-19.) Wisɛf nid fɔ du di sem. w23.10 18 ¶1-3

Di Baybul gɛt bɔku ɛgzampul dɛn bɔt pipul dɛn we bin de peshɛnt. Yu nɔ tink se i go fayn fɔ stɔdi bɔt dɛn ɛgzampul dɛn ya? Fɔ ɛgzampul, pan ɔl we dɛn bin anɔynt Devid fɔ bi kiŋ na Izrɛl we i bin yɔŋ, i bin nid fɔ wet fɔ lɔng tɛm bifo i bi kiŋ. Simiɔn ɛn Ana bin kɔntinyu fɔ wɔship Jiova fetful wan as dɛn bin de wet fɔ di Mɛsaya we bin gɛt fɔ kam. (Lyuk 2:25, 36-38) As yu de stɔdi bɔt dɛn ɛgzampul dɛn ya, luk fɔ di ansa dɛn to dɛn kwɛstyɔn dɛn ya: Wetin go dɔn ɛp dis pɔsin fɔ sho se in na pɔsin we de peshɛnt? Aw i bin bɛnifit bikɔs in na pɔsin we de peshɛnt? Aw a kin falamakata am? Sɔntɛm yu go bɛnifit bak we yu lan bɔt pipul dɛn we nɔ bin de peshɛnt. (1 Sam. 13:8-14) Yu kin aks yusɛf: ‘Wetin bin mek dɛn pipul dɛn ya nɔ bin de peshɛnt? Us bad tin dɛn bin apin to dɛn bikɔs dɛn nɔ bin de peshɛnt?’ w23.08 25 ¶15

Apɔsul Pita na bin pɔsin we nɔ de kɔmɔt biɛn ɔda pɔsin, i nɔ bin alaw ɛnitin fɔ stɔp am fɔ mek i nɔ kɔntinyu fɔ de biɛn Jizɔs. Wantɛm, i bin sho se in na pɔsin we nɔ de kɔmɔt biɛn ɔda pɔsin we Jizɔs tɔk sɔntin we in disaypul dɛn nɔ bin ɔndastand. (Jɔn 6:68) Bikɔs bɔku pipul dɛn nɔ wet fɔ mek Jizɔs ɛksplen wetin i min, dɛn bin stɔp fɔ fala am. Bɔt Pita nɔ bin du dat. I bin sho se in na pɔsin we nɔ de kɔmɔt biɛn ɔda pɔsin ɛn tɔk se na Jizɔs nɔmɔ de tɔk tin dɛn we “go mek pɔsin gɛt layf we go de sote go.” Jizɔs bin no se Pita ɛn di ɔda apɔsul dɛn go lɛf am. Bɔt pan ɔl dat, Jizɔs bin sho se i biliv se Pita go kam bak ɛn kɔntinyu fɔ bi pɔsin we fetful. (Lyuk 22:31, 32) Jizɔs bin ɔndastand se “di spirit kin rili want fɔ du sɔntin, bɔt di bɔdi wik.” (Mak 14:38) So, Jizɔs nɔ bin giv-ɔp pan in apɔsul ivin afta Pita dinay se i nɔ sabi am. We Jizɔs bin gɛt layf bak, i bin apia to Pita, ɛn i go mɔs bi se na Pita in wan bin de da tɛm de. (Mak 16:7; Lyuk 24:34; 1 Kɔr. 15:5) Dat go dɔn rili ɛnkɔrej Pita we in at bin pwɛl bikɔs ɔf wetin i dɔn du! w23.09 22 ¶9-10

If pɔsin we gɛt fet pan Gɔd kɔmit sin, Gɔd de fɔgiv am. I de fɔgiv di pɔsin fɔ ɔl wetin i dɔn du ɛn i nɔ de mɛmba di sin igen. (Sam 32:1, 2) I de si da kayn pɔsin de as pɔsin we nɔ gɛt blem ɛn we de du wetin rayt bikɔs ɔf in fet. Pan ɔl we Gɔd bin se Ebraam, Devid, ɛn in ɔda fetful savant dɛn na pipul dɛn we bin de du wetin rayt, dɛn bin stil de sin bikɔs dɛn nɔ pafɛkt. Bɔt bikɔs ɔf di fet we dɛn bin gɛt, Gɔd bin si dɛn as pipul dɛn we nɔ gɛt blem mɔ we i kɔmpia dɛn to di wan dɛn we nɔ de wɔship am. (Ɛfi. 2:12) Apɔsul Pɔl tɔk klia wan na in lɛta se fɔ mek wi go ebul bi Gɔd in padi, wi nid fɔ gɛt fet. Ebraam ɛn Devid na bin Jiova in padi dɛn bikɔs dɛn bin gɛt fet pan am. Wisɛf go ebul bi Gɔd in padi if wi gɛt fet. w23.12 3 ¶6-7

Tide ɔl Kristian dɛn gɛt di ɔnɔ fɔ gi Jiova sakrifays dɛn bay we dɛn de yuz dɛn tɛm, trɛnk, ɛn prɔpati dɛn fɔ sav am. Wi go sho se wi valyu di ɔnɔ we wi gɛt fɔ wɔship Jiova bay we wi de du wi bɛst fɔ sav am. Apɔsul Pɔl bin tɔk bɔt tin dɛn we wi fɔ du ɔltɛm we wi de wɔship Jiova. (Ibru. 10:22-25) Dɛn tin dɛn ya na, fɔ pre to Jiova, prich to ɔda pipul dɛn, atɛnd di mitin dɛn, ɛn ɛnkɔrej wi kɔmpin dɛn “mɔ we [wi] de si se [Jiova in] de de kam nia.” We Jɔn bin de dɔn fɔ rayt di Baybul buk we nem Rɛvɛleshɔn, i rayt se Jiova in enjɛl tɔk tu tɛm se: “Wɔship Gɔd!” (Rɛv. 19:10; 22:9) Dis sho se dat rili impɔtant. Lɛ wi nɔ ɛva fɔgɛt di dip tin dɛn we wi dɔn lan bɔt Jiova in gret spirichwal tɛmpul ɛn di ɔnɔ we wi gɛt fɔ wɔship wi gret Gɔd! w23.10 29 ¶17-18

Wi ɔl want fɔ “kɔntinyu fɔ lɛk wi kɔmpin dɛn.” Bɔt i impɔtant fɔ mɛmba se Jizɔs bin wɔn wi se “plɛnti pipul dɛn lɔv go ridyus.” (Mat. 24:12) Jizɔs nɔ bin de se bɔku pan in disaypul dɛn go lɛf fɔ sho lɔv. Bɔt bɔku pipul dɛn na di wɔl nɔ de sho lɔv, so wi nid fɔ tray fɔ mek di we aw dɛn de biev nɔ afɛkt wi. As wi de tink bɔt dis, lɛ wi tɔk bɔt dis impɔtant kwɛstyɔn: Wetin go ɛp wi fɔ no if wi rili lɛk wi brɔda ɛn sista dɛn? Wan we fɔ no if wi rili lɛk wi brɔda ɛn sista dɛn na we wi tink bɔt wetin wi kin du we sɔm tin dɛn apin. (2 Kɔr. 8:8) Apɔsul Pita bin tɔk bɔt wan pan dɛn tin dɛn de. I se: “Di tin we pas ɔl na dat, una fɔ rili lɛk una kɔmpin dɛn, bikɔs lɔv de kɔba bɔku bɔku sin dɛn.” (1 Pit. 4:8) So di tin dɛn we wi kin du we wi brɔda ɛn sista dɛn mek mistek ɔ du sɔntin we mek wi fil bad go ɛp wi fɔ no if wi rili lɛk dɛn. w23.11 10-11 ¶12-13

Wi nɔ go ebul obe Jizɔs in kɔmand bɔt lɔv if wi de sho se wi lɛk sɔm brɔda ɛn sista dɛn na di kɔngrigeshɔn, bɔt wi nɔ de sho se wi lɛk ɔda brɔda ɛn sista dɛn. Fɔ tru, sɔntɛm wi go gɛt sɔm brɔda ɛn sista dɛn we wi lɛk mɔ, jɔs lɛk Jizɔs. (Jɔn 13:23; 20:2) Bɔt apɔsul Pita de mɛmba wi se wi fɔ tray tranga wan fɔ ‘lɛk wisɛf lɛk aw brɔda dɛn kin lɛk dɛnsɛf’ bikɔs wi ɔl de na wan famili. (1 Pit. 2:17) Pita bin ɛnkɔrej wi fɔ “rili lɛk [wi] kɔmpin dɛn wit ɔl [wi] at.” (1 Pit. 1:22) Fɔ “rili lɛk” min se wi fɔ lɛk sɔmbɔdi ilɛksɛf i nɔ izi fɔ sho se wi lɛk am. Fɔ ɛgzampul, wetin wi go du if wan brɔda ɔfɛn wi ɔ du sɔntin we mek wi fil bad? Fɔs, bifo wi sho se wi lɛk am, sɔntɛm wi go want fɔ trit am di sem we aw i trit wi. Bɔt, Pita bin lan frɔm Jizɔs fɔ se Gɔd nɔ kin gladi we pɔsin de tɔn-am-gi. (Jɔn 18:10, 11) Pita bin rayt se: “Una nɔ du bad to pɔsin we du una bad; if pɔsin tɛl una bad wɔd, una nɔ tɛl am bad wɔd bak. Bifo dat, una blɛs am.” (1 Pit. 3:9) We yu rili lɛk yu brɔda ɛn sista dɛn, yu go du gud to dɛn ɛn peshɛnt wit dɛn. w23.09 28-29 ¶9-11

Wi kin kɔle we wi kin si pikin de gro kwik kwik wan ɛn bi big pɔsin. I tan lɛk se pikin dɛn nɔ de du ɛnitin fɔ mek dɛn gro. Bɔt, if wi want fɔ bi machɔ Kristian, wi nid fɔ du sɔntin. (1 Kɔr. 13:11; Ibru. 6:1) Fɔ bi machɔ Kristian, wi nid fɔ gɛt tayt padi biznɛs wit Jiova. Wi nid in oli spirit bak as wi de tray fɔ gɛt kwaliti dɛn we go mek Gɔd gladi, sabi aw fɔ du tin dɛn, ɛn rɛdi fɔ di wok dɛn we wi go gɛt tumara bambay. (Prɔv. 1:5) Jiova bin mek mɔtalman fɔ bi man ɔ uman. (Jɛn. 1:27.) I izi fɔ si se di we aw Gɔd mek man difrɛn frɔm di we aw i mek uman, bɔt dɛn difrɛn ɔda we dɛn bak. Fɔ ɛgzampul, Jiova mek man ɛn uman fɔ du patikyula wok dɛn, so dɛn nid fɔ gɛt kwaliti dɛn ɛn sabi du tin dɛn we go ɛp dɛn fɔ du dɛn wok dɛn de.—Jɛn. 2:18. w23.12 18 ¶1-2

Yu tink se Jizɔs bin want ɔda pipul dɛn fɔ yuz in Papa in nem? Yɛs. I go bi se sɔm bigman dɛn pan Gɔd biznɛs bin biliv se fɔ yuz Gɔd in nem nɔ de sho wan rɛspɛkt, bɔt Jizɔs nɔ bin ɛva alaw dɛn kayn tradishɔn dɛn ya fɔ mek i nɔ ɔnɔ in Papa in nem. Tink bɔt di tɛm we Jizɔs bin mɛn wan man we bin gɛt dimɔn na di eria usay di Gɛrasin dɛn de. Di pipul dɛn bin fred, ɛn dɛn beg Jizɔs fɔ kɔmɔt na di eria, so i bin kɔmɔt de. (Mak 5:16, 17) Bɔt stil, Jizɔs bin want pipul dɛn na da eria de fɔ no Jiova in nem. So i tɛl di man we i mɛn fɔ tɛl di pipul dɛn wetin Jiova dɔn du fɔ am, nɔto wetin in dɔn du. (Mak 5:19) Tide, Jizɔs want wi bak fɔ ɛp ɔlman na di wɔl fɔ no in Papa in nem! (Mat. 24:14; 28:20) We wi du dat, wi de mek wi Kiŋ, we na Jizɔs gladi. w24.02 10 ¶10

Na big big ɔnɔ wi gɛt fɔ de na Jiova in ɔganayzeshɔn insay dis las dez we tin rili tranga. As tin de bad-ɔf na di wɔl mɔ ɛn mɔ, Jiova dɔn mek wi gɛt brɔda ɛn sista dɛn fɔ ɛp wi. (Sam 133:1) I de ɛp wi fɔ gɛt famili we gɛt wanwɔd ɛn gladi-at. (Ɛfi. 5:33–6:1) Ɛn i de gi wi di sɛns we wi nid fɔ bia we wi gɛt pwɛlat ɛn fɔ gɛt gladi-at. Bɔt wi nid fɔ wok tranga wan fɔ kɔntinyu fɔ sav Jiova fetful wan. Wetin mek? Na bikɔs sɔntɛnde, wi brɔda ɛn sista dɛn go tɔk ɔ du sɔntin we go mek wi fil bad. Sɔntɛm wi at go pwɛl bak we wi mek mistek dɛn, mɔ if wi de ripit di sem mistek dɛn igen ɛn igen. Wi nid fɔ kɔntinyu fɔ sav Jiova (1) we wi kɔmpin Kristian ɔfɛnd wi, (2) we wi man ɔ wɛf disapɔynt wi, ɛn (3) we wi at pwɛl bikɔs wi mek mistek. w24.03 14 ¶1-2

Wan wan tɛm, yu go de yɛri ɛkspiriɛns dɛn bɔt brɔda ɛn sista dɛn we dɔn disayd fɔ du mɔ fɔ sav Jiova. Sɔntɛm, dɛn bin atɛnd di Skul fɔ Pipul dɛn We De Prich bɔt Gɔd in Kiŋdɔm ɔ sɔntɛm dɛn go de na say usay dɛn nid mɔ pipul dɛn fɔ prich. I go rili fayn if yu ebul fɔ sɛt da kayn gol de. Jiova in pipul dɛn rɛdi fɔ du mɔ pan di prichin wok. (Akt 16:9) Bɔt wetin yu go du if yu nɔ ebul sɛt da gol de naw? Nɔ tink se di wan dɛn we ebul fɔ du am bɛtɛ pas yu. Di tin we impɔtant na fɔ mek yu kɔntinyu fɔ bia. (Mat. 10:22) Nɔ fɔgɛt se yu go mek Jiova gladi we yu du wetin yu ebul fɔ sav am. Dat na wan impɔtant we we yu go sho se yu de kɔntinyu fɔ fala Jizɔs afta yu baptayz.—Sam 26:1. w24.03 10 ¶11

Wi Papa we de na ɛvin prɔmis se i go fɔgiv wi if wi ripɛnt. (Sam 86:5) So if wi rili sɔri fɔ di sin dɛn we wi bin dɔn kɔmit, wi go biliv se wetin Jiova tɔk na tru ɛn i dɔn fɔgiv wi. Mɛmba se Jiova nɔ de pin. I nɔ de ɛva aks wi fɔ du pas wetin wi ebul fɔ du. I de gladi fɔ ɛnitin we wi ebul fɔ du wans na wi bɛst. Dɔn bak, tink bɔt Baybul ɛgzampul dɛn bɔt di wan dɛn we bin sav Jiova wit ɔl dɛn at. Tink bɔt apɔsul Pɔl in ɛgzampul. I bin wok tranga wan fɔ lɔng tɛm, travul go fa fa say dɛn, ɛn bigin bɔku kɔngrigeshɔn dɛn. Bɔt we tɛm bin rich we i nɔ ebul fɔ du mɔ na di prichin wok lɛk aw i bin de du, fɔ se Gɔd nɔ bin gladi fɔ am? Nɔ. I bin kɔntinyu fɔ du wetin i ebul fɔ du ɛn Jiova bin blɛs am. (Akt 28:30, 31) Semweso, sɔntɛnde di tin dɛn we wi de du fɔ Jiova kin chenj. Bɔt wetin impɔtant to am na di rizin we mek wi de du am. w24.03 27 ¶7, 9

Jizɔs sɛt ɛgzampul we in disaypul dɛn fɔ fala bay we i bin de pre to Jiova. We Jizɔs bin de prich, i bin de pre ɔltɛm. I bin nid fɔ mek tɛm fɔ pre bikɔs bɔku tɛm i bin bizi ɛn bɔku pipul dɛn bin de arawnd am ɔltɛm. (Mak 6:31, 45, 46) I bin wek ali mɔnin so dat i go gɛt tɛm fɔ pre in wangren. Di Baybul tɛl wi bɔt wan tɛm we i bin pre ol nɛt bifo i disayd fɔ du wan impɔtant tin. (Lyuk 6:12, 13) Ɛn Jizɔs bin pre bɔku tɛm di nɛt bifo i day, ɛn i bin pe atɛnshɔn fɔ dɔn di wok we bin at fɔ du pas ɛni ɔda wok we i bin dɔn du na di wɔl. (Mat. 26:39, 42, 44) Jizɔs in ɛgzampul de tich wi se ilɛk aw wi bizi, wi nid fɔ mek tɛm fɔ pre. Jɔs lɛk Jizɔs, wi nid fɔ fɛn tɛm fɔ pre. Sɔntɛm, wi go nid fɔ wek ali mɔnin ɔ nɔ slip kwik fɔ pre. We wi du dat, wi de sho Jiova se wi gladi fɔ dis spɛshal gift. w23.05 3 ¶4-5

Insay di orijinal langwej, dis vas min se Jiova rili lɛk di anɔyntɛd dɛn, ɛn wi go kɔmpia di lɛk we i lɛk dɛn to riva. Dɛn no se “Gɔd . . . lɛk” dɛn. (Jud 1) Apɔsul Jɔn bin tɔk bɔt aw dɛn de fil we i rayt se: “Luk di kayn we we di Papa dɔn sho se i lɛk wi, we i dɔn mek dɛn de kɔl wi Gɔd in pikin dɛn!” (1 Jɔn 3:1) Bɔt fɔ se na di anɔyntɛd dɛn nɔmɔ Jiova lɛk? Nɔ, Jiova dɔn pruv se i lɛk wi ɔl. Us we Jiova dɔn sho se i lɛk wi we pas ɔl ɔda we dɛn? Na we i mek Jizɔs gi in layf as prayz fɔ fri wi frɔm sin ɛn day. Nɔbɔdi nɔ go ɛva ebul sho wi dis kayn lɔv!​—Jɔn 3:16; Rom. 5:8. w24.01 28 ¶9-10

Di vas we de ɔp tɔk bɔt wan tin we bin ɛp Devid fɔ lɛf fɔ fred. Pan ɔl we Devid in layf bin stil de pan denja, i bin tink gud gud wan bɔt wetin Jiova gɛt fɔ du fɔ am. Devid bin no se Jiova go sev am di rayt tɛm. Jiova bin dɔn tɔk se na Devid go bi di nɛks kiŋ na Izrɛl. (1 Sam. 16:1, 13) To Devid, ɛnitin we Jiova dɔn prɔmis, i tan lɛk se i dɔn ɔlrɛdi apin. Wetin Jiova dɔn prɔmis fɔ du fɔ yu? Wi nɔ de ɛkspɛkt se i go protɛkt wi frɔm ɔl di prɔblɛm dɛn we de tide. Bɔt stil, mɛmba se ɛnikayn prɔblɛm we go mit yu, Jiova go pul da prɔblɛm de na di nyu wɔl tumara bambay. (Ayz. 25:7-9) Wan dawt nɔ de se di Wan we mek wi, gɛt di pawa fɔ mek dayman dɛn gɛt layf bak, fɔ pul ɔlkayn sik, ɛn fɔ mek ɔl di wan dɛn we de agens wi nɔ de igen.​—1 Jɔn 4:4. w24.01 6 ¶12-13

Tink bɔt wetin mek yu gi yu layf to Jiova ɛn baptayz. Yu du dɛn tin dɛn de bikɔs yu want fɔ sɔpɔt Jiova. Mɛmba wetin bin ɛp yu fɔ biliv tranga wan se yu dɔn fɛn di trut. Yu bin lan di tru bɔt Jiova ɛn yu bigin fɔ rɛspɛkt ɛn lɛk am as yu Papa we de na ɛvin. Yu gɛt fet pan am, ɛn dat bin muv yu fɔ ripɛnt. Yu stɔp fɔ du tin dɛn we Jiova et ɛn stat fɔ du tin dɛn we de mek i gladi. Yu fil fayn we yu no se Jiova dɔn fɔgiv yu. (Sam 32:2) Yu bin atɛnd Kristian mitin dɛn ɛn bigin fɔ prich to ɔda pipul dɛn bɔt di wɔndaful tin dɛn we yu dɔn lan. As Kristian we dɔn gi in layf to Jiova ɛn baptayz, naw yu de waka na di rod we go mek yu gɛt layf, ɛn yu dɔn mekɔp yu maynd nɔ fɔ kɔmɔt na da rod de. (Mat. 7:13, 14) Lɛ wi tinap tranga wan ɛn kɔntinyu fɔ lɛk ɛn obe Jiova ɔltɛm. w23.07 17 ¶14; 19 ¶19

We yu de tink bɔt di pre we yu bin pre to Jiova fɔ gi yu layf to am, dat go ɛp yu fɔ mek yu nɔ alaw ɛnitin fɔ tɛmt yu fɔ du sɔntin we bad. Fɔ ɛgzampul, yu tink se yu fɔ mek pɔsin we yu nɔ mared to fil se yu want am? Wan dawt nɔ de se yu nɔ go du dat! Yu bin dɔn ɔlrɛdi prɔmis Jiova se yu nɔ go du da kayn tin de. If yu nɔ alaw bad tin dɛn fɔ de na yu at, yu nɔ go nid fɔ fɛt leta fɔ pul dɛn kɔmɔt de. Yu nɔ go “gri” fɔ go na “di wikɛd pɔsin in rod.” (Prɔv. 4:14, 15) We wi tink gud wan bɔt Jizɔs in ɛgzampul, dat go ɛp wi. I bin mekɔp in maynd fɔ du tin dɛn we go mek in Papa gladi. Lɛk Jizɔs, mek-ɔp yu manyd nɔ fɔ du ɛnitin we go mek di Gɔd we yu dɔn gi yu layf to nɔ gladi. (Mat. 4:10; Jɔn 8:29) Di prɔblɛm dɛn we de mit wi ɛn di tin dɛn we kin tɛmt wi de gi wi chans fɔ sho se wi dɔn mek-ɔp wi maynd fɔ “kɔntinyu fɔ fala” Jizɔs. As yu de du dat, gɛt kɔnfidɛns se Jiova go ɛp yu. w24.03 9-10 ¶8-10